რუსეთის საგარეო საქმეთა მინისტრმა სერგეი ლავროვმა გამოცემა РБК-სთან ინტერვიუში საქართველოში ინიცირებული ლგბტ უფლებების შემზღუდავ კანონზე ისაუბრა და თქვა, რომ კანონი საქართველოს საზოგადოების ინტერესშია. ის ასევე შეეხო „აგენტების კანონს“ და თქვა, რომ ის საფრანგეთში, პოლონეთსა და აშშ-ში მოქმედ კანონებთან შედარებით რბილია.
„ის რასაც საქართველოს ხელისუფლება აკეთებს ეს მათი ეროვნული იდენტობის გაცნობიერება და გაგებაა, რომ ქართველ ხალხს აქვს იგივე ფასეულობები მართლმადიდებლობის, ეროვნული კულტურის, რომელიც, წაიშლება და თავის თავზე მოირგებს დასავლეთი „წესებით“, რომელსაც ყველას უწესებს, უპირველეს ყოვლისა, ლიბერალური დემოკრატიის ან, თუ გნებავთ, დემოკრატიული ლიბერალიზმის ღირებულებების კონტექსტში. ქართველებს ეს არ აწყობთ. ისევე, როგორც არ აწყობთ ლგბტ დღის წესრიგის აღვირახსნილი თავსმოხვევა “, – ციტირებს ლავროვის სიტყვებს РБК.
მან კომენტარი გააკეთა საქართველოს მთავრობასა და პრეზიდენტს შორის არსებულ ურთიერთობაზეც.
„ის [სალომე ზურაბიშვილი] 2004 წლის შემდეგ, როცა საფრანგეთის საგარეო საქმეთა სამინისტროს თანამშრომელი იყო, სააკაშვილის მიერ მიწვეული იყო საქართველოს საგარეო საქმეთა მინისტრის პოსტზე. 2005 წელს ზუსტად მასთან გავაფორმეთ შეთანხმება დარჩენილი ორი რუსული ბაზის გაყვანის შესახებ. ბათუმში ბაზაზე მოლაპარაკებებისა შეთანხმდა რამდენიმე ასეული ადამიანის მონაწილეობით ქართულ- რუსული ანტიტერორისტული ცენტრის შექმნა. 80% ქართველი სამხედრო მოსამსახურე და ძალოვან, დანარჩენი რუსეთის წარმომადგენლები იქნებოდნენ. იყო ასეთი კარგი შესაძლებლობა კეთილად დაგვეხურა ეს თემა, მეგობრული კოოპერაციით ტერორიზმთან ბრძოლის ამ ძალიან, ძალიან მნიშვნელოვან სფეროში, რომელიც მაშინ აქტიურად იმაღლებდა ხმას. ჩვენ ყველაფერი კეთილსინდისიერად შევასრულეთ, როგორც ამას ვაკეთებთ ყოველთვის, სააკაშვილის მთავრობამ კი არ შეასრულა ჩვენთან შეთანხმება – ანტიტერორისტული ცენტრი არ შექმნილა“ – განაცხადა მორიგ ჯერზე ლავროვმა.
შემდეგ მან დაამატა, რომ “ქართული მაგალითი საჩვენებელია: სულ უფრო და უფრო მეტ ქვეყანას ესმის, რომ ესაა ლიბერალური დემოკრატიის ძაბრი, სადაც იწოვს მათ დასავლეთი, ეწინააღმდეგება მათ ფესვებს, ტრადიციებსა და წინაპრებს, სწორედ ამ ტრადიციების განადგურება სურს დასავლეთს, დავიწყებას მიეცეს და ჩაანაცვლოს თავისი არატრადიციული ღირებულებებით, რისი დახმარებითაც თავისი ჰეგემონიის შენარჩუნების იმედი აქვს“.
რუსეთის საგარეო საქმეთა მინისტრი “ოცნებას” ანტიდასავლურ პოლიტიკას უწონებს და დემოკრატიული ლიბერალიზმიდან მკვეთრად გადახვევას “სამაგალითო საქციელს” უწოდებს.
ოპოზიციაში აცხადებენ, რომ რუსეთი ახალს არაფერს აკეთებს, უბრალოდ ახლა მისი მოკავშირე ამ ქვეყნის ხელისუფლების სათავეში მყოფი ბიძინა ივანიშვილია და სწორედ ამიტომ ახალი რუსული ექსპანსიის ტალღას ვადევნებთ თვალს, სადაც მთავარ როლში უკვე “ქართული ოცნებაა” .
