ერგნეთის რიგით 113-ე შეხვედრა კონკრეტული შეთანხმების გარეშე დასრულდა
ერგნეთის რიგით 113-ე შეხვედრა ამჯერადაც კონკრეტული შეთანხმების გარეშე დასრულდა – მონაწილეებმა გამყოფ ხაზთან, წინა შეხვედრიდან დღემდე მომხდარ ინციდენტები განიხილეს. ქართულმა მხარემ მკაცრად მოითხოვა უკანონოდ დაკავებული მოქალაქეების უპირობო გათავისუფლება.
როგორც შეხვედრის დაწყების წინ სახელმწიფო უსაფრთხოების სამსახურის ანალიტიკური დეპარტამენტის უფროსის მოადგილემ ირაკლი ანთაძემ უთხრა ადგილზე მყოფ ჟურნალისტებს, დაისმება ცხინვალის იზოლატორში მყოფი საქართველოს 7 მოქალაქის უპირობოდ გათავისუფლების საკითხი.
ასევე განიხილება წინა შეხვედრიდან (27 აპრილი) დღემდე საოკუპაციო ხაზის გასწვრივ „დაფიქსირებული ყველა მნიშვნელოვანი ინციდენტი“, უკანონო ე.წ. ბორდერიზაციის შემთხვევების ჩათვლით, ასევე – საოკუპაციო ხაზის გასწვრივ თავისუფალი გადაადგილების გაუმჯობესების საკითხი.
ირაკლი ანთაძის ინფორმაციით, გორისა და ქარელის მუნიციპალიტეტებში 27 აპრილიდან, ანუ ინციდენტების პრევენციისა და მათზე რეაგირების მექანიზმის (IPRM) ფარგლებში ჩატარებული 112-ე შეხვედრის შემდეგ, ე.წ. ბორდერიზაციის 4 შემთხვევა გამოვლინდა.
გარდა ამისა, ირაკლი ანთაძე შეხვდა ცხინვალში დაკავებული ლევან პეტრიაშვილის დედას. პეტრიაშვილის სასამართლო ცხინვალში 27 ივნისს უნდა გამართულიყო, თუმცა გადაიდო. დაკავებულის დედას, ალა დოიჯაშვილს, ირაკლი ანთაძე შეხვედრის დასრულების შემდეგ უფრო მეტი ინფორმაციის მიწოდებას შეჰპირდა. ლევან პეტრიაშვილი საოკუპაციო რეჟიმის წარმომადგენლებმა 14 მაისს დააკავეს.
3 დაკავებულს 19 ივლისამდე წინასწარი პატიმრობა გაუხანგრძლივდა, აქედან ერთს, რომელიც 19 ივნისს დააკავეს, 2 თვიანი პატიმრობა შეეფარდა, ხოლო 2-ზე გრძელდება სასამართლო განხილვები. რაც შეეხება ჩხიკვაძეს და ნათაძეს, ვინც უკვე საკმაოდ ხანგრძლივ პატიმრობაში იმყოფებიან, მათზე ქართულ მხარეს კონკრეტული პასუხი არ მიუღია და მათ გასათავისუფლებლად მუშაობა ყველა შესაძლო ფორმატში გაგრძელდება. უსაფრთხოების გარდა მხარეებმა ჰუმანიტარულ საკითხებზეც იმსჯელეს.
ამასთან ირაკლი ანთაძე გამოეხმაურა ასევე ოკუპირებული ცხინვალის რეგიონის დე ფაქტო მთავრობის გადაწყვეტილებას, ქართული დრონების წინააღმდეგ ცეცხლის გახსნის ნებართვაზე. ირაკლი ანთაძის განცხადებით, ამ „ფაქტის სერიოზულად შეფასება არის შეუძლებელი“.
„ჩვენი ძალისხმევა მიმართულია საოკუპაციო ხაზის გასწვრივ სტაბილური გარემოს შენარჩუნებაზე და ამგვარი ქმედებები ნაკლებად უწყობს ხელს სტაბილურობის შენარჩუნებას“, – განაცხადა სახელმწიფო უსაფრთხოების სამსახურის ანალიტიკური დეპარტამენტის უფროსის მოადგილემ ირაკლი ანთაძემ.
ინციდენტების პრევენციის და მათზე რეაგირების მექანიზმი, ჟენევის საერთაშორისო დისკუსიის ფორმატთან ერთად, 2008 წლის აგვისტოს ომის შემდეგ შეიქმნა. თანათავმჯდომარეები არიან ევროკავშირის, ეუთოს და გაეროს სპეციალური წარმომადგენლები. შეხვედრებში მონაწილეობენ საქართველოს ხელისუფლების, აშშ-ის, რუსეთის და ცხინვალის საოკუპაციო რეჟიმის წარმომადგენლები.
მომდევნო შეხვედრა ერგნეთში 12 სექტემბერს გაიმართება.
