ისრაელის თავდაცვის ძალებში აცხადებენ რომ სამხედრო ოპერაციის ფარგლებში „ჰამასის“ 11 000-მდე წევრი მოკლეს
ღაზის სექტორში ისრაელის სამხედრო ოპერაციას გასული დღის განმავლობაში 112 ადამიანი ემსხვერპლა, 157 კი დაშავდა. ამის შესახებ ინფორმაციას ღაზის ჯანდაცვის სამსახური ავრცელებს.
7 ოქტომბერს „ჰამასის“ წევრების ისრაელზე თავდასხმის და ისრაელის მიერ არაბულ ანკლავში სამხედრო ოპერაციის დაწყების შემდეგ ღაზის სექტორში მსხვერპლის რიცხვმა 28 775-ს მიაღწია, 68 552 ადამიანი კი დაშავდა.
ისრაელის თავდაცვის ძალებში აცხადებენ, რომ სამხედრო ოპერაციის ფარგლებში „ჰამასის“ 11 000-მდე წევრი მოკლეს. ისრაელის სამხედროები ძებნის ოპერაციას აგრძელებენ ქალაქ ხან იუნისის ნასერის ჰოსპიტალში. ისრაელის არმიის ინფორმაციით, ამ დრომდე დააკავეს 20-ზე მეტი ტერორისტი, რომლებიც 7 ოქტომბერს ისრაელზე თავდასხმაში მონაწილეობდნენ.
აშშ-ის პრეზიდენტმა, ჯო ბაიდენმა კიდევ ერთხელ მიმართა ისრაელის პრემიერ-მინისტრს, ბენიამინ ნეთანიაჰუს, რომ მან არ უნდა მიმართოს საომარ მოქმედებებს ღაზის სექტორის სამხრეთის ქალაქ რაფაჰში პალესტინელი მოქალაქეების დაცვის დამაჯერებელი და რეალისტური გეგმის გარეშე, განაცხადა თეთრმა სახლმა.
ბაიდენი ამ კვირაში უკვე მეორედ აფრთხილებს ნეთანიაჰუს ღაზის სექტორის სამხრეთში შესვლის გარშემო თითქმის ერთი მილიონი პალესტინელის უსაფრთხოების უზრუნველყოფის გეგმის გარეშე.
Reuters-ის ცნობით, მათი საუბრის თემა იყო ასევე მოლაპარაკება მძევლების განთავისუფლების შესახებ და ბაიდენი დაჰპირდა ისრაელის პრემიერს, რომ შეუჩერებლად გრძელდება ამ საკითხზე მუშაობა, რათა ხელი შეუწყონ მძევლების განთავისუფლებას.
7 ოქტომბერს ისრაელზე თავდასხმის და 240-მდე მძევლის გატაცების შემდეგ, ისრაელის არმია ბრძოლას აწარმოებს ჰამასის წინააღმდეგ ღაზის სექტორში, რომელიც სისტემატურად იბომბება. პალესტინელი მოსახლეობის დიდი ნაწილი თავს აფარებს ქალაქ რაფაჰს- უკიდურეს სამხრეთში, სადაც ისრაელს სახმელეთო ოპერაციის დაწყება აქვს დაგეგმილი. ქალაქში იმყოფებიან ჰამასის ნაწილები, რომელთა სრული განადგურება სურს ისრაელს.
ცნობისთვის 2023 წელს მსოფლიოში 99 ჟურნალისტი და მედიის თანამშრომელი დაიღუპა, მათგან სამ-მეოთხედზე მეტი – ისრაელსა და „ჰამასს“ შორის მიმდინარე საომარი მოქმედებების დროს.
მათ უმრავლესობას პალესტინელი ჟურნალისტები შეადგენენ, რომლებიც ღაზის სექტორზე ისრაელის ავიადარტყმებს ემსხვერპლნენ. შესაბამის მონაცემებს ჟურნალისტთა დაცვის კომიტეტი ავრცელებს.
ანგარიშის თანახმად, ისრაელსა და „ჰამასს“ შორის კონფლიქტს სამი დღის განმავლობაში იმაზე მეტი ჟურნალისტი ემსხვერპლა, რაც ოდესმე დაღუპულა რომელიმე ქვეყანაში მთელი წლის განმავლობაში. დაღუპულთა შორის ასევე სამი ლიბანელი და ორი ისრაელელი ჟურნალისტია.
ომში რეპორტიორთა გარდაცვალების გამოძიება განსაკუთრებით რთულია მოკლე დროში მსხვერპლთა დიდი რაოდენობის და იმის გამო, რომ მრავალი ჟურნალისტის ოჯახის წევრები მათთან ერთად დაიღუპნენ, ხოლო მათი კოლეგები ასევე დაიღუპნენ და საომარ მოქმედებებს გამოექცნენ.
მსოფლიოში დაღუპული ჟურნალისტების 2023 წლის მაჩვენებელია ყველაზე მაღალია 2015 წლის შემდეგ და 44%-ით გაზრდილია წინა წლის მაჩვენებელთა შედარებით. ჟურნალისტთა დაცვის კომიტეტის ცნობით, 78 გარდაცვალების შემთხვევა ჟურნალისტურ საქმიანობას უკავშირდება, რვასთან დაკავშირებით კი გამოძიება გრძელდება.
ანგარიშში აღნიშნულია, რომ თუკი ისრაელში, ღაზასა და ლიბანში ჟურნალისტთა გარდაცვალების შემთხვევებს არ ჩავთვლით, გლობალური მასშტაბით, მედიის თანამშრომელთა გარდაცვალების შემთხვევები, წინა წელთან შედარებით, მნიშვნელოვნად არის შემცირებული. თუმცა ეს არ ნიშნავს, რომ ჟურნალისტის საქმიანობა გახდა უფრო უსაფრთხო მსოფლიოს დანარჩენ ნაწილში. კომიტეტის მონაცემებით, 2023 წელს დაპატიმრებულ ჟურნალისტთა რაოდენობა კვლავ ახლოა გასულ წელს დაფიქსირებულ რეკორდულ მაჩვენებელთან.
