“სირცხვილის დერეფნები” პარლამენტთან -აქციაზე რამდენიმე აქტივისტი დააკავეს
ამ წუთებში, საქართველოს პარლამენტთან მიმდინარე აქციის მონაწილეების ნაწილმა საკანონმდებლო ორგანოს შესასვლელებთან გადაინაცვლა და აქცია სამ სხვადასხვა ადგილას გრძელდება.
საქართველოს პარლამენტთან შეკრებილი მოქალაქეები პარლამენტიდან გამოსულ “ხალხის ძალის” და “ქართული ოცნების” წარმომადგენლებს, რომლებიც ე.წ. უცხოური გავლენის აგენტების შესახებ კანონპროექტის განხილვაში მონაწილეობდნენ, ე.წ. სირცხვილის კორიდორს მოუწყობენ.
ამის შესახებ მათ აქციაზე განაცხადეს.
აქციის ერთ-ერთი მონაწილის ირაკლი ფავლენიშვილის თქმით, როდესაც კომიტეტის სხდომა დასრულდება, პარლამენტის სამ გამოსასვლელთან დაიყოფიან და “სირცხვილის კორიდორს” მოაწყობენ.
“ჩვენ არ დავიშლებით, არ დავიძინებთ და საქართველოს გავათავისუფლებთ”, – აღნიშნა მან.
ადგილზე აქციის მონაწილეები სკანდირებენ: “არა რუსულ კანონს”.
ადგილზე მობილიზებულია პოლიცია.
საქართველოს პარლამენტთან შეკრებილი სამოქალაქო აქტივისტებო და ოპოზიციის წევრები საკანონმდებლო ორგანოს შესასვლელებთან გადავიდნენ.
საკანონმდებლო ორგანოს შენობის შესასვლელებთან პოლიციაა მობილიზებული.
მათ ცოცხალი კედელი აქვთ გაკეთებული.
აქციის მონაწილეები სკანდირებენ “მონებო”.
პარლამენტის მიმდებარე ტერიტორიაზე მიმდინარე აქციაზე, რამდენიმე ადამიანი დააკავეს. ამ დროისთვის უცნობია, ვინ არიან დაკავებულები. ადგილზე ამ წუთებშიც დაპირისპირებაა სამოქალაქო აