მოსამართლემ ბათუმის მოვლენებთან დაკავშირებით დაკავებული 9 პირი პატიმრობაში დატოვა
![](https://heretifm.com/wp-content/uploads/2017/05/nfpCLgBynUCYPt14JAdZvA-1.jpg)
ბათუმის საქალაქო სასამართლოს მოსამრთლემ ბათუმის მოვლენებთან დაკავშირებით დაკავებული 9 პირი პატიმრობაში დატოვა. მოსამართლის ამ გადაწყვეტილებას ხმაური მოჰყვა.
გადაწყვეტილება დაკავებულების ახლობლებმა გააპროტესტეს. დღევანდელ პროცესზე დაცვის მხარემ პატიმრობის გირაოთი შეცვლა მოითხოვა, თუმცა როგორც სხდომის დასრულების შემდეგ ადვოკატებმა განაცხადეს, მოსამართლემ მათი პოზიცია არ გაითვალისწინა.
ბათუმში ვითარება 11 მარტს საღამოს ჭავჭავაძის ქუჩაზე მომხდარი ინციდენტისას დაიძაბა. პოლიციამ 2 მოქალაქე – რამაზ ხიმშიაშვილი და ჯიმი ვარშანიძე დაუმორჩილებლობის ბრალდებით დააკავა.
მოგვიანებით გოგებაშვილის ქუჩაზე მიმდინარე აქციაზე კიდევ 4 პირი დააკავა. ამის შემდეგ აქციამ აჭარის შს სამმართველოსთან გადაინაცვლა, სადაც პოლიციასა და აქციის მონაწილეებს შორის დაპირისპირება მოხდა. სპეცდანიშნულების რაზმმა ცრემლსადენი გაზი გამოიყენა.