მნიშვნელოვანიმსოფლიოსიახლეები

უკრაინაში დაღუპული 25 წლის ქართველი მებრძოლი სამშობლოში ჩამოასვენეს

უკრაინაში დაღუპული ქართველი მებრძოლი, 25 წლის ირაკლი ქურციკიძე გამთენიისას სამშობლოში ჩამოასვენეს. ირაკლი პროფესიონალი სამხედრო, გორის სამხედრო აკადემიის კურსდამთავრებული იყო. ის უკრაინაში ომის დაწყებიდან მალევე წავიდა და ფრონტის წინა ხაზზე იბრძოდა. ქურციკიძე უკრაინაში 2022 წლის მაისიდან იბრძოდა.

თანამებრძოლების ინფორმაციით, ქურციკიძე 11 ნოემბერს, ჭურვის ნამსხვრევს ემსხვერპლა. ცხედარს თბილისის საერთაშორისო აეროპორტში დაღუპულის ოჯახის წევრები, ახლობლები და პოლიტიკოსები დახვდნენ.

„ოჯახის წევრებმა, რა თქმა, უნდა ბოლომდე არ ვიცოდით, რა სირთულეების ოპერაციებს ატარებდა, თუმცა გზადაგზა ირკვევა. თანამებრძოლები გვეხმიანებიან, ჩამოსულებიც იყვნენ და გვიყვებიან, თუ რამდენი ღვაწლი აქვს გაწეული, რამდენი ადამიანი ჰყავს გადარჩენილი. შეიძლება ითქვას, რომ ასეთი გმირის დაკარგვა მთელი ქვეყნისთვის ტრაგედიაა,“ – განაცხადა დაღუპულის ნათესავმა.

აეროპორტიდან ირაკლი ქურციკიძე რუსთავში, საცხოვრებელ სახლში გადაასვენეს- სამოქალაქო პანაშვიდი ვახტანგ გორგასლის სახელობის ეკლესიაში გაიმართება. მას შაბათს დაკრძალავენ.

ომის დაწყებიდან დღემდე უკრაინაში 56 ქართველი მოხალისე დაიღუპა. რამდენიმე მებრძოლის გადმოსვენება ამ დრომდე ვერ ხერხდება.

მსგავსი პოსტები

Back to top button