ქართული ოცნების ხელისუფლებისთვის ის ფაქტი,რომ კრემლთან უნისონში მოქმედებენ და საუბრობენ პრობლემას არ წარმოადგენს, ივანიშვილის გუნდი სიამაყით ამბობს იმასაც, რომ დასავლელ პარტნიორებთან შეხვედრებზე არ მიდიან.
ჩვენს იდენტობას ვიცავთ და ამას ლავროვი იტყვის თუ პავილიონისი, მნიშვნელობა არ აქვს, იმ გზით მივდივართ, რაც ახალ თაობას სჭირდება, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.
გია ვოლსკის რუსეთის საგარეო საქმეთა მინისტრის, სერგეი ლავროვის მიერ გაკეთებული განცხადების შესახებ დაუსვეს კითხვა, რომელშიც ლავროვი ამბობს, რომ „თანამედროვე ქართული ხელმძღვანელობის პოლიტიკა დაკავშირებულია ეროვნული ქართული იდენტობის გაცნობიერებასა და ლიბერალური დემოკრატიის ღირებულებების მავნებლობის გააზრებასთან“.
„განზრახ ისეთი თემის შემოგდება ხდება, რაც ლოგიკურ ახსნას ექვემდებარება. რუსეთი რა განცხადებასაც აკეთებს, ყოველთვის იქიდან გამოდის, რა ინტერესი აქვს. შეიძლება, ერთი განცხადება გააკეთოს, მეორენაირად იმოქმედოს და ამის ბევრი მაგალითია. მთავარია, ჩვენ რა განცხადებას ვაკეთებთ და ამ ქვეყანას როგორ ვუყურებთ. საქართველოში მავნებლების დიდი ბუდეა თავიანთი მედიასაშუალებებით და ცდილობენ, საზოგადოებას ჭკუა აურიონ: ვინაიდან ლავროვმა თქვა, რომ საქართველო თავის იდენტობას იცავს, ე.ი. იდენტობის დაცვა ცუდია. ჩვენს იდენტობას ვიცავთ და ამას ლავროვი იტყვის თუ პავილიონისი, მნიშვნელობა არ აქვს, ჩვენ იმ გზით მივდივართ, რაც ახალ თაობას სჭირდება“, – განაცხადა გია ვოლსკიმ.
არასწორი ნაბიჯი რომ გადაგვედგა და ქვეყნის ეროვნული ინტერესებიდან არ გამოვსულიყავით, ისეთ მდგომარეობაში ვიქნებოდით, რაშიც, სამწუხაროდ, უკრაინაა. „ვაშინგტონ პოსტის“ რედაქტორი უკრაინის მაღალჩინოსნების განცხადებებს კარგად გაეცნოს, – ამის შესახებ საპარლამენტო უმრავლესობის წევრმა, ლევან მაჭავარიანმა განაცხადა.
მაჭავარიანს კითხვა დაუსვეს რუსეთის საგარეო საქმეთა მინისტრის, სერგეი ლავროვის განცხადების შესახებ, რომელშიც ლავროვი ამბობს, რომ „თანამედროვე ქართული ხელმძღვანელობის პოლიტიკა დაკავშირებულია ეროვნული ქართული იდენტობის გაცნობიერებასთან და ლიბერალური დემოკრატიის ღირებულებების მავნებლობის გააზრებასთან“.
„ჩემთვის მნიშვნელობა არ აქვს, თეთრზე შავს მეტყვის ჩრდილოელი, სამხრეთელი, დასავლელი თუ აღმოსავლელი. არასოდეს დავიჯერებ, რომ თეთრი შავია და ორჯერ ორი ხუთია. „ვაშინგტონ პოსტის“ რედაქტორს შევახსენებ მეორე ფრონტის თაობაზე. დახურულ კარს მიღმა ისეთი საუბრები იყო, რისი გარეთ გამოტანის უფლება, ქვეყნის ინტერესებიდან გამომდინარე, არ მაქვს, მაგრამ კარგად გახსოვთ უკრაინის მაღალჩინოსნების პირდაპირი მოწოდებები – უშიშროების საბჭოს მდივნიდან დაწყებული, რომელი ერთით დამთავრებული. პირდაპირ მოგვიწოდებდნენ, მეორე ფრონტი გაგვეხსნა, თითქოს ამით ტერიტორიებს დავიბრუნებდით. გახსოვთ, როგორი შეურაცხმყოფელი განცხადებები იყო. არასწორი ნაბიჯი რომ გადაგვედგა და ქვეყნის ეროვნული ინტერესებიდან არ გამოვსულიყავით, ავმჩატებულიყავით, ეს როგორც „ნაცმოძრაობას“ სჩვევია, ისეთ მდგომარეობაში ვიქნებოდით, რაშიც, სამწუხაროდ, უკრაინა არის. „ვაშინგტონ პოსტის“ რედაქტორი უკრაინის მაღალჩინოსნების განცხადებებს კარგად გაეცნოს“, – განაცხადა ლევან მაჭავარიანმა.
