უკრაინის ქალაქ ლვოვში აფეთქებების ხმა ისმის
უკრაინული მედიის ინფორმაციით, დასავლეთ უკრაინის ქალაქ ლვოვში აფეთქებების ხმა ისმის. გამოცემა „უკრაინა 24-ის“ ცნობით, აფეთქებები ქალაქ ლვოვის სხვადასხვა რაიონში ადგილობრივი დროით დაახლოებით 6:30 საათიდან დაიწყო.
ხანძარი ჩანს ქალაქის გარეუბანში, ნგრევისა და დაშავებულების შესახებ ინფორმაცია ჯერ არ არის. ინფორმაცია ამის შესახებ უკრაინის შსს-ს ხელმძღვანელის მრჩევლის დენისენკოზე დაყრდნობით უკრაინულ ტელეგრამარხებზე ვრცელდება.
მომხდარ აფეთქებას ადასტურებს ლვოვის მერიც. მისი თქმით, რუსეთის საოკუპაციო ძალებმა რაკეტა აეროპორტის რაიონში ჩამოაგდეს. თვითმხილველები ყვებიან, რომ ქალაქის აღმოსავლეთით კვამლია.
ადგილობრივი ხელისუფლება მოსახლეობას თავშესაფრებში დარჩენისკენ მოუწოდებს.
უკრაინული მედიის ინფორმაციით, აფეთქებების ხმა ისმის ხარკოვსა და დნეპროშიც.
ქალაქი პოლონეთის საზღვრიდან 70 კილომეტრში მდებარეობს. რამდენიმე ქვეყანამ საელჩო კიევიდან ლვოვში გადაიტანა. რუსეთის შეჭრის შემდეგ ბევრი უკრაინელი სწორედ ლვოვში გაიქცა.
