“ლელოს” ლიდერის ინიციატივა

ლელოს ლიდერი მამუკა ხაზარაძე მიიჩნევს, რომ საქართველოსა და რეგიონში ბოლო დროს განვითარებული მოვლენებიდან გამომდინარე აუცილებელია ეროვნული კონსოლიდაციის მძლავრი პლატფორმის შექმნა.

ხაზარაძე facebook-ზე წერს, რომ ქვეყანა ეგზისტენციური საფრთხის წინაშე დგას და ამ ინიციატივის ფარგლებში სამ ნაბიჯს ასახელებს, მათ განსახორციელებლად კი დაინტერესებულ მხარეებს მრგვალი მაგიდის ფორმატში იწვევს.

“საქართველოსა და რეგიონში ბოლო პერიოდში განვითარებული მოვლენები ცხადყოფს, რომ ჩვენი ქვეყანა ეგზისტენციური საფრთხის წინაშე დგას. სოციალურ-ეკონომიკურ პრობლემებს ემატება რუსეთის, ოკუპანტი სახელწიფოს მძლავრი გავლენა, რომელსაც ქვეყნის 20 % აქვს ოკუპირებული. მეხუთე კოლონა, რომელსაც საქართველოში ფესვები შეუზღუდავად აქვს გადგმული და გადასულია საქართველოს დამოუკიდებლობის ხელყოფაზე. ღიად პრორუსული ძალები და ძალადობრივი ჯგუფები, რომლებიც ხელისუფლებისა თუ სხვადასხვა საზოგადოებრივ პლატფორმებზე არიან მოკალათებული, დაუფარავად ცდილობენ საქართველო რუსეთის ორბიტაზე დააბრუნონ.

ბიძინა ივანიშვილის “ქართული ოცნების” მიერ წარმოებული პოლიტიკური პროცესი დიდი ხანია ეროვნულ ინტერესებთან წინააღმდეგობაში მოდის და ჩვენი ქვეყნის ეროვნულ სტრატეგიულ ხაზებს კვეთს.

ამ ვითარებიდან გამომდინარე, საქართველოს ინტერესებისთვის გადაუდებლად მიმაჩნია ეროვნული კონსოლიდაციის, “ეროვნული უსაფრთხოებისა და ეკონომიკის” მძლავრი პლატფორმის შექმნა, რომლის ფარგლებშიც მოხდება:

1. საქართველოში აშშ-ს სამხედრო ობიექტების განლაგება და ამ მიმართულებით ქმედითი ნაბიჯების გადადგმა, როგორც საკანონმდებლო ასევე ეკონომიკური კუთხით.

2. აშშ-სთან თავისუფალი ვაჭრობის ხელშეკრულების სწრაფად ამოქმედება, რომელიც საქართველოს ეკონომიკას და მის მოქალაქეებს მისცემს სწრაფი ეკონომიკური ზრდის საშუალებას.

3. “ლუსტრაციის კანონი” – ეროვნული კონსოლიდაციისა და სუვერენიტეტის დაცვის აქტის მიღება – მტრული სახელმწიფოების სამსახურში მყოფი საქართველოს მოქალაქეების გამოსავლენად.

ამ საკითხებთან დაკავშირებით ყველა დაინტერესებულ მხარეს გიწვევთ მრგვალი მაგიდის ფორმატში ამ და სხვა საკითხების საფუძვლიანად მოსამზადებლად და განსახორციელებლად”, -წერს ხაზარაძე.

როგორც ის აღნიშნავს, ეროვნული უსაფრთხოება და ეკონომიკის სწრაფი განვითარება უნდა იყოს ქვეყნის ნომერ პირველი ამოცანა.

“ჩვენ, საქართველოს მოქალაქეებს, გვჭირდება ეროვნული ძალების კონსოლიდაცია, დასავლელ პარტნიორებთან და მოკავშირეებთან ინტენსიური მუშაობა ამ მიზნების მისაღწევად და რეალურ ცხოვრებაში განსახორციელებლად. საქართველოს აქვს შანსი გახდეს ძლიერი ეროვნულ ფასეულობებზე დაფუძნებული თანამედროვე სახელმწიფო, რომელიც მიმზიდველი იქნება ცივილიზებული სამყაროსთვის, როგორც სანდო მოკავშირე და პარტნიორი”, – ამბობს მამუკა ხაზარაძე.

ხაზარაძის ინიციატივას გამოხმაურებებიც მოყვა

“სტრატეგია აღმაშენებელში” ამბობენ, რომ ინიციატივას მხარს უჭერენ, თუმცა, ლუსტრაციის კანონის პრაქტიკული განხორციელება ცოტა რთულად ესახებათ.

“თავისუფალი ვაჭრობა და ამერიკული ბაზები ჩვენი პარტიის პრიორიტეტიც არის და ყველა პროდასავლური პარტიის პრიორიტეტია. ამიტომ, აქ ერთიანები ვართ მთლიანად პროდასავლური ოპოზიცია. ლაპარაკია იმაზე, რომ, რა თქმა უნდა, სინერგია უნდა იყოს ჩვენს ქმედებებში. 

რაც შეეხება ლუსტრაციის კანონს – თავის დროზე, ძალიან მნიშვნელოვანი იქნებოდა. არქივების უდიდესი ნაწილი, 2/3-ზე მეტი, თავის დროზე, 30 წლის წინ, უკვე გატანილია რუსეთის უშიშროების მიერ საქართველოდან, ამიტომ, პრაქტიკულად ამის განხორციელება, ვფიქრობ, ძნელი იქნება,”- აცხადებს “სტრატეგია აღმაშენებლის” წევრი სერგო ჩიხლაძე.

“ქართული ოცნების” ერთ-ერთმა ლიდერმა, მიხეილ სარჯველაძემ “ლელოს” ლიდერის, მამუკა ხაზარაძის ინიციატივას “პოლიტიკაში თავის დამკვიდრების მორიგი მცდელობა” უწოდა.

მან, ასევე, აღნიშნა, რომ მსგავსი ინიციატივების განსახორციელებლად გაცილებით ეფექტური გზები არსებობს, მათ შორის, საპარლამენტო მექანიზმების გამოყენებით.

“ქართული ოცნებიდან” მიხეილ სარჯველაძის ხმა