მეწყერი მესტიაში-მოსახლეობა შველას ითხოვს
მესტიის მუნიციპალიტეტიდან 14 კილომეტრის დაშორებით სოფელ მუჟალში ჟაბეშის უბანში, მეწყრული პროცესებისგან ადიდებულმა ღელემ ადგილობრივ მოსახლეობას საფრთხე შეუქმნა.
უამინდობის გამო მეწყრული პროცესების გააქტიურების საფრთხე ისევ არსებობს, ადგილობრივები ხელისუფლებისგან დახმარებას ითხოვენ.
“მეხუთე დღეა ასეთ დღეში ვართ 40 კომლიანი ოჯახი,თავიდან მეწყრულმა პროცესებმა ღელის 6 მეტრიანი კალაპოტი გააჩინა,თან ჩამოიტანა ნაშალი ქვა-ღორღი და მოგლეჯილი ხეები,ეს ყველაფერი ორი სოფლის დამაკავშირებელ ხიდთან ჩაიხერგა,დადგა საშიშროება სახლში შევარდნილიყო ეს მასა. დიდმა ტრაქტორმა იმუშავა,იძულებულნი გახდნენ ხიდი გადაეწიათ, მაგრამ მერე შეჩერდა სამუშაოები. მოწყვეტილი ვართ ხიდს აქეთ დარჩენილი რამდენიმე ოჯახი,შვილებს ვერც სკოლაში და ვერც ბაღში ვერ ვუშვებთ,ვერც რაიონში მივდივართ პირველადი მოხმარების საგნების შესაძენად”,-უთხრა რადიო თბილისს სოფლის მკვიდრმა, გოგია გუჯეჯიანმა.
მესტიის მერის კაპიტონ ჟორჟოლიანის თქმით, დიდი ტრაქტორი და რამდენიმე ერთეული ტექნიკა სოფელში ახლაც მუშაობს.
“ტარდება საპრევენციო ღონისძიებები,რომ დავიცვათ მოსახლეობა მოსალოდნელი საფრთხისგან”,-განუცხადა რადიო თბილისს ჟორჟოლიანმა. მისივე განმარტებით, სოფელში მალევე დაიწყება დაზიანებული ინფრასტრუქტურის აღდგენა.
