კუპატაძე „კრიმპოლიდან“ დაცვის პოლიციაში, სირაძე პოლიციის დეპარტამენტში – საკადრო ცვლილებები შსს-ში
შინაგან საქმეთა სამინისტროში საკადრო ცვლილებები განხორციელდა – სამინისტროს პრესცენტრი ვაჟა სირაძეზე ინფორმაციას ადასტურებს და სხვა საკადრო ცვლილებებსაც ასახელებს.
მანამდე შინაგან საქმეთა სამინისტროს ვებსაიტზე მიუთითეს, რომ ვაჟა სირაძე, – რომელიც ევროკავშირის წევრი ოთხი ქვეყნის მიერ არის სანქცირებული, – აღარ იკავებს საპატრულო პოლიციის დეპარტამენტის დირექტორის პოსტს.
აღნიშნული დეპარტამენტის გარდა, უწყებაში 10 საკადრო ცვლილება განხორციელდა:
შსს-ის განცხადების თანახმად, საკადრო ცვლილებები ასე გამოიყურება:
ცენტრალური კრიმინალური პოლიციის („კრიმპოლის“) დეპარტამენტის დირექტორი თეიმურაზ კუპატაძე დანიშნეს დაცვის პოლიციის დეპარტამენტის თავმჯდომარედ; დაცვის პოლიცია შსს-ის სსიპ-ია;
“კრიმპოლის” დირექტორად დაინიშნა კუპატაძის მოადგილე დავით კიკნაძე;
ვაჟა სირაძე, რომელიც 2019 წლიდან საპატრულო პოლიციის უფროსი იყო, თბილისის პოლიციის დეპარტამენტის დირექტორი გახდა;
სირაძის ნაცვლად საპატრულო პოლიციის უფროსის პოსტს დაიკავებს ლევან მაისურაძე, – რომელიც აქამდე თბილისის პოლიციის დეპარტამენტის დირექტორის მოადგილე იყო;
სირაძემ ჩაანაცვლა ლაშა გოგნიაშვილი – თავად გოგნიაშვილი კი დაინიშნა კახეთის პოლიციის დეპარტამენტის დირექტორად.
ლაშა გოგნიაშვილი 5 აპრილს დანიშნეს თბილისის პოლიციის დეპარტამენტის დირექტორად – მან თანამდებობაზე ერთ თვეზე ოდნავ მეტი დაჰყო. მანამდე ის გურიის პოლიციის დეპარტამენტის დირექტორი იყო.
ამასთან, ცვლილებებია შსს-ის რეგიონული ხელმძღვანელების შემადგენლობაშიც. კერძოდ:
კახეთის პოლიციის დეპარტამენტის აწ უკვე ყოფილი დირექტორი თეიმურაზ კალანდაძე გადაიყვანეს მცხეთა-მთიანეთში;
ქვემო ქართლის პოლიციის დეპარტამენტის დირექტორად დაინიშნა ლევან კვიციანი;
ქვემო ქართლის პოლიციის დეპარტამენტის დირექტორი გურამ ნაცვლიშვილი დაინიშნა სამცხე-ჯავახეთის პოლიციის დეპარტამენტის დირექტორად;
სამცხე-ჯავახეთის პოლიციის დეპარტამენტის დირექტორი რამაზ თათარაშვილი დაინიშნა იმერეთის პოლიციის დეპარტამენტის დირექტორად;
იმერეთის პოლიციის დეპარტამენტის დირექტორი ზაზა ცხაკაია დაინიშნა გურიის პოლიციის დეპარტამენტის დირექტორად;
შიდა ქართლის პოლიციის დეპარტამენტის დირექტორად დაინიშნა თბილისის პოლიციის დეპარტამენტის დირექტორის მოადგილე კახაბერ მურადაშვილი.
შინაგან საქმეთა სამინისტრო აცხადებს, რომ უწყებაში მიმდინარე საკადრო ცვლილებები „სისტემის კიდევ უფრო მეტად გაძლიერებასა და განვითარებას ემსახურება“.
