მეუფე იაკობი პატრიარქის ქორეპისკოპოსის თანამდებობიდან გადადგა
ბოდბელი ეპისკოპოსი მეუფე იაკობი პატრიარქის ქორეპისკოპოსის თანამდებობას ტოვებს. შესაბამისი განცხადება მეუფე იაკობმა რამდენიმე წუთის წინ, საპატრიარქოდან გამოსვლის შემდეგ, ჟურნალისტებთან გააკეთა.
„გადავდექი ქორეპისკოპოსის პოზიციიდან, მაგრამ ვრჩები ეპარქიაში“, – განაცხადა იაკობმა.
მეუფე იაკობის თქმით, ის ეპარქიაში ბოდბის მიტროპოლიტად რჩება, ის არ ამბობს რა რეაქცია ჰქონდა ილია მეორეს ამ გადაწყვეტილებასთან დაკავშირებით.
ბოდბელმა ეპისკოპოსმა მეუფე იაკობმა 26 ოქტომბერს TV “პირველის” ეთერში საქართველოს პრემიერ-მინისტრი გიორგი გახარია, ყოფილი პრემიერი გიორგი კვირიკაშვილი და შს მინისტრი ვახტანგ გომელაური პატრიარქის გადაყენების მცდელობაში დაადანაშაულა.
“გახარია, გომელაური და კვირიკაშვილი „მეჩალიჩებოდნენ“, პატრიარქი გადავაყენოთ და შიო (მუჯირი) დავნიშნოთო. მე მაგათ ვუთხარი, ბიჭო, თქვენ მაგას ვინ გეკითხებათ, ეკლესიამ თვითონ იცის და ცოცხალი პატრიარქის წინააღმდეგ როგორ მიდიხართ-მეთქი”, – მეუფე იაკობი ამბობს, რომ ამ შინაარსის შეხვედრებს ხელისუფლების მაღალჩინოსნები სხვა მეუფეებთანაც მართავდნენ: – „მაგათ ყველას აწი მე მივხედავ. მაგათ ყველას ჩავარტყამ, სადაც ჩასარტყმელია. ბიძინა ამბობს ხოლმე, ვინ არის მეუფე, არავინ არ არისო. მე სინოდის ავტორიტეტული წევრი ვარ. მე ძლიერი პოზიციები მაქვს ეკლესიაში“, – განაცხადა მეუფე იაკობმა.
ბოდბელი ეპისკოპოსის სიტყვებს გიორგი გახარია სისულელეს უწოდებს და ამბობს, რომ მსგავს შეხვედრას არ დასწრებია.
