რურუას პატიმრობა – პოლიტიკური შეფასებები
„სასამართლო არის დამოუკიდებელი გადაწყვეტილებების მიღებაში“. – ასე გამოეხმაურა პარლამენტის თავმჯდომარის მოადგილე გიორგი კახიანი თბილისის საქალაქო სასამართლოს გადაწყვეტილებას გიორგი რურუას პატიმრობაში დატოვებასთან დაკავშირებით.
როგორც მან აღნიშნა, ამ ეტაპზე სასამართლოს საბოლოო გადაწყვეტილება არ გამოუტანია და საუბარი იყო მხოლოდ აღკვეთის ღონისძიების შეცვლაზე, რომელიც სასამართლომ არ დააკმაყოფილა.
მისივე თქმით, პროცესი გრძელდება და საბოლო ჯამში რა გადაწყვეტილებას გამოიტანს სასამართლო, შემდგომ პერიოდში გამოჩნდება.
„ამ ეტაპზე, როგორც ჩანს, სასამართლოს არ ჰქონდა იმის სამართლებრივი საფუძველი, რომ შეცვლილიყო აღკვეთი ღონისძიების გარემოება და მიღებული იქნა შესაბამისი გადაწყვეტილება“. – აღნიშნა გიორგი კახიანმა.
მოისმინეთ გიორგი კახიანის ხმა.
“თუ ჩვენ ამ პატარას დღეს დავთმობთ, მივიღებთ უბედურებას არჩევნებზე, უბედურებას იმიტომ, რომ ამ ადამიანს, ივანიშვილს, ასეთი ენა ესმის: გამივიდა? გავალ თავს”. – ამის შესახებ ჟურნალისტებს “ევროპული საქართველოს” ერთ-ერთმა ლიდერმა, გიგი უგულავამ გიორგი რურუას პატიმრობაში დატოვებასთან დაკავშირებით განუცხადა. როგორც უგულავამ აღნიშნა, 8 მარტის შეთანხმება უნდა შესრულდეს და რურუამ საპატიმრო უნდა დატოვოს.
“ერთი მისხალის დათმობაც არ შეიძლება ამ შემთხვევაში. ვიღაცამ შეიძლება თქვას, რომ რა შუაშია, იყოს გიორგი რურუა, რა მოხდა? არა! ხალხმა ამას უნდა შევხედოთ როგორც პრევენციას მშვიდობისთვის, პრევენციას განვითარებისთვის და პრევენციას უკეთესი მომავალისთვის, რადგან თუ 8 მარტის შეთანხმებაზე ასე ფეხით გაიარა ივანიშვილმა, არჩევნებზე უბედურებას დაატრიალებს და მერე უკვე გვიან იქნება. სანამ დრო გვაქვს, უნდა ვიყოთ მტკიცე და მტკიცედ ყოფნა ნიშნავს იმას, რომ 8 მარტის შეთანხმება არის ძალაში, ის უნდა შესრულდეს, რურუა უნდა გათავისუფლდეს”. – განაცხადა უგულავამ.
„ძალა ერთობაშიამ მოიტანა 8 მარტის შეთანმხება, ჩემი გათავისუფლება და ძალა ერთობაშია მოიტანს გიორგი რურუას გათავისუფლებას“. – ამის შესახებ თავდაცვის ყოფილმა მინისტრმა ირაკლი ოქრუაშვილმა განაცხადა.
მისი თქმით, გიორგი რურუას გამოშვება გარდაუვალი საკითხია.
„ძალა ერთობაშია [ასევე მოიტანს] საკონსტიტუციო ცვლილებების მიღებას და არჩევნების მშვიდობიანად ჩატარებას, ხელისუფლების ცვლილებას. ეს ერთობა იქნება აქ და თუ ვინმე ამ ერთობას ხელს შეუშლის, ის ქვეყნის წინააღმდეგ მიდის“. – განაცხადა ირაკლი ოქრუაშვილმა.
ცნობისთვის, “ლეიბორისტული პარტიის” ოფისში ოპოზიციური პარტიების ლიდერების შეხვედრა იმართება.
შეგახსნებთ, რომ დღეს, სასამართლომ გიორგი რურუა პატიმრობაში დატოვა.
