ომის 437-ე-ბახმუტის აღების ნაცვლად ოკუპანტი კონტრშეტევისთვის ემზადება
ომის კვლევის ამერიკული ინსტიტუტი (ISW) აცხადებს, რომ რუსეთის თავდაცვის სამინისტრომ, როგორც ჩანს, პრიორიტეტები შეცვალა და ბახმუტის აღების ნაცვლად, უკრაინის კონტრშეტევისთვის ემზადება.
ISW ამას რუსული კერძო სამხედრო კომპანია ვაგნერის დამფუძნებლის, ევგენი პრიგოჟინის მიერ გავრცელებულ ვიდეოებზე დაყრდნობით ამბობს – კერძოდ, პრიგოჟინმა წინა დღეებში ვაგნერის მიერ ბახმუტის დატოვების გეგმის შესახებ ისაუბრა – მისი თქმით, იმ შემთხვევაში, თუ შესაბამის აღჭურვილობას არ მიიღებენ, ქალაქს 10 მაისს დატოვებენ. 5 მაისს პრიგოჟინმა გამოაქვეყნა ვიდეოც, სადაც მისი განცხადებით, გარდაცვლილი “ვაგნერელები” ჩანან.
გავრცელებულ ვიდეოში პრიგოჟინი რუსეთის ხელისუფლებას მიმართავს და რუსული ჯარის ხელმძღვანელობას [თავდაცვის მინისტრ სერგეი შოიგუსა და გენშტაბის უფროსს ვალერი გერასიმოვს] აგინებს. პრიგოჟინი ამბობს, რომ საბრძოლო მასალის 70%-იან ნაკლებობას განიცდიან. ის რუსეთის ხელმძღვანელობას აკრიტიკებს, იმის გამო, რომ საჭირო შეიარაღებას არ აწვდიან. ექსპერტების აზრით, პრიგოჟინის ბრაზი და ღია კრიტიკა მეტყველებს, რომ რუსეთის თავდაცვის სამინისტრომ, სავარაუდოდ, პრიორიტეტი გადაიტანა ბახმუტიდან ომის სხვა მიმათულებაზე, თანაც ისე, რომ შეიძლება სერიოზული ზიანი მიადგეს “ვაგნერის” ფუნქციონირებას.
ISW-ის ცნობით, “ვაგნერს” ამ დრომდე არ შეუწყვეტია ბახმუტის სრულად დაკავების მცდელობა, მიუხედავად საბრძოლო მასალისა და სხვა საჭირო მარაგების დეფიციტისა.
ISW მიუთითებს, რომ კრემინას ტერიტორიაზე და დონეცკის მახლობლად ლოკალიზებული თავდასხმების გარდა, რუსულმა ძალებმა შეტევითი ოპერაციები მეტწილად შეწყვიტეს, რაც სავარაუდოდ თავდაცვაზე გადასვლას მიანიშნებს. ომის კვლევის ინსტიტუტის შეფასებით, უკრაინის კონტრშეტევისთვის მარაგებისა და საბრძოლო აღჭურვილობების დაზოგვა რუსეთის თავდაცვის სამინისტროს მხრიდან დროული გადაწყვეტილება იქნება, ხოლო პრიგოჟინის ბოლოდროინდელი ვიდეოები მიუთითებს, რომ რუსეთი სწორედ ამას აკეთებს.
პარალელურად, უკრაინის შეიარაღებულ ძალებში აცხადებენ, რომ ვაგნერელებს ამოეწურათ არა საბრძოლო მასალა, არამედ მებრძოლები. ბახმუტი უკრაინის ფრონტის ყველაზე ცხელ სექტორად რჩება – ორივე მხრიდან დიდი რაოდენობით მსხვერპლია.
ქალაქისთვის ბრძოლები ცხრა თვეა – გასული წლის აგვისტოდან, გრძელდება. მიუხედავად ეტაპობრივი წინსვლისა, რუსული ძალები ვერ ახერხებენ ქალაქის სრულად აღებას. თეთრი სახლის მრჩეველი უსაფრთხოების საკითხებში ჯონ კირბი ამბობს, რომ რუსეთმა ბახმუტისთვის ბრძოლაში ბოლო 5 თვეში 20 000 სამხედრო დაკარგა. კირბი ამბობს, რომ ეს მონაცემები ამერიკის დაზვერვამ მოიპოვა. მისივე თქმით, დაღუპული სამხედროების ნახევარს ვაგნერის ჯგუფი წარმოადგენს.
6 მაისს, თავის ყოველდღიურ ანგარიშში უკრაინის არმიის გენერალური შტაბი აცხადებს, რომ უკრაინის ძალებმა 50-მდე შეტევა მოიგერიეს დონეცკის რეგიონში, მათ შორის ბახმუტში, მარინკაში და ავდეევკაში. რუსეთმა ღამით უკრაინაზე დრონებითაც მიიტანა შვიდი იერიში, უკრაინის ძალებმა ყველა დრონი გაანადგურეს – აცხადებს უკრაინის საჰაერო ძალების პრესმდივანი, იური იგნატი 6 მაისს.
უკრაინაში, ომის 437-ე დღეს ოკუპანტებმა იერიში მიიტანეს დონეცკის ოლქზე. აფეთქების ხმა ისმოდა დნიპროშიც. ოკუპანტებმა დაბომბეს ავდიივკაც, რასაც ერთი ადამიანის სიცოცხლე ემსხვერპლა.
მძიმე არტილერიითა და გრადებით 11-ჯერ დაიბომბა ხერსონი. გასული დღის განმავლობაში, უკრაინელმა დამცველებმა 10 დრონი ჩამოაგდეს. რუსული მედიის ინფორმაციით, დღეს, დილით აფეთქების ხმა ოკუპირებულ ყირიმშიც ისმოდა.
