ხაზარაძის თქმით მას აქვს გამოცდილება როგორ შექმნას ქვეყანაში სამუშაო ადგილები

ჩვენ ვიცით, როგორც აღმოვფხვრათ 200 000 სამუშაო ადგილის დეფიციტი საქართველოში, რომელიც ეკუთვნის ამ ქვეყანას და ჩვენ თითოეულ მოქალაქეს. ჩვენ უნდა ვიზრუნოთ იმისთვის, რომ ჩვენი ტვინები, ჩვენი შვილები, ჩვენი მუშახელი დასაქმებულნი იყვნენ მაღალანაზღაურებად სამუშაო ადგილებზე საქართველოში. ამიტომ ჩვენ ამ უიმედობას დავამარცხებთ, რომელიც დათესა ბიძინამ და მისმა „ქართულმა ოცნებამ“ და ამ ქვეყანას დავიბრუნებთ, – ამის შესახებ „ლელოს“ ლიდერმა მამუკა ხაზარაძემ ჟურნალისტებს განუცხადა.

მისი თქმით, ყველასთვის ცნობილია, რომ დღეს, ქვეყანაში ყველაზე დიდი პრობლემა არის უმუშევრობა, რომელიც არის ყველაზე დიდი გამოწვევა ქვეყნის ეკონომიკისთვის და მომავლისთვის. მისვე თქმით, „ქართული ოცნება“ თავს იწონებს თავისი ეკონომიკური წარმატებებით, მაგრამ რეალობა არის აბსოლუტურად სხვა, რომელიც აისახება თითოეული მოქალაქის ჯიბეზე.

„სამუშაო ადგილები არის ძალიან ცოტა, დაბალანაზღაურებადი და ძალიან არასტაბილური. ეს იწვევს ქვეყნიდან ძალიან დიდ მიგრაციას და რაც ყველაზე მთავარია ქვეყნიდან გადიან ახალგაზრდები, ჩვენი ოქროს ფონდი, რომელიც პირდაპირ ურტყამს ჩვენ დემოგრაფიას, გადის ინტელექტუალური ძალა და ქვეყანა რეალურად არის გაჩერებული. თუმცა, „ქართული ოცნების“ დაპირება, რომელიც ამბობდა, რომ ქვეყანაში ეკონომიკური წინსვლაა, არის აბსოლუტურად საპირისპირო. ბიძინა ივანიშვილი 2019 წელს, პირდაპირ ამბობდა ღია ეთერში და ჰპირდებოდა ჩვენ მოსახლეობას, რომ შეუძლებელია საქართველოში შეიქმნას მაღალანაზღაურებადი სამუშაო ადგილები. პირდაპირ მოუწოდა ჩვენ მოქალაქეებს, რომ ბილეთები იქნებოდა სუბსიდირებული და მოქალაქეებს უნდა ეშოვათ სამსახური ქვეყნის ფარგლებს გარეთ. სწორედ მათმა პოლიტიკამ შექმნა ქვეყანაში 200 000 სამუშაო ადგილის დეფიციტი, ამ პოლიტიკამ შექმნა ის უზარმაზარი დაშორება რეალურ დასაქმებასა და იმ შესაძლებლობას შორის, რომელიც ჩვენ ქვეყანას დღეს გააჩნია“, – განაცხადა მამუკა ხაზარაძემ.

მისი თქმით, საქართველო ევროკავშირის ყველაზე ღარიბ ქვეყანას ან თურქეთს რომ შეედაროს, დასაქმების მხრივ საქართველოში 200 000 სამუშაო ადგილით მეტი უნდა იყოს და ეს რეალობაა.

