მომდევნო დღეებსა და კვირებში ევროკავშირის 27 წევრი სახელმწიფო საქართველოს საკითხს განიხილავს

დიდი ალბათობით, ევროკომისიის რეკომენდაცია საქართველოს გაწევრიანებაზე არ იქნება პოზიტიური და მოლაპარაკებების გახსნა კიდევ უფრო ნაკლებად სავარაუდოა, – ამის შესახებ საქართველოში ევროკავშირის ელჩმა, პაველ ჰერჩინსკიმ განაცხადა.

ჰერჩინსკის კითხვა დაუსვეს გაფართოების ანგარიშთან დაკავშირებით, არის თუ არა შანსი, რომ საქართველოს ევროკავშირში გაწევრიანების შესახებ მოლაპარაკებების გახსნის კუთხით პოზიტიური შეფასება იყოს.

„სამწუხაროდ, ამ კითხვას ვერ გავცემ პასუხს. უნდა დაველოდოთ გაფართოების შესახებ ანგარიშის გამოქვეყნებას, მაგრამ შემიძლია გავიმეორო, რაც უკვე ვთქვი, რომ ევროკავშირის ლიდერების გადაწყვეტილებას თუ გავითვალისწინებთ, გაეჩერებინათ საქართველოს ევროკავშირში გაწევრიანების პროცესი, რომ საქართველოს ხელისუფლების წარმომადგენლებისგან ეთხოვათ განმარტება ნამდვილ განზრახვებზე საქართველოს ევროკავშირში გაწევრიანებასთან დაკავშირებით, მაშინ, დიდი ალბათობით, რეკომენდაცია პოზიტიური არ იქნება. კიდევ უფრო ნაკლებად სავარაუდოა პოზიტიური გადაწყვეტილება 27 წევრი სახელმწიფოს მიერ, რომელიც ერთსულოვნად მიიღება, გაიხსნას მოლაპარაკებები საქართველოს ევროკავშირში გაწევრიანების შესახებ“, – განაცხადა პაველ ჰერჩინსკიმ.

ამასთან, პაველ ჰერჩინსკის თქმით, მომდევნო დღეებსა და კვირებში ევროკავშირის 27 წევრი სახელმწიფო საქართველოს საკითხს განიხილავს.

„მომდევნო დღეებსა და კვირებში საქართველოს საკითხი და საქართველოში არსებული ვითარება განხილული იქნება ევროკავშირის 27 წევრ სახელმწიფოს შორის. ფაქტობრივად, მინდა გითხრათ, რომ მხოლოდ ხვალ, 8 ოქტომბერს, გაიმართება საპარლამენტო დებატები საქართველოზე. უმაღლესი წარმომადგენელი, ვიცე-პრეზიდენტი მოწვეულია, რომ სიტყვით გამოვიდეს. ვფიქრობ, ამას ერთ-ერთი კომისარი გააკეთებს მისი სახელით. შემდეგ, მომავალ კვირას, 14 ოქტომბერს გაიმართება ევროკავშირის საგარეო საქმეთა მინისტრების შეხვედრა, სადაც კვლავ ოფიციალურად არის შეტანილი საქართველო დღის წესრიგში ე.წ. მიმდინარე საკითხების ქვეშ.

27 მინისტრს ექნება შანსი, განიხილოს საქართველოში არსებული ვითარება. შემდეგ, 17 და 18 ოქტომბერს გვექნება ევროპული საბჭო, და როგორც ვიცი, ევროპული საბჭოს პრეზიდენტმა, შარლ მიშელმა ასევე შესთავაზა ლიდერებს, ევროკავშირის 27 ქვეყნის პრემიერ-მინისტრებსა და პრეზიდენტებს, განიხილონ საქართველოს საკითხი. ბოლოს, მაგრამ არანაკლებ მნიშვნელოვანია, ჩვენ ველოდებით გაფართოების ანგარიშს საქართველოზე, რომელიც გამოქვეყნდება ოქტომბრის მეორე ნახევარში, რაც სავარაუდოდ იქნება არჩევნებამდე რამდენიმე დღით ადრე ან არჩევნების შემდეგ რამდენიმე დღეში.

