ექიმ ვაჟა გაფრინდაშვილის ოჯახი გაეროს გენერალურ მდივანს მიმართავს

ოკუპირებული ცხინვალის საპატიმროში უკანონოდ მყოფი ექიმის, ვაჟა გაფრინდაშვილის ოჯახმა გაეროს გენერალურ მდივანს მიმართა, დაუყოვნებლივ გამოიყენოს ყველა არსებული რესურსი ოკუპანტების მიერ დატყვევებული ექიმის გასათავისუფლებლად. ვაჟა გაფრინდაშვილის ოჯახი გენერალურ მდივანს მოუწოდებს, საქართველოში სასწრაფოდ გაგზავნოს გაეროს სპეციალური კომისარი.
საოკუპაციო ძალების წარმომადგენლებმა ექიმი ვაჟა გაფრინდაშვილი 9 ნოემბერს, ახალგორის რაიონთან დააკავეს. ექიმს ბრალად დასდეს ე.წ. საზღვრის განზრახ დარღვევა. ცხინვალის რეგიონის დე ფაქტო სასამართლომ ვაჟა გაფრინდაშვილს ორთვიანი წინასწარი პატიმრობა შეუფარდა.