კრემლი შავ ზღვაში ცეცხლის შეწყვეტის პირობად სანქციების მოხსნას ასახელებს

კრემლი განცხადებას ავრცელებს და აცხადებს, რომ აშშ და რუსეთი შავ ზღვაში ცეცხლის შეწყვეტაზე შეთანხმდნენ.
პარალელურად, პირობას ასახელებს და აცხადებს, რომ შავ ზღვაში ცეცხლის შეწყვეტაზე შეთანხმება მას შემდეგ შევა ძალაში, როცა დასავლეთი რიგი რუსული ბანკებიდან ფინანსურ სანქციებს მოხსნის და მათ SWIFT-ის ფინანსურ სისტემაში დააბრუნებს.
რუსეთის მოთხოვნაა: Россельхозбанк-სთვის და სხვა საფინანსო ორგანიზაციებისთვის სანქციების მოხსნა, რომლებიც უზრუნველყოფენ, კერძოდ, აწარმოებენ და ექსპორტზე გააქვთ საკვები პროდუქცია და სასუქები, ასევე, მათი დაკავშირება SWIFT-თან.
კრემლის განცხადება მნიშვნელოვნად განსხვავდება აქამდე თეთრი სახლის მიერ გამოქვეყნებული განცხადებისგან, რომელშიც აღნიშნულია, რომ “შეერთებული შტატები და რუსეთი შეთანხმდნენ შავ ზღვაში უსაფრთხო ნავიგაციის უზრუნველყოფაზე, ძალის არგამოყენებაზე, და სამხედრო მიზნებისთვის კომერციული გემების გამოყენების აღკვეთაზე”. კერძოდ, თეთრი სახლის განცხადებაში აღნიშნულ პუნქტს წინაპირობები არ ახლავს. კრემლის განცხადებაში კი ნათქვამია, რომ აღნიშნული პუნქტი ძალაში შემდის მას შემდეგ, რაც ოთხი პირობა იქნება დაკმაყოფილებული:
“სასანქციო შეზღუდვების მოხსნა “როსსელხოზბანკის” და სხვა საფინანსო ორგანიზაციებისთვის, რომლებიც ჩართულები არიან სურსათით (მათ შორის თევზეულით) და სასუქით საერთაშორისო სავაჭრო ოპერაციების უზრუნველყოფაში, მათი ჩართულობა SWIFT-თან, აუცილებელი საკორესპონდენციო ანგარიშების გახსნა;
სავაჭრო დაფინანსების ოპერაციების განხორციელებაზე შეზღუდვების მოხსნა;
სასანქციო შეზღუდვების მოხსნა პორტებში გემების მომსახურებაზე და რუსეთის დროშის ქვეშ მყოფ გემებზე, რომლებიც ჩართულნი არიან სურსათით (მათ შორის თევზეულით) და სასუქით ვაჭრობაში;
შეზღუდვების მოხსნა რუსეთის ფედერაციაში სასოფლო-სამეურნეო ტექნიკის მიწოდებაზე, ასევე სხვა საქონლის, რომელიც გამოიყენება სურსათის (მათ შორის თევზეულის) და სასუქის წარმოებაში,” – ნათქვამია განცხადებაში.
გუშინ, 24 მარტს ერ-რიადში ამერიკელმა და რუსმა წარმომადგენლებმა 12-საათიანი მოლაპარაკება ჩაატარეს, 23 მარტს კი აშშ-ის დელეგაცია უკრაინელ კოლეგებს შეხვდა.
შეხვედრის შემდეგ განცხადება თეთრმა სახლმა დღეს, 25 მარტს გამოაქვეყნა. თეთრი სახლის განცხადებით, რუსეთი და უკრაინა შავ ზღვაში ცეცხლის შეწყვეტაზე შეთანხმდნენ.
კერძოდ, განცხადების თანახმად, რუსეთი და უკრაინა შეთანხმდნენ, უზრუნველყონ კომერციული გემების უსაფრთხო დერეფანი და შეწყვიტონ სამხედრო დარტყმები შავ ზღვაში.
განცხადების თანახმად, აშშ და უკრაინა შეთანხმდნენ, უზრუნველყონ უსაფრთხო ნავიგაცია, აღმოფხვრან ძალის გამოყენება და აღკვეთონ კომერციული გემების სამხედრო მიზნებისთვის გამოყენება შავ ზღვაში.
გარდა ამისა, თეთრი სახლის განცხადებაში ვკითხულობთ, რომ კიევი და ვაშინგტონი შეთანხმდნენ ზომების შემუშავებაზე, რომლებიც კრძალავს თავდასხმებს რუსეთის ფედერაციისა და უკრაინის ენერგეტიკულ ინფრასტრუქტურაზე.
“აშშ და რუსეთი გააგრძელებენ მუშაობას გრძელვადიანი და ხანგრძლივი მშვიდობის მისაღწევად. […] მიესალმებიან მესამე ქვეყნებს საზღვაო და ენერგეტიკული შეთანხმებების განხორციელების მხარდაჭერაში”, – ვკითხულობთ განცხადებაში.