საქართველოში ბიძინა ივანიშვილის მკვლელობა მზადდებოდა-სუს

სახელმწიფო უსაფრთხოების სამსახურის მტკიცებით, ხელისუფლების ყოფილი მაღალჩინოსნები ქართული ოცნების დამფუძნებლის, ბიძინა ივანიშვილის მკვლელობასა და ხელისუფლების დამხობას გეგმავდნენ. როგორც უწყების განცხადებაში წერია, გამოძიება ტერორისტული აქტის მომზადებისა და სახელმწიფო ხელისუფლების დასამხობად შეთქმულების მუხლებით მიმდინარეობს.

დღეს სუსმა განცხადების გავრცელება „მაღალი საჯარო ინტერესით“ ახსნა.

“მაღალი საჯარო ინტერესიდან გამომდინარე, გვსურს, საზოგადოებას ვაცნობოთ, რომ სახელმწიფო უსაფრთხოების სამსახურში მიმდინარეობს გამოძიება ტერორისტული აქტის მომზადებისა და სახელმწიფო ხელისუფლების დასამხობად შეთქმულების ფაქტზე, დანაშაული გათვალისწინებული საქართველოს სსკ-ის 18-323-ე მუხლის პირველი ნაწილით და 315-ე მუხლის პირველი ნაწილით.

სახელმწიფო უსაფრთხოების სამსახური იძიებს უკრაინაში მყოფი, საქართველოს ხელისუფლების ყოფილი მაღალჩინოსნებისა და ძალოვანი უწყებების ყოფილი თანამშრომლების ორგანიზებით და დაფინანსებით, საქართველოში დანაშაულებრივი ქმედებების, მათ შორის, პარტია “ქართული ოცნების” საპატიო თავმჯდომარის, ბიძინა ივანიშვილის მკვლელობის მომზადების ფაქტებს. ხსენებული დანაშაულებრივი ქმედებების მიზანია, ქვეყანაში არეულობის მოწყობის და ხელისუფლების დასუსტების ფონზე, დესტრუქციული ძალების მიერ სახელმწიფო ხელისუფლების ძალადობრივი გზით დამხობა.

სისხლის სამართლის საქმეზე მიმდინარეობს აქტიური საგამოძიებო და ოპერატიულ-სამძებრო ღონისძიებები, რომლის ფარგლებში ხდება კონკრეტულ პირთა საგამოძიებო ორგანოში დაბარება მათი მოწმის სახით გამოკითხვის მიზნით”, – აღნიშნულია განცხადებაში.

ხელისუფლებასთან აფილირებული მედიასაშუალებების ინტერპრეტაციით, სუსი იძიებს საქმეს, რომლის მიხედვითაც, ბიძინა ივანიშვილის წინააღმდეგ ტერორისტული აქტი მზადდება. ტელეარხები ამ ვერსიას ავითარებენ უკრაინაში მებრძოლი ქართველისა და მისი ადვოკატის (მიხეილ რამიშვილის) ინტერვიუების ინტერპრეტაციით. მიხეილ რამიშვილმა მედიასთან საუბრის დროს აღნიშნა, რომ სუსის გამომძიებლებს მისთვის ფაქტად არ უთქვამთ, რომ საქართველოში იგეგმება ტერორისტული აქტი ბიძინა ივანიშვილისა და სხვა ლიდერების მიმართ.

„უბრალოდ კითხვები ისმებოდა ყველა მიმართულებით – როგორც პირად ცხოვრებაზე, კომუნიკაციაზეც. ფაქტად არ ყოფილა ნათქვამი, რომ იგეგმება ტერორისტული აქტი… ვნახე, ჩემზე დაყრდნობით როგორ გაშუქდა, თითქოს იგეგმება ტერორისტული აქტი და უნდა მოხდეს… აბსურდია, არ შეიძლება ეს ინფორმაცია [რომ იგეგმება ტერორისტული აქტი] იყოს ჩემზე დაყრდნობით“, – თქვა მიხელ რამიშვილმა.
უკვე რამდენიმე დღეა სახელმწიფო უსაფრთხოების სამსახური უკრაინაში მებრძოლ ქართველებს გამოკითხვაზე იბარებს. აქამდე ცნობილი არ იყო, რა საქმეზე მიმდინარეობდა გამოძიება, ამას ემატებოდა ისიც, რომ გამოკითხვაზე მყოფებს გაუთქმელობაზე აწერინებდნენ ხელს.

23 ივლისს კი უკრაინაში მებრძოლი გელა კახაბრიშვილის გამოკითხვის შემდეგ გახდა ცნობილი, თუ რას იძიებდა სუს. როგორც ადვოკატმა მიხეილ რამიშვილმა თქვა, კითხვები ბიძინა ივანიშვილისა და ოცნების მაღალჩინოსნების მიმართ ტერორისტული აქტის მომზადებას ეხებოდა.

სუს-ში დაბარებულთა რაოდენობა ბოლო ერთი კვირის განმავლობაში, 10-მდე გაიზარდა. მებძოლები დარწმუნებულები არიან, რომ მათი დაბარება ოკუპანტი ქვეყნის დავალებით ხდება და საქართველოს ხელისუფლება რუსეთის დაკვეთით მოქმედებს.