ბრიტანეთი უკრაინისთვის Challenger 2-ის ტიპის ტანკების გადაცემას განიხილავს
Skynews-ის ინფორმაციით, დიდი ბრიტანეთი უკრაინისთვის Challenger 2-ის ტიპის ტანკების გადაცემას განიხილავს.
მედიის ცნობით, საწყის ეტაპზე ასეთი 10 მანქანის გადაცემა იგეგმება, რაც უკრაინის შეიარაღებული ძალებისთვის საკმაოდ სერიოზული დახმარება იქნება.
მედიასაშუალებას სანდო წყარომ აცნობა, რომ ბრიტანული არმიის საბრძოლო ტანკის Challenger 2-ის მიწოდების შესახებ ოფიციალურ ლონდონსა და კიევს შორის მოლაპარაკებები რამდენიმე კვირაა, რაც მიმდინარეობს.
გარდა ამისა, ლონდონის ამ ნაბიჯის შემდეგ, შესაძლოა, სხვა მოკავშირეებმაც ანალოგიური გადაწყვეტილება მიიღონ.
თუმცა ექსპერტების თქმით, თავად ეს ნაბიჯი ფრონტზე სიტუაციას მნიშვნელოვნად ვერ შეცვლის, თუმცა ის იქნება სიგნალი და მაგალითი ნატო-ს სხვა მოკავშირეებისთვის, რის შემდეგაც შესაძლოა, მათაც იფიქრონ უკრაინისთვის ტანკების გადაცემის შესაძლებლობაზე.
მანამდე ვრცელდებოდა ინფორმაცია, რომ უკრაინამ, შესაძლოა, გერმანული Leopard-2-ის ტიპის ტანკები მიიღოს, თუმცა ოფიციალურად ეს ინფორმაცია არ დადასტურებულა.
რიში სუნაკის მთავრობას ჯერ არ მიუღია საბოლოო გადაწყვეტილება, მაგრამ თუ გაერთიანებული სამეფო ხელს მოაწერს ამ გადაწყვეტილებას, დიდი ბრიტანეთი გახდება პირველი ქვეყანა, რომელიც უკრაინელი ლიდერების თხოვნას მათი სამხედროების მძლავრი დასავლური ტანკებით აღჭურვის შესახებ უპასუხებს.
ცნობისთვის, Challenger 2 თანამედროვე საბრძოლო მანქანაა, რომელიც ტექნიკური მახასიათებლებით რუსულ ტანკებს ბევრად უსწრებს. ტანკის წონა 62,5 ტონას შეადგენს. ის 120 მმ-იანი ქვემეხით და 7,62 მმ-იანი ტყვიამფრქვევით არის შეიარაღებული.
საბრძოლო მანქანა ლდიდი ბრიტანეთის არმიის შეიარაღებაში 1994 წლიდან შედის.
