მნიშვნელოვანისაქართველოსიახლეები

პარლამენტთან ქალ დეპუტატებზე განხორციელებულ ძალადობას აპროტესტებენ

ქალი დეპუტატები და უფლებადამცველები პარლამენტის შენობასთან აქციას მართავენ. ისინი საკანონმდებლო ორგანოს თავმჯდომარეს, კახა კუჭავას კონკრეტული განცხადების გაკეთებისა და შესაბამისი ნაბიჯების გადადგმისკენ მოუწოდებენ.

“მივმართავ კახა კუჭავას, მიიღოს სათანადო ზომები პარლამენტის წევრების დასასჯელად, ვინც ფიზიკურად გამოიყენა ძალა ქალი პარლამენტის წევრების მიმართ, რადგან, მსგავსი ქმედება ფეხქვეშ თელავს ყველა იმ რეფორმას ქალთა უფლებების დაცვის თვალსაზრისით, რომელიც პარლამენტს მიუღია. იმიტომ, რომ 18 ივლისს კაცებმა პარლამენტში გვითხრეს, რომ თუ ქალის საუბარი, მისი გამოხატვის მანერა არ მოსწონთ, შეუძლიათ ხელით, ფიზიკურად გააჩერონ ის, ამიტომ, ბატონო კახა, გთხოვთ გამოხატოთ თქვენი პოზიცია და იმოქმედოთ თქვენი უფლებამოსილების ფარგლებში, იმისთვის, რათა პასუხი გავცეთ მოძალადე პარლამენტის წევრ მამაკაცებს”, – თქვა თამარ კორძაიამ.

ადგილზე განცხადება გააკეთეს ქალთა უფლება დამცველებმაც, იდა ბახტურიძემ აღნიშნა, რომ პარლამენტი ძალადობის აღკვეთის პრაქტიკას უნდა ქმნიდეს და არა მწვანე შუქს უნთებდეს მოძალადეებს.

“საიას” ხელმძღვანელის, ნიკა სიმონიშვილის თქმით, სამარცხვინოა, რომ წინსვლის ნაცვლად იმ დროს დავუბრუნდით, როცა ქალზე ძალადობა ჩვეულებრივი მოვლენა იყო და ამ ფაქტებს “ქართული ოცნება ქვის ხანის” დროინდელი არგუმენტებით ამართლებს.

შეგახსენებთ, 18 ივლისს რიგგარეშე სხდომაზე, სადაც კანონმდებლებს შს მინისტრისთვის უნდა მოესმინათ, უმრავლესობის წევრმა შალვა პაპუაშვილმა “ნაცმოძრაობის” დეპუტატი თინა ბოკუჩავა სპიკერატიდან ძალის გამოყენებით ჩამოიყვანა.

მსგავსი პოსტები

Back to top button