EU გმობს რუსეთის განზრახვას სექტემბერში უკრაინის ოკუპირებულ ტერიტორიებზე ე. წ. „არჩევნების“ ჩატარების შესახებ
ევროკავშირი გმობს რუსეთის განზრახვას უკრაინის ოკუპირებულ ტერიტორიებზე სექტემბერში ე.წ. არჩევნების ჩატარებასთან დაკავშირებით. განცხადებას ევროკავშირის საგარეო ქმედებათა სამსახურის პრესცენტრი აქვეყნებს.
განცხადების მიხედვით, აღნიშნული გადაწყვეტილება რუსეთის კიდევ ერთი უკანონო ქმედებაა. ასევე აღნიშნულია, რომ მსგავსი განზრახვა გაეროს წესებს, უკრაინის დამოუკიდებლობას, სუვერენიტეტსა და ტერიტორიულ მთლიანობას არღვევს.
„ეს არის რუსეთის კიდევ ერთი უკანონო სამხედრო კონტროლის ლეგიტიმიზაციისა და დონეცკის, ლუჰანსკის, ზაპოროჟიეს, ხერსონის ოლქების და ასევე ყირიმის ავტონომიური რესპუბლიკისა და ქალაქ სევასტოპოლის ანექსირების მცდელობა.
მსგავსი განზრახვა წარმოადგენს გაერო-ს წესდების, ასევე, უკრაინის დამოუკიდებლობის, სუვერენიტეტისა და ტერიტორიული მთლიანობის სერიოზულ დარღვევას, რადგან რუსეთს უკრაინის ტერიტორიაზე ასეთი ქმედებების განხორციელების არანაირი უფლება არ აქვს“, – ვკითხულობთ განცხადებაში, სადაც ნათქვამია, რომ ე.წ. არჩევნების ორგანიზებაში ჩართული ყველა პირი, მათ შორის რუსეთის ფედერაციის პოლიტიკური ხელმძღვანელობა, პასუხისგებაში მიეცემა.
ევროკავშირი, რუსეთს უკრაინის ტერიტორიიდან, ჯარების სრულად გაყვანისკენ კიდევ ერთხელ მოუწოდებს.
