“ენმ”-ს აქციას “ლელო” და გახარიას პოლიტიკური გუნდი არ უერთდება

„ერთიანი ნაციონალური მოძრაობა“ აქციას გამართავს. აქცია თბილისში, რუსთაველის გამზირზე 17:00 საათზე დაიწყება.

აქციის მიზანი ევროპული არჩევანის მხარდაჭერაა.

„საქართველოს ისტორიული არჩევანი რეალობად უნდა იქცეს – დამოუკიდებელი ქართული სახელმწიფო ევროპის სრულფასოვანი წევრი უნდა გახდეს!

ამისათვის კი საჭიროა, რომ საქართველომ გამოიყენოს შანსი და მიიღოს ევროკავშირის კანდიდატი ქვეყნის სტატუსი.

რუსული ოცნება მიზანმიმართულად აშორებს საქართველოს ევროპას, განზრახ არ ასრულებს ევროკავშირის წინაშე აღებულ 12 ვალდებულებას, რადგან მას არ აქვს საქართველოს ევროპასთან დაახლოების პოლიტიკური ნება.

ბოლო დროს განვითარებულმა მოვლენებმა კიდევ უფრო ნათლად აჩვენა, რომ საქართველოს ხელისუფლება არ წარმოადგენს ქართველი ხალხს, რადგან საქართველოს მოსახლეობის 80 %-ზე მეტი ირჩევს ევროპას.

ამიტომ, ქართველი ერის არჩევანი, საქართველოს დამოუკიდებლობა, საქართველოს მომავალი კვლავ დასაცავია!

ვიკრიბებით 9 აპრილს, 17:00 საათზე, პარლამენტის წინ. კიდევ ერთხელ ვუთხრათ არა რუსეთს! არა რუსულ მთავრობას! არა რუსულ რეპრესიებს! არა ქვეყნის გარუსებას!“,- წერია ორგანიზატორების ინფორმაციაში.
“ნაციონალური მოძრაობის” მიერ დაგეგმილ აქციას, ოპოზიციური პარტიები “ლელო” და გახარიას პოლიტიკური გუნდი არ უერთდება. ისინი ამბობენ, რომ მათთვის გაუგებარია რა მიზანს ემსახურება აქცია. “ნაციონალური მოძრაობა” კი ამბობს, რომ აქციის მიზანი ევროპული არჩევანის მხარდაჭერაა.

“დღევანდელი დღის რაღაც პოლიტიკური მიზნებისთვის გამოყენება, მე პირადა არ მიმაჩნია მიზანშეწონილი. რაც შეეხება პოლიტიკურ აქციებს, პოლიტიკურ აციებს ყოველთვის სჭირდება თვისი წინაპირობა, ამიტომ მე წარმოდგენა არ მაქვს კონკრეტულად რაც ემსახურეს, ამ შემთხვევაში ბატონი ხაბეიშვილის მიერ დაინფიცირებული აქცია. ჩვენი გუნდი ამ აქციას არ უერთდება”, – განაცხადა ანა ბუჩუკურმა.

“ლელოს” ერთ-ერთი ლიდერის ბადრი ჯაფარიძის თქმით, ყველა პარტიას შეუძლია აქციის დაანონსება, თუმცა “ლელო” ამ აქციას არ დაესწრება, რადგან დღეს, მნიშვნელოვანია პატივი მივაგოთ 9 აპრილს დაღუპულ მოქალაქეებს.
როგორც მან ჟურნალისტებს განუცხადა, მათთვის 9 აპრილს სხვა სიმბოლური დატვირთვა აქვს.
“ჩვენთვის ეს არის 9 აპრილს უმნიშვნელოვანესი, რომ სწორედ პატივის მიგება განვახორციელოთ ერთის მხრივ და მეორეს მხრივ, 32 წლისთავის დამოუკიდებლობის აღდგენის აქტიდან. ყველა პარტიას შეუძლია გამოაცხადოს აქცია, ჩვენ ამ აქციას არ ვესწრებით”, – განაცხადა ბადრი ჯაფარიძემ.