ხმაური და კვერცხების სროლა თელავში
ხმაურია თელავის მუსიკალურ სასწავლებელთან, სადაც ვალერი კვარაცხელიას „სახალხო მოძრაობა სოციალისტური საქართველოს“ კახეთის რეგიონული ორგანიზაციის დამფუძნებელი ყრილობა მიმდინარეობს.
შენობაში შეკრებილები არიან მოძრაობის მხარდამჭერები, რომლებიც მედიასთან რუსეთის მხარდამჭერ განცხადებებს აკეთებენ და ამბობენ, რომ რუსეთი საქართველოს მეგობარია და მისი მთავარი პარტნიორი უნდა იყოს.
გარეთ კი შეკრებილები არიან მოქალაქეები და „ახალი პოლიტიკური ცენტრი გირჩისა“ და „სამოქალაქო პლატფორმა ახალი საქართველოსთვის“ მხადამჭერები, რომლებიც სირცხვილის კორიდორის მოწყობას გეგემავენ.
„სოციალისტური საქართველოს“ წარმომადგენლებს კვერცხებიც დაუშინეს. მხარეებს შორის სიტყვიერი დაპირისპირებაც მოხდა.
ამასთან, „სახალხო მოძრაობა სოციალისტური საქართველოს“ თავმჯდომარის, ვალერი კვარაცხელიას მიერ თელავში დაგეგმილი ღონისძიების გამო, სახელმწიფო უსაფრთოხების სამსახურმა შს სამინისტროს მიმართა.
როგორც მიმართვაშია აღნიშნული, სახელმწიფო უსაფრთხოების სამსახურში არსებულმა, საქართველოს კანონით (“თავისუფლების ქარტი“) განსაზღვრულმა კომისიამ წერილობით მიმართა შინაგან საქმეთა სამინისტროს, 2016 წლის 4 აგვისტოს ქალაქ თელავში ააიპ „სახალხო მოძრაობა სოციალისტური საქართველოს“ მიერ დაგეგმილ ღონისძიებასთან დაკავშირებით, სადაც ორგანიზაციის მხრიდან შესაძლოა, გამოყენებული იქნეს კომუნისტური ტოტალიტარული სიმბოლიკა.
„კომისია მიმართავს შსს-ს, საქართველოს კანონმდებლობის მიზნებიდან გამომდინარე, უზრუნველყოს კომუნისტური ტოტალიტარული იდეოლოგიის საფუძვლების გაღვივების წინააღმდეგ შესაბამისი პრევენციული ღონისძიებების განხორციელება და მიიღოს სათანადო ზომები. კომისიამ ასევე გაუგზავნა მიმართვა ააიპ „სახალხო მოძრაობა სოციალისტური საქართველოს“ თავმჯდომარე ვალერი კვარაცხელიას, რათა კანონის მე-7 მუხლის მე-6 პუნქტის მოთხოვნების შესაბამისად, ზემოაღნიშნულ საჯარო ღონისძიებაში არ დაუშვას და აღმოფხვრას კომუნისტური ტოტალიტარული სიმბოლიკის გამოყენება, წინააღმდეგ შემთხვევაში გამოყენებული იქნება საქართველოს კანონმდებლობით გათვალისწინებული პასუხისმგებლობის ზომები“,-ნათქვამია სახელმწიფო უსაფრთოხების სამინისტროს მიერ გავრცელებულ ინფორმაციაში.
