თელავში ახლადრეაბილიტირებულ პარკს წარწერებით ამახინჯებენ
თელავში, დასვენებისა და კულტურის პარკ “ნადიკვარზე” ახლადაშენებული ფანჩატურები წარწერებით არის აჭრელებული.
ქართულ და ინგლისურ ენაზე შესრულებული წარწერები, ფანჩატურების ხის საყრდენებზე, გვერდებსა და ფიცრებზეა დატოვებული.
ადგილობრივები ამბობენ, რომ სხვადასხვა ფერის სპეციალური კალმით გაკეთებული წარწერების რიცხვი, ახლადაშენებულ ფანჩატურებში, ყოველდღიურად იზრდება.
” ხშირად მოვდივარ აქ. მომწონს ეს ფანჩატურები. ახლები ჩადგეს და დასვენება შეიძლება. ყოველდღე ახალ- ახალი წარწერები მხვდება, სხვადასხვა ფერით, სხვადასხვა ენაზე და სახელებით. ან თვითონ პარკი რატომ არ აკონტროლებს, ან შესაბამისი სამსახურები სად არიან. ფაქტიურად ფუჭდება და ილახება ყველაფერი. გული მწყდება, არავინ არაფერს უფრთხილდება და არც პატრონი ჩანს, რომ ეს აღკვეთოს”- ამბობს რადიო ჰერეთთან, ერთ-ერთი ადგილობრივი.
პარკში, ფანჩატურების დაზიანების ფაქტს, ჯერჯერობით, პარკის ადმინისტრაცია და თელავის მერია, არ გამოხმაურებია.
დასვენებისა და კულტურის პარკ “ნადიკვრის” რეაბილიტაცია ჯერ კიდევ მიმდინარეობს და მას მერიისგან დაჯარიმებული, ტენდერში გამარჯვებული კომპანია ‘ ბერმუხა” აკეთებს.
