ქმრის მიერ მოკლული როზეტა ყალიჩავას შვილები ბებიამ საქართველოში ჩამოიყვანა
პოლონეთში, 24 მაისს ქმრის მიერ მოკლული როზეტა ყალიჩავას შვილები ბებიამ საქართველოში ჩამოიყვანა და ისინი ზუგდიდის მუნიციპალიტეტ სოფელ დარჩელში იმყოფებიან.
როზეტას დის, ლორიტა ყალიჩავას თქმით,დედას ფატი ყალიჩავას პოლონეთის სასამართლომ დროებითი მეურვის სტატუსი მიანიჭა.
იგი პოლონეთში 15 ივლისს გაემგზავრა.
“გრძელდება სასამართლო განხილვები მუდმივი მეურვეობის მინიჭების თაობაზე.ჩვენ ორი და ვართ, ჩვენი ოჯახები გვაქვს, ფინანსურად არ გვიჭირს და დავეხმარებით დედას ბავშვების გაზრდაში. უფროსი გოგო ჩემთან იქნება. საზეიმო დახვედრა მოვუწყვეთ, მაგრამ დედას (როზეტას)კითხულობენ, რატომ არ მოდისო,ვერ აცნობიერებენ რა მოხდა,ჯერ პატარები არიან”,-უთხრა დამ ლორიტა ყალიჩავამ რადიო თბილისს.
სამი შვილის დედა, 26 წლის როზეტა ყალიჩავა,ქმარმა 24 მაისს პოლონეთში, საცხოვრებელ ბინაში ცივი იარაღით მოკლა და შემდგომ კვალის დაფარვის მიზნით ბინაში ხანძარი გააჩინა.
მანამდე,კი ქალმა რამდენჯერმე დასახმარებლად ორგანიზაცია “საფარს” მიმართა, რის შემდეგაც მამაკაცი დააკავეს, მხოლოდ 24 საათით.
ყალიჩავები მიიჩნევენ,რომ პოლონეთის სახელმწიფომ ქალის სიცოცხლე ვერ დაიცვა.
ახალგაზრდა ქალის ქმარი დაკავებულია.