„რატომ არ აკეთებს და ვერ აკეთებს ამას „ქართული ოცნება და ბიძინა ივანიშვილი? იმიტომ, რომ მათ დათესეს ქვეყანაში უიმედობა და ნიჰილიზმი, არ აქვთ არანაირი იდეა და რაც ყველაზე მთავარია, ისინი ემსახურებიან რუსეთს და „ლელო“ ემსახურება საქართველოს და ქართულ ინტერესს. ამიტომ, ჩვენ რეალურად შეგვიძლია აღმოვფხვრათ 200 000 სამუშაო ადგილის დეფიციტი ამ ქვეყანაში და ძალიან სწრაფად დავამთავროთ ისეთი პროექტები, როგორიც არის ანაკლია, ანაკლიის ქალაქის მშენებლობა, რომელიც ათეულ ათასობით სამუშაო ადგილს შექმნის, მთელი ქვეყნის მასშტაბით შევქმნათ IT ცენტრები, რომელიც ახალგაზრდებს საშუალებას მისცემს ინოვაციაში ჩაერთონ და შექმნან თავიანთი მომავალი. ჩვენ ევროსტანდარტების შესაბამისად შეგვიძლია განვახორციელოთ „მწვანე ინფრასტრუქტურული პროექტები“ ჩვენ ქვეყანაში, ჩვენ შეგვიძლია განვახორციელოთ ისეთი პროექტები, როგორიც არის ქუთაისის ლოჯისტიკური ცენტრი, თელავის, აჭარის და უამრავი სხვა რამ“, – განაცხადა მამუკა ხაზარაძემ.

ხაზარაძის თქმით, მას აქვს გამოცდილება, როგორ შექმნას ქვეყანაში სამუშაო ადგილები.

„ჩვენ ევროსტანდარტების შესაბამისად შეგვიძლია, განვახორციელოთ მწვანე ინფრასტრუქტურული პროექტები. შეგვიძლია განვახორციელოთ ისეთი პროექტები, როგორებიც არის ქუთაისის ლოგისტიკური ცენტრი, თელავის, აჭარის და უამრავი სხვა რამ. მე და ბადრის გაკეთებული გვაქვს ეს წინა ცხოვრებაში, თუ შეიძლება ასე ითქვას. ჩვენ ათიათასობით სამუშაო ადგილი გვაქვს შექმნილი და ასეულობით კომპანია, როცა ვიყავით კერძო ბიზნესში. ჩვენ ვიცით, როგორ აღმოვფხვრათ 200 ათასი სამუშაო ადგილის დეფიციტი საქართველოში“, – განაცხადა ხაზარაძემ.

ნიკა გვარამიასა და ნიკა მელიას პოლიტიკური გაერთიანება, რომლის შესახებაც განცხადებები გუშინ გაკეთდა, ოფიციალურად, თვის ბოლოს პარტიის სადამფუძნებლო ყრილობაზე გაფორმდება. გადაწყვეტილება მიღებულია – ახალი ერთობა არჩევნებში ერთიანი სიით წარდგება.

“ახალის” “ნაცმოძრაობისგან” იდეოლოგიური დაშორების არ სჯერათ საპარლამენტო ოპოზიციაში. მათი თქმით, ახალი პოლიტიკური გაერთიანება არაფრით განსხვავდება “ნაციონალური მოძრაობისგან” და სახელიც შესაბამისია.

ანალოგიურად ფიქრობენ მმართველ გუნდშიც, სადაც ამტკიცებენ, რომ არავითარი “ახალი” უბრალოდ არ არსებობს და ის ძველი “ნაციონალური მოძრაობის” დესანტია პოლიტიკაში.

“არ გათეთრდება ყორანი. “ლელო”, ჩვენი ყოფილი პრემიერ-მინისტრი გახარია და ა.შ. სულ ყველანი ესენი არიან “ნაციონალური მოძრაობა”. მანევრები თუ ემსახურება იმას, რომ რაღაც შენი ქვეყნის სიკეთეს მიხედო, ქვეყანა წინ წაწიო, ევროპულ მისწრაფებებში დაეხმარო – მისაღებია რა თქმა უნდა, მაგრამ, როდესაც შენ რაღაცა ყალბ ნიღბებს იცვამ და აწყობ ვენეციის მასკარადს, ეს მიუღებელია და ამას ქართველი ხალხი წერტილს დაუსვამს”, – აცხადებს პარლამენტის დიასპორისა და კავკასიის საკითხთა კომიტეტის თავმჯდომარე ბექა ოდიშარია.