,,ივანიშვილის დამსახურებაა გრძელვადიანი მშვიდობის დამყარება საქართველოში ჩვენი ხალხი მას მშვიდობისმყოფელს უწოდებს,,-ოცნება

სწორედ ჩვენი ლიდერის, ბატონი ბიძინა ივანიშვილის დამსახურებაა გრძელვადიანი მშვიდობის დამყარება საქართველოში, ამიტომ დამსახურებულად უწოდებს ჩვენი ხალხი მას მშვიდობისმყოფელს – ამის შესახებ ​”ქართული ოცნების” თავმჯდომარე ირაკლი ღარიბაშვილმა, “ქართული ოცნების“ საარჩევნო კამპანიის რეგიონულ ღონისძიებაზე ოზურგეთში, სიტყვით გამოსვლისას განაცხადა.
“ვინ თუ არა გურულებმა იცით მშვიდობის ფასი და მშვიდობის განსაკუთრებული მნიშვნელობა. 2012 წლის 1 ოქტომბრის ისტორიული გამარჯვება სწორედ მშვიდობის გამარჯვება იყო, ვინაიდან სწორედ 1 ოქტომბერს ჩაეყარა საფუძველი ჩვენს ქვეყანაში იშვიათ, ხანგრძლივ და უწყვეტ მშვიდობიან პერიოდს. სწორედ ჩვენი ლიდერის, ბატონი ბიძინა ივანიშვილის დამსახურებაა გრძელვადიანი მშვიდობის დამყარება საქართველოში, ამიტომ დამსახურებულად უწოდებს ჩვენი ხალხი მას მშვიდობისმყოფელს, მშვიდობის მომტანს, ხოლო ჩვენს პარტიას – „ქართულ ოცნებას“, მშვიდობის პარტიას. გურულებს არ გეშლებათ თეთრის და შავის გარჩევა, მშვიდობის პარტიის და ომის პარტიის ამოცნობა, კარგად იცით ვინ არის ომის პარტია და ვინ არის მშვიდობის პარტია, ვინ არის ომის მომტანი, ომის და ქაოსის, ომის და უბედურების, ნგრევის და განადგურების პარტია, ჩაგვრის, უსამართლობის და სიკვდილის პარტია და ვინ არის მშვიდობის, თავისუფლების, სტაბილურობის, განვითარების, ევროკავშირის კანდიდატის სტატუსის, ევროპასთან უვიზო მიმოსვლის მომტანი, მრავალი კეთილდღეობის და ყველა მიმართულებით განვითარების მომტანი პარტია,”- განცხადა ირაკლი ღარიბაშვილმა.

საქართველოს პრემიერ-მინისტრის, ირაკლი კობახიძის განცხადებით „ქართული ოცნება“ 1-ელ ოქტომბერს საზოგადოებას ახალ საარჩევნო პროგრამას წარუდგენს.
მისივე განმარტებით, პროგრამა, რომელსაც პარტია წარადგენს „ერთდროულად იქნება ამბიციურიც და განხორციელებადიც.“
„1-ელ ოქტომბერს საზოგადოებას წარვუდგენთ „ქართული ოცნების“ ახალ საარჩევნო პროგრამას. ეს იქნება ერთადერთი პროგრამა, რომელიც ერთდროულად იქნება ამბიციურიც და განხორციელებადიც. ჩვენი საარჩევნო პროგრამით უზრუნველყოფილი იქნება საქართველოს წინსვლა ყველა მიმართულებით: დაწყებული ეკონომიკური ზრდით და დამთავრებული ჩვენი საგარეო პოლიტიკური პოზიციების გაძლიერებით.
ყოველგვარი განვითარება შეუძლებელია თუ არ გვექნება მშვიდობა და სიმშვიდე ქვეყანაში“, – განაცხადა ირაკლი კობახიძემ.