ილია მეორემ ავარიაში დაღუპულთა ოჯახებს მიუსამძიმრა
საქართველოს კათოლიკოს-პატრიარქი შატილის გზაზე, სოფელ ბისოსთან ავარიის შედეგად დაღუპულთა ოჯახებს სამძიმარს უცხადებს. განცხადება საქართველოს საპატრიარქომ ცოტა ხნის წინ გაავრცელა.
„დიდია ჩვენი მწუხარება ხევსურეთში, სოფელ ბისოსთან, ა.წ. 23 აგვისტოს მომხდარი ტრაგიკული შემთხვევის გამო, რომელსაც 17 ადამიანი ემსხვერპლა და რომელმაც მთელი საქართველო შეძრა.
გვინდა ყველა ოჯახს გამოვუცხადოთ სამძიმარი და მიუხედავად ასეთი მძიმე განსაცდელისა, ვუთხრათ, რომ უნუგეშობას არ უნდა მიეცნენ.
ღმერთმა ყველა განგამტკიცოთ და მოგმადლოთ ურყევი რწმენა მარადიული ჭეშმარიტი ცხოვრებისა, რომლის მკვიდრნიც ჩვენი შვილები – ახლადგარდაცვალებულნი გუშინ გახდნენ.
აღვავლენთ ლოცვებს მათი უკვდავი სულისათვის, რათა უფალმან სავანესა მართალთასა დააწესოს ისინი, ხოლო დაშავებულთ შეეწიოს და გადაარჩინოს“, – ნათქვამია საპატრიარქოს მიერ გავრცელებულ განცხადებაში.
