,,ხელფასს რამენაირად ავიღებ,,-სანქცირებულ მურუსიძეს სახელფასო ბარათი დაებლოკა

სახელფასო ბარათი დამებლოკა, – ამის შესახებ სააპელაციო სასამართლოს მოსამართლემ, იუსტიციის უმაღლესი საბჭოს წევრმა, ლევან მურუსიძემ განაცხადა დიდი ბრიტანეთის მიერ მის დასანქცირებასთან დაკავშირებით საუბრისას.

მისი თქმით, დიდ ბრიტანეთში წასვლას არ აპირებს.
ამასთან, მურუსიძემ თქვა, რომ „მომაკვდინებელი იქნება“ ბალტიისპირეთის ქვეყნებიც თუ დაუწესებენ სანქციებს.

„მთავარი მომაკვდინებელი რაც იქნება, ბალტიისპირეთის ქვეყნებიც თუ დამიწესებენ ფინანსურ სანქციებს, ალბათ, ეს საერთოდ, ამომაგდებს კალაპოტიდან”, – აღნიშნა მურუსიძემ.
“ერთადერთი, რაც დამებლოკება, ეს არის სახელფასო ბარათი, მაგრამ ხელფასს რამენაირად ავიღებ. ვერ წარმომიდგენია, რომ ხელფასი ვერ ავიღო… სახელფასო ბარათი დამებლოკა, როდის დამებლოკა, რა მნიშვნელობა აქვს, დეტალებია ეს…

სიმართლე გითხრათ, მე დიდ ბრიტანეთში წასვლას არ ვაპირებ… არც ამერიკაში, რა თქმა უნდა, ვერ ჩავალ. ვივლი სოფელში ჩემთან, მზოვრში… მძიმე იქნება სანქციები, უფრო მძიმე და მტკიცე იქნება ჩემი პოზიცია, რომ არსად წასვლას არ ვაპირებ… ყველგან დავდიოდი, მაგრამ ახლა გადავწივიტე, რომ აღარსად აღარ ვიარო.”
საფრანგეთთან დაკავშირებულ კითხვაზე კი მოსამართლემ აღნიშნა: „საფრანგეთს მე პატივს ვცემ, კულტურას, სხვათა შორის. ძალიან მიყვარს ფრანგი მწერლები“.

სასამართლო კლანის წევრი ლევან მურუსიძე ამბობს, რომ დიდი ბრიტანეთის მიერ მისთვის ფინანსური სანქციების დაწესება “მოულოდნელი არაა”.

ის ამტკიცებს, რომ სანქციები უკავშირდება “გარე ძალების სურვილს, რომ საქართველოს სასამართლო სისტემა იყოს გაკონტროლებული” და ირწმუნება, რომ ამას “არაფერი კავშირი არ აქვს კორუფციასთან”.

მურუსიძის მტკიცებით, სანქციებს მისთვის დიდი მნიშვნელობა არ აქვს ფინანსურად, რეპუტაციულად კი “არასასიამოვნოა”.

“რაშიც დასჭირდათ რუმინეთში სასამართლო, რომ არჩევნები გაეუქმებინათ, ასევე სჭირდებათ, რომ საქართველოში, ამ ძალების მიერ გაკონტროლებული იყოს სასამართლო სისტემა, რომ მიიღონ გადაწყვეტილებები, რაც მათ გლობალურ პოლიტიკას დასჭირდება. აქ არაფერი კავშირი არ აქვს კორუფციასთან, ბუნებრივია, აი, რა კორუფცია, რომ საქართველოში 30 წლის განმავლობაში თურმე დიდი ბრიტანეთი იმდენად შეწუხდა ამ მურუსიძის კორუფციით, რომ… რა კორუფცია? […]

მოულოდნელი ჩემთვის არ არის, იქიდან გამომდინარე, რომ აქ არაფერი კავშირი ამას კორუფციასთან არ აქვს, აქ არის საუბარი იმაზე, რომ მოხდეს სასამართლო სისტემის დამორჩილება, გადაწყვეტილებები იქნეს მიღებული, როგორიც არის საჭირო იმ პოლიტიკური მიზნებისთვის, რაც გარე ქვეყნებს აქვთ, სურვილი, რომ საქართველოში განახორციელონ. ერთადერთი რაც მე მაქვს სახელფასო ბარათია, დანარჩენი, რა ვქნათ, რაღაცა იქნება, ხელფასს ხომ ვერ დამიკავებენ, ბოლო ბოლო.

საუბარია იმაზე, რომ აი, ხომ ხედავთ, ჩვენ ურჩ მოსამართლეებს, რომლებიც ჩვენ არ გვემორჩილება და არ არის იმ კალაპოტში, რომელიც ჩვენ გვინდა, ხომ, აი, რას ვუკეთებთ, აი ასე გაგიკეთებთ ყველა მოსამართლეს, რომელიც კანონიერ გადაწყვეტილებას კი არ მიიღებთ, რომელიც არ დაემორჩილებით ჩვენს დირექტივას. […] ჩემთვის ახლა ამას ფინანსურად, სიმართლე გითხრათ, დიდი ის არ ექნება, უბრალოდ, ზოგადად, რეპუტაციულად და რაღაც, რა თქმა უნდა, სასიამოვნო არ არის, დიდი ბრიტანეთია ხო, მაინც”, – ამბობს სანქცირებული მურუსიძე.

დღეს, 2 აპრილს დიდმა ბრიტანეთმა ლევან მურუსიძეს და მიხეილ ჩინჩალაძეს ფინანსური სანქციები დაუწესა.

სასამართლო კლანის წევრები დიდი ბრიტანეთის გლობალური ანტიკორუფციული სანქციების ფარგლებში მოექცნენ.

მათ დიდი ბრიტანეთის ტერიტორიაზე არსებული ყველა სახის ქონება გაეყინებათ, ასევე საბანკო ანგარიშები.

დოკუმენტის თანახმად, მიხეილ ჩინჩალაძ და ლევან მურუსიძე ჩართული იყვნენ სერიოზულ კორუფციულ საქმიანობაში, არაჯეროვნად ასრულებდნენ თავის საქმიანობას და იყენებდნენ საკუთარ გავლენას ქართული ოცნების სასარგებლო გადაწყვეტილებების მისაღებად.

ბრიტანეთის სანქციები ეხება გირვანქა სტერლინგს;
დაზუსტებით შეიძლება თქმა, რომ ლევან მურუსიძე სანქცირების წუთიდან ვერ მოახერხებს ბრიტანულ ვალუტაში ტრანზაქციების განხორციელებას.
თუმცა, ეს არ ნიშნავს, რომ თუკი მას ამ ვალუტაში ჰქონდა თანხა შენახული, დაეკარგება.
ასეთ დროს, კომერციულ ბანკებში ხდება საბანკო ანგარიშზე ნაშთის განულება;
ამასთან, ცალკეული ბანკები საკუთარი რისკების ანალიზის შედეგად წყვეტენ, გააგრძელონ თუ არა სანქცირებული პირის მომსახურება სხვა ვალუტაში, მათ შორის, ლარში, ევროსა თუ დოლარში.
აშშ-ს მურუსიძისათვის ფინანსური სანქციები არ დაუწესებია – მას სავიზო სანქციები აქვს 2023 წლის 5 აპრილიდან. ფინანსური სანქციები არ დაუწესებია არც ევროკავშირს.