ომბუდსმენი და სამედიცინო ექსპერტთა ჯგუფი მესამე პრეზიდენტის მოსანახულებლად მივიდა

სახალხო დამცველის მიერ შექმნილი სამედიცინო ექსპერტთა ჯგუფი გორის სამხედრო ჰოსპიტალთან საქართველოს მესამე პრეზიდენტის მიხეილ სააკაშვილის მოსანახულებლად მივიდა.

ადგილზე რამდენიმე წუთში უნდა მივიდეს სახალხო დამცველი ნინო ლომჯარიაც.

მისი განმარტებით, დღეს მესამე პრეზიდენტს 7 ექიმი მოინახულებს.
მისი თქმით, ექიმები გაეცნობიან სამედიცინო ჩანაწერებს და გააკეთებენ დასკვნას მიხეილ სააკაშვილისთვის ჩატარებული და ჩასატარებელი მკურნალობის შესახებ.

“მიზანი იგივე არის, რაც წინა შემთხვევაში, ეს არის მორიგი ვიზიტი სახალხო დამცველთან არსებულ ექიმთა ექსპერტთა ჯგუფის, რომელიც ჩაატარებს სამედიცინო შემოწმებას პაციენტის. მოგეხსენებათ ბოლო ვიზიტი ჩვენ 23 ნოემბერს განვახორციელეთ, მას შემდეგ გარკვეული დრო გავიდა, ამიტომ სამედიცინო შემოწმება მოხდება, გაეცნობიან სამედიცინო ჩანაწერებს და შემდგომ, ტრადიციულად ალბათ, იქნება მათი დასკვნა და რეკომენდაციები ჩატარებულ თუ ჩასატარებელ მკურნალობასთან დაკავშირებით” – ამბობს ნინო ლომჯარია.

როგორც სააკაშვილთან შესვლამდე სახალხო დამცველის სამედიცინო კონსილიუმის ერთ-ერთმა წევრმა გიორგი გრიგოლიამ განაცხადა, მათ აინტერესებთ როგორია მიხეილ სააკაშვილის დღევანდელი ჯანმრთელობის მდგომარეობა. სხვა დანარჩენ დეტალებზე კი, როგორც ექიმმა განმარტა, სააკაშვილის მონახულების შემდეგ ისაუბრებს.

„გავრცელდა ინფორმაცია, რომ სააკაშვილის მდგომარეობა გაუარესებულია, უფრო სუსტად არის, ვიდრე რამდენიმე დღის წინ. ასევე გავრცელდა ინფორმაცია, რომ ფსიქოტროპული ნივთიერებების დოზები არის მომატებული. ამ ყველაფრის შესასწავლად მოვედით, რომ ვნახოთ რამდენად შეესაბამება ეს ინფორმაცია სიმართლეს“ , – განაცხადა გრიგოლიამ.

ამ წუთებში მიხეილ სააკაშვილის მოსანახულებლად გორის სამხედრო ჰოსპიტალში მისი პირადი ექიმი, ნიკოლოზ ყიფშიძე და ცენტრ „ემპათიას“ ნევროლოგი, ოთარ თოიძე არიან შესულები.

ცენტრ “ემპათიას” კონსილიუმის მედიკოსმა, ოთარ თოიძემ თქვა, რომ აუცილებელია, მიხეილ სააკაშვილის მკურნალობა გაგრძელდეს მულტიპროფილურ-სპეციალიზებულ დაწესებულებაში, რაც საქართველოში არ არის.

მედიკოსის თქმით, მიხეილ სააკაშვილის მკურნალობა ავსტრიაში ან გერმანიაში უნდა მოხდეს.

იგი ნადმვილად ღებულობდა ისეთ ფსიქოტროპულ მედიკამენტს, რომელიც მას არ უნდა მიეღო თავისი ავადმყოფობიდან გამომდინარე. დანიშნულების მოტივი იყო ძილის შეუძლებლობა. თქვენ გახსოვთ ის, რომ ლაპარაკი იყო ციხის სიტუაციაზე, მერე ლაპარაკი იყო “შმოკებზე”, რომელიც არის ძილის დარღევის ერთ-ერთი ძირითადი მიზეზი პაციენტში, რომელსაც ისედაც ფსიქოლოგიური დაძაბული მდგომარეობა აქვს. საჭიროა მულტირპროფილური, მაგრამ უკვე სპეციალიზირებული დაწესებულება, რომელიც საქართელოში არ გვაქვს. ძირითადი ქვეყნებია ავსტრია და გერმანია, – თქვა ოთარ თოიძემ.

ექიმთა ჯგუფი დღეს მესამე პრეზიდენტის სამედიცინო ისტორიას შეისწავლის და ასევე გაეცნობიან ინფორმაციას იმ ფსიქოტროპულ პრეპარატებთან დაკავშირებით, რომელსაც პაციენტი იღებდა.

ექიმები დაადგენენ მიხეილ სააკაშვილისთვის დანიშნული მედიკამენტების, კეტილეფტის და ქსანაქსის, საჭიროებას.

შეგახსენებთ, ცენტრ ემპათიას დირექტორმა მარიამ ჯიშკარიანმა თქვა, რომ საქართველოს მესამე პრეზიდენტის მიხეილ სააკაშვილის სამედიცინო ბარათში ფსიქოტროპული პრეპარატი ფიგურირებს.

ჯიშკარიანისთვის გაუგებარია, რატომ ფიგურირებს ასეთი პრეპარატი მესამე პრეზიდენტის სამედიცინო ბარათში, რადგან მას ფსიქოზი არ აღენიშნებოდა. მისივე თქმით, საპატიმრო დაწესებულებაში “ფსიქოტროპული პრეპარატების არაადეკვატური გამოყენება ფასდება როგორც ფარმაკოლოგიური წამება”

სამთავრობო კონსილიუმის ექიმი ნინო შარაშენიძე ამბობს, რომ მიხეილ სააკაშვილი პოსტკოვიდური გართულებების გამო მისი ჰოლანდიელი ექიმის დანიშნულ მედიკამენტებს იღებდა და მისთვის წამლების დოზის გადამეტებასთან დაკავშირებით არ არის ცნობილი.

ყოფილი პრეზიდენტი გორის სამხედრო ჰოსპიტალში 50-დღიანი შიმშილობის შემდეგ, გლდანის მე-18 სამედიცინო დაწესებულებიდან 19 ნოემბერს გადაიყვანეს.