მნიშვნელოვანირეგიონისიახლეები

თელავში მუნიციპალური ტრანსპორტი ამუშავდა

თითქმის თერთმეტწლიანი პაუზის შემდეგ, თელავში მუნიციპალური ტრანსპორტი ამუშავდა.

50 მგზავრზე გათვლილი EURO-5 სტანდარტის ავტობუსები საწყის ეტაპზე სატესტო რეჟიმში იმუშავებენ.
ახალი ავტოსადგომიდან ავტობუსების მარშუტზე გასვლას, სახელმწიფო რწმუნებული კახეთში, ირაკლი შიოშვილი ესწრებოდა.

შიოშვილის განმარტებით, სატესტო პირობებში თელაველებისთვის მგზავრობა უფასო იქნება.

” თავდაპირველად, ავტობუსები მგზავრებს უფასოდ მოემსახურებიან. ტრანსპორტი სრულად ადაპტირებულია შეზღუდული შესაძლებლობების მქონე პირებისათვის. ამ თვის ბოლოს თელავი კიდევ 5 ახალ ავტობუსს მიიღებს. წლის ბოლომდე კი სულ 25 ავტობუსი შემოვა და ისინი სოფლებზე გადანაწილდება”- განაცხადა შიოშვილმა.

ავტობუსებისათვის თელავში ჯერჯერობით, ცალკე სამოძრაო ზოლი გამოყოფილი არ არის. ამ ეტაპზე ისინი ქალაქ თელავში, ოთხი მარშუტით, სხვა ტრანსპორტისათვის განკუთვნილ ზოლში იმოძრავებენ.

ავტობუსების მომსახურებისათვის თელავის მუნიციპალიტეტის მერიამ 20 მძღოლი გადაამზადა.
ტრანსპორტის მართვის ღონისძიებებისათვის, თელავის მუნიციპალიტეტის საკრებულომ სატრანსპორტო აიპის შექმნაზე თანხმობა რიგგარეშე სხდომაზე გასცა.

ავტობუსები თელავს 2020 წლის ოქტომბერში, საპარლამენტო არჩევნების წინ გადაეცა.

სამოქალაქო საზოგადოებისა და პოლიტიკური პარტიების წარმომადგენლები, ადგილობრივ თვითმმართველობას, წინასაარჩევნო პიარში, ავტობუსებისათვის საჭირო ინფრასტრუქტურის დაგვიანებით შექმნასა და მარშუტების არქონაში ადანაშაულებდნენ.

EURO-5 -ის სტანდარტის 5 ახალი ავტობუსი თელავმა მუნიციპალური განვითარების ფონდისგან მიიღო.
პროექტი ევროპის რეკონსტრუქციისა და განვითარების ბანკის ფინანსური მხარდაჭერით ხორციელდება და მთელი საქართველოს მასშტაბით, მისი ღირებულება 17 მილიონი ევროა.

მუნიციპალური ტრანსპორტი თელავში, ბოლოს 2008- 2011 წლებში მოძრაობდა.

მსგავსი პოსტები

Back to top button