ის ფაქტი, რომ საქართველოს საკითხი განიხილება ევროპარლამენტში, საქართველოში არსებული ვითარება განიხილება 27 ქვეყნის საგარეო საქმეთა მინისტრს შორის და საქართველოში არსებული ვითარება განხილული იქნება ევროკავშირის ლიდერებს შორის, არ არის კარგი ნიშანი. ეს ნიშნავს, რომ ლიდერები შეშფოთებულნი არიან. ეს ნიშნავს, რომ ჩვენ ვღელავთ მოვლენების განვითარების გამო. როგორც უკვე გითხარით, ნამდვილად გულსატკენი იყო ივნისში, ბოლო ევროპული საბჭოს დროს იმის ნახვა, რომ ევროკავშირის 27 ქვეყნის პრეზიდენტებმა და პრემიერ-მინისტრებმა კოლექტიურად მიიღეს გადაწყვეტილება, შეეჩერებინათ საქართველოს ევროკავშირში გაწევრიანების პროცესი. ამავდროულად, მათ გადაწყვიტეს, დაეჩქარებინათ უკრაინისა და მოლდოვის გაწევრიანების პროცესი. ეს აუცილებელი გახდა შემაშფოთებელი საკანონმდებლო ინიციატივების, საქართველოს ხელისუფლების ძალიან შემაშფოთებელი ინიციატივების, ანტიდასავლური, ანტიევროპული პროპაგანდისტული ნარატივებისა და შეთქმულების თეორიების გამო, რომლებიც არ შეწყვეტილა. ეს იყო დრამატული გადაწყვეტილება, მაგრამ ეს არის დღევანდელი ევროკავშირ-საქართველოს ურთიერთობების რეალობა, რომელიც, გულწრფელად იმედი მაქვს, შეიცვლება არჩევნების შემდეგ, ვინც არ უნდა გაიმარჯვოს არჩევნებში“, – განაცხადა პაველ ჰერჩინსკიმ.

ევროკავშირის უმაღლესი ორგანო გეგმავს გაიმეოროს, რომ საქართველოს მთავრობის ამჟამინდელი კურსი ქვეყნის ევროინტეგრაციას აფერხებს და მას მოუწოდოს, განახორციელოს დემოკრატიული რეფორმები.

ეს ირკვევა ევროპული საბჭოს უახლოესი შეხვედრის სამუშაო დოკუმენტიდან, რომელსაც რადიო თავისუფლება გაეცნო.

„ევროპული საბჭო იმეორებს, რომ მოქმედების ამჟამინდელი კურსის შეუცვლელობა საფრთხეში აგდებს საქართველოს ევროპულ გზას, ფაქტობრივად, მას აჩერებს. მოუწოდებს საქართველოს, განახორციელოს დემოკრატიული, ყოვლისმომცველი და მდგრადი რეფორმები ევროპული ინტეგრაციის ძირითადი პრინციპების შესაბამისად“, – ნათქვამია დოკუმენტში.

ევროპული საბჭო აერთიანებს ევროპის წევრი სახელმწიფოებისა და მთავრობების მეთაურებს, რომლებიც წელიწადში ოთხჯერ ხვდებიან ერთმანეთს და ევროკავშირის პოლიტიკის ძირითად მიმართულებებს განსაზღვრავენ.

ევროპული საბჭოს მომდევნო შეხვედრა ბრიუსელში 17 და 18 ოქტომბერს გაიმართება. ევროპელი ლიდერები ხმას მისცემენ დოკუმენტს, რომელიც წინასწარ შეიმუშავა ევროკავშირის საბჭოს სამდივნომ და რომელსაც რადიო თავისუფლება გაეცნო.

„ევროპული საბჭო იმეორებს სერიოზულ შეშფოთებას საქართველოს მთავრობის კურსთან დაკავშირებით, რომელიც ევროკავშირის სადამფუძნებლო ღირებულებებსა და პრინციპებს ეწინააღმდეგება“, – ნათქვამია დოკუმენტში.

სამუშაო დოკუმენტში საქართველოს შესახებ კიდევ ორ ჩანაწერს ვხვდებით. მათგან პირველში ნათქვამია, რომ ევროკავშირი 26 ოქტომბრის საპარლამენტო არჩევნების „თავისუფალ და სამართლიან“ გარემოში ჩატარებას ელის, მეორეში კი ხაზგასმულია ევროკავშირის „ურყევი მხარდაჭერა“ საქართველოს ტერიტორიული მთლიანობისადმი.

4 ოქტომბერს საქართველოში ევროკავშირის ელჩმა პაველ ჰერჩინსკიმ თქვა, რომ ევროკავშირის ინსტიტუტებმა საქართველოს მთავრობის წარმომადგენლებთან შეხვედრები შეწყვიტეს, ივლისში კი ევროკავშირმა საქართველოს თავდაცვის გასაძლიერებლად გამოყოფილი 30 მილიონი ევროს ოდენობის დახმარება შეუჩერა.

ამ და სხვა შესაძლო ზომების შესახებ საუბარი იყო ევროკომისიის სამუშაო დოკუმენტში, რომელიც რადიო თავისუფლებამ ივნისში ნახა. ამ დოკუმენტის თანახმად, ევროკავშირი უკიდურეს ზომად განიხილავს საქართველოს მოქალაქეებისთვის უვიზო რეჟიმის შეჩერებას.

„ნამდვილად გულსაკლავია იმის ნახვა, რომ ევროკავშირში საქართველოს ინტეგრაცია პრაქტიკულად შეჩერებული, პრაქტიკულად გაყინულია, ამავდროულად, ჩვენ წინ მივიწევთ უკრაინასთან და მოლდოვასთან ერთად”, – თქვა ივნისში პაველ ჰერჩინსკიმ მას შემდეგ, რაც “ქართულმა ოცნებამ” ე.წ. აგენტების კანონი მიიღო.