ირანი საპასუხო თავდასხმის შემთხვევაში აშშ-ს ბაზებზე შეტევით იმუქრება
ირანი იმუქრება, რომ მზადაა დაარტყას აშშ-ს სამხედრო ბაზებს, თუკი ისრაელი თავდასხმით უპასუხებს მის საჰაერო სამხედრო თავდასხმას ისრაელზე, რომლის დროსაც ირანმა 300-ზე მეტი დრონი და რაკეტა გაუშვა ისრაელის საწინააღმდეგოდ.
“ჩვენი პასუხი ბევრად უფრო დიდი იქნება, ვიდრე ამღამინდელი სამხედრო მოქმედება, თუ ისრაელი ირანს პასუხს გასცემს.” – თქვა ირანელმა გენერალმა მუჰამედ ბაღერიმ ირანულ სამთავრობო ტელევიზიაში ისრაელზე თავდასხმის პარალელურად. მან ხაზგასმით აღნიშნა, რომ თეირანმა შეერთებული შტატები უკვე გააფრთხილა რომ ისრაელის საპასუხო ქმედებების შემთხვევაში მიზანში ამერიკულ ბაზებს ამოიღებენ.
გენერალ ბაღერის გარდა, თავდასხმაზე პასუხით იმუქრება ირანის ისლამური რევოლუციის გუშაგთა კორპუსის მეთაური, ჰოსეინ სალამიც.
ირანის მუქარის პარალელურად, CNN თეთრი სახლის ადმინისტრაციის ანონიმურ წარმომადგენელზე დაყრდნობით წერს, რომ შეერთებული შტატები არ აპირებს ირანზე საპასუხო თავდასხმაში მონაწილეობას. CNN-ის ცნობით, ჯო ბაიდენმა ისრაელის პრემიერს, ბენიამინ ნეთანიაჰუს სატელეფონო საუბარში უთხრა, რომ ირანზე შესაძლო საპასუხო თავდასხმაში მონაწილეობას არ მიიღებენ.
გამოცემის თანახმად, ბაიდენმა ნეთანიაჰუს ასევე უთხრა, რომ ირანის თავდასხმა მეტწილად წარუმატებელი იყო და ისრაელი გამარჯვებული დარჩა. აშშ-ს შეფასებით, ისრაელმა თავისი უპირატესი სამხედრო ძალა გამოავლინა, ხოლო ირანმა ისრაელში ვერაფერი “ღირებული” ვერ დააზიანა.
13 აპრილს, თეთრი სახლის მიერ გავრცელებულ განცხადებაში წერია, რომ შეერთებული შტატები მკაცრად გმობს ირანის საჰაერო თავდასხმას და ეხმარება ისრაელს ამ თავდასხმის მოგერიებაში.
“ჩემი მითითებით, აშშ-ს სამხედროებმა წინა კვირის განმავლობაში რეგიონში საჰაერო ხომალდები და რაკეტსაწინააღმდეგო თავდაცვის ნაღმოსნები გაგზავნეს. ამ განლაგებისა და ჩვენი სამხედროების არაჩვეულებრივი ოსტატობის დამსახურებით, ისრაელს დავეხმარეთ, თითქმის ყველა შემავალი დრონი და რაკეტა ჩამოეგდო” – წერია განცხადებაში.
აშშ-ს პრეზიდენტის ინიციატივით დაგეგმილია დიდი შვიდეულის (G7) ლიდერების შეკრებაც, იმისათვის რომ შვიდეულის წევრმა ქვეყნებმა განიხილონ ისრაელზე თავდასხმა. ირანის მხრიდან შესაძლო საავიაციო იერიშების შესახებ ბოლო დღეებში უამრავი მედიასაშუალება წერდა. ამის თაობაზე აშშ-ის პრეზიდენტმა ჯო ბაიდენმა ირანი სერიოზულად გააფრთხილა.
13 აპრილსს ისრაელის პრემიერ-მინისტრმა ბენიამინ ნეთანიაჰუმ შაბათს საღამოს სატელევიზიო მიმართვაში განაცხადა, რომ ქვეყნის ხელისუფლება მზად იყო ირანის მხრიდან შესაძლო პირდაპირი თავდასხმისთვის.
ისრაელსა და ირანს შორის ურთიერთობა უკიდურესად დაიძაბა მას შემდეგ, რაც ირანული მედიის ცნობით 1 აპრილს ისრაელმა ავიადარტყმა განახორციელა დამასკში, ირანის საელჩოს მახლობლად მდებარე შენობაზე, რის შედეგადაც „ისლამური რევოლუციის გუშაგთა კორპუსის“ შვიდი წევრი დაიღუპა.
ირანის ხელისუფლება დაიმუქრა, რომ შურს იძიებს თავისი ოფიცრების, მათ შორის, IRGC-ის ორი გენერლის დაღუპვის გამო
შეგახსენებთ, ირანის ისლამური რევოლუციის გვარდიის კორპუსის მეთაურმა, ჰოსეინ სალამიმ ასევე განაცხადა, რომ ისრაელის მიერ მის ინტერესებზე და მოქალაქეებზე თავდასხმის შემთხვევაში, თეირანი საპასუხო ქმედებას განახორციელებს.