……………………
4 სექტემბერს პარლამენტის პლენარულ სხდომაზე მე-2 მოსმენით, 81 ხმით, ნულის წინააღმდეგ, მიიღეს „ქართული ოცნების“ ჰომოფობიური კანონპროექტების პაკეტი, რომელიც ლგბტ ადამიანების უფლებების შეზღუდვას ითვალისწინებს. „ოჯახური ღირებულებებისა და არასრულწლოვანის დაცვის შესახებ“, კანონპროექტთა პაკეტი 18 მოქმედ კანონში ცვლილებას ითვალისწინებს.
ლგბტ უფლებების შემზღუდავი კანონპროექტი პარლამენტში 2024 წლის 10 ივნისს დარეგისტრირდა და ოჯახური ღირებულებების დაცვის სახელით უფლებებისა და თავისუფლებების შეზღუდვას ითვალისწინებს. ამას წინ უძღოდა „ფსევდოლიბერალური პროპაგანდის წინააღმდეგ“ საკანონმდებლო ცვლილების დაანონსება.
ეს კანონი „ქართული ოცნების“ პოლიტიკური განცხადებებისა და 2024 წლის საპარლამენტო არჩევნების წინ საარჩევნო კამპანიის მთავარი ხაზია. კანონპროექტის დამტკიცებას მმართველი პარტია, საშემოდგომო სესიაზე სექტემბრის ბოლომდე გეგმავს.
პროექტი, მათ შორის, გულისხმობს ცვლილებას „სიტყვისა და გამოხატვის თავისუფლების შესახებ“ საქართველოს კანონში. დღეს მოქმედი კანონმდებლობით, შესაძლოა დაწესდეს სიტყვისა და გამოხატვის შინაარსობრივი რეგულირება, თუ ის ეხება, მაგალითად, ცილისწამებას, პირისპირ შეურაცხყოფას, დანაშაულის ჩადენისკენ წაქეზებას, უხამსობას და ა.შ.
ცვლილებების შემდეგ – დაუშვებელი ხდება „საჯაროდ ისეთი შეკრება ან/და მანიფესტაციის ჩატარება, რომელიც მიმართულია ადამიანის თავისი ბიოლოგიური სქესისგან განსხვავებული სქესისთვის მიკუთვნების, ერთი და იმავე ბიოლოგიური სქესის წარმომადგენლებს შორის სექსუალური ორიენტაციის ნიშნით გამოხატული ურთიერთობის ან ინცესტის პოპულარიზაციისკენ“.
გაზაფხულზე პარლმენტმა “აგენტების კანონი” მიიღო, რის გამოც საქართველოს დახმარების ნაწილი შეუწყვიტეს ევროკავშირმა და აშშ-მა. აშშ-მა.საქართველოს პარტნიორები აცხადებენ, რომ „აგენტების კანონი“ ხელს უშლის ქვეყნის ევროინტეგრაციას.
“აგენტების კანონის” წინააღმდეგ საკონსტიტუციო სასამართლოში ოთხი სარჩელი შევიდა.
მათი ავტორები არიან:
საქართველოს პრეზიდენტი,
100-ზე მეტი არასამთავრობო ორგანიზაცია,
საპარლამენტო ოპოზიცია
ჟურნალისტები.
საკონსტიტუციო სასამართლომ ოთხივე სარჩელი გააერთიანა. მოსარჩელეები საკონსტიტუციო სასამართლოს სთხოვენ გააუქმოს კანონი, რომელიც, ამ სარჩელების მიხედვით, საქართველოს სამოქალაქო საზოგადოებას, დამოუკიდებელ მედიასა და ქვეყნის ევროინტეგრაციას აზიანებს და საბოლოო გადაწყვეტილებამდე სადავო ნორმის მოქმედება შეაჩეროს.
