რეგიონი

გამოუჩნდება თუ არა მშენებელი თელავის “მშვიდობის პარკს”?

მშვიდობის ქუჩის მიმდებარედ, ახალი სარეკრეაციო სივრცის მოსაწყობად, ორმილიონნახევრიანი ღირებულების ტენდერი, თელავის მუნიციპალიტეტის მერიამ მესამედ გამოაცხადა.

პროექტის თანახმად, თელავის აღმოსავლეთ ნაწილში, ,,მშვიდობის პარკის,, სარეაბილიტაციო სამუშაოები უნდა განხორციელდეს.

მშვიდობის პარკში საბავშვო მოედანი, ველო და საფეხმავლო ბილიკები, სკეიდბორდის მოედანი, ფანჩატურები, სავარჯიშო მოედნები და სხვა ინფრასტრუქტურა მოეწყობა.

პარკი სრულად იქნება ადაპტირებული შეზღუდული შესაძლებლობების მქონე პირებისათვის.
პარკის მოწყობა იგეგმება ტერიტორიაზე, სადაც 440 ძირი წიწვოვანი ხეა, თუმცა

პროექტის განმარტებით ბარათში მითითებულია, რომ სამუშაოების მწარმოებელმა მრავალწლიანი ხეები სრულად უნდა შეინარჩუნოს.
პირველი ტენდერი, 2 518 787 ლარიან პროექტზე, თელავის მერიამ 23 თებერვალს გამოაცხადა.

ტენდერი არ შედგა და მერიამ, ის მეორედ, 8 აპრილს გამოაცხადა.

ხელახლა გამოცხადებული ტენდერი, გაურკვეველი მიზეზით შეწყდა და ის, 12 აპრილს მესამედ გამოცხადდა.
სატენდერო დოკუმენტაციის თანახმად, წინადადებების მიღება, ” მშვიდობის პარკის” სამშენებლო სამუშაოების შესყიდვაზე 26 აპრილს მთავრდება.

თელავის მუნიციპალიტეტის მერიაში, მხოლოდ ის განმარტეს, რომ პარკის მშენებლობისათვის, ორ მილიონზე მეტი თანხა საპილოტე რეგიონების ინტეგრირებული განვითარების პროგრამის ფარგლებში და ადგილობრივი ბიუჯეტის თანადაფინანსებით გამოიყოფა.

ტენდერების მიყოლებით ჩავარდნის მიზეზებზე, მერიაში აღარ საუბრობენ.

მსგავსი პოსტები

Back to top button