მნიშვნელოვანიპოლიტიკასაქართველოსიახლეები

ხელისუფლება და ოპოზიცია შეთანხმების მოლოდინშია

ხელისუფლება და ოპოზიცია მოსალაპარაკებლად დღეს კიდევ ერთხელ შეიკრიბება. ინფორმაციას მხარეებს შორის ფასილიტატორი კარლ ჰარცელი ადასტურებს. ევროკავშირის წარმომადგენელი იმედს გამოთქვამს, რომ მოლაპარაკებები კონსენსუსით დასრულდება.

“გუშინ კარგი დისკუსია გვქონდა, შევეხეთ ყველა საკითხს ამ დიალოგის ფარგლებში, ასევე შევძელით გარკვეული პროგრესისთვის მიგვეღწია, გაგვეღრმავებინა გაგება მხარეებს შორის. ამას გავაგრძელებთ დღესაც, ვნახავთ რამდენად შორს შეგვიძლია წავიდეთ ფართო გაგების მისაღწევად,” – განაცხადა კარლ ჰარცელმა.

როგორც ცნობილია, მხარეებს შორის ფასილიტატორი ელჩების მონაწილეობით, დიალოგის მესამე რაუნდი 7 დეკემბერს გაიმართა. მოლაპარაკებების შემდეგ, ოპოზიციის წევრებმა განაცხადეს, რომ მორიგი შეხვედრა შესაძლოა სწორედ 8 დეკემბერს შედგეს. გუშინ გამართული შეხვედრის დეტელებზე დიალოგის მონაწილეებს არ უსაბრიათ.
ოპოზიციაში აცხადებენ, რომ გარკვეული პოზიციების დაახლოება მოხდა.

„ჩვენ გავიარეთ აბსოლუტურად ყველა საკითხი და არის საკითხები, სადაც პოზიციების დაახლოება ხდება, თუმცა ძირითად საკითხებთან დაკავშირებით ჩვენსა და ხელისუფლებას შორის პოზიციების სხვადასხვაობაა. ახლა დღევანდელი დისკუსიის შემდეგ შიდა განხილვები გვექნება. რა თქმა უნდა, აქ საუბარია რიგგარეშე არჩევნებზე და სხვა თემებზე. არის საკითხები სადაც ყველა თანხმდება, რომ ქვეყანაში ფუნდამენტურად შესაცვლელია საარჩევნო გარემო. არის საკითხები რაზეც ვერ ვთანხმდებით – რიგგარეშე არჩევნების საკითხი, პოლიტპატიმრების საკითხი”, – განაცხადა „სტრატეგია აღმაშენებლის“ ლიდერმა გიორგი ვაშაძემ

პოზიტიური მოლოდინები აქვთ “ქართულ ოცნებაში”
პარტიის აღმსრულებელი მდივნის ირაკლი კობახიძეს იმედი აქვს რომ დღევანდელი შეხვედრა უკვე შეთანხმებით დასრულდება

„საინტერესო შეხვედრა გვქონდა განვიხილეთ სხვადასხვა საკითხი. დეტალებზე დღესაც ვერ ვისაუბრებთ, იქიდან გამომდინარე, რომ ასეთ პირობაზე ვართ შეთანხმებული. კიდევ ერთხელ მადლობას ვუხდით ელჩებს, რომლებიც ძალიან დიდ როლს ასრულებენ ამ პროცესში. შეხვედრა, სავარაუდოდ, 8 დეკემბერსაც შედგება. დიდი იმედი გვაქვს ეს პროცესი შეთანხმებით დასრულდება. ყველასთვის ცნობილია, რომ ჩვენთვის წითელი ხაზები არსებობს, ეს წითელი ხაზები უკავშირდება არჩევნებს. რაც შეეხება ოპტიმიზმის საუფუძველს, დროც არ არის ბევრი დარჩენილი, ძალიან დიდი იმედი მაქვს რომ საბოლოოდ, ყველა პოლიტიკური პარტია იმ გადაწყვეტილებას მიიღებს, რომელიც საჭიროა ჩვენი ქვეყნის შემდგომი განვითარებისთვის“ – განაცხადა ირაკლი კობახიძემ

შეგახსენებთ, ოპოზიცია რიგგარეშე არჩევნების ჩატარებას ითხოვს, ვინაიდან 31 ოქტომბრის არჩევნების შედეგებს გაყალბებულად მიიჩნევს და პარლამენტში შესვლაზე უარს ამბობს.

თუ ოპოზიციის მოთხოვნები არ დაკმაყოფილდება და მათი ბოიკოტიც ძალაში დარჩა, დამოუკიდებელი საქართველოს ისტორიაში პირველად ერთპარტიული პარლამენტი შეიკრიბება.

მსგავსი პოსტები

Back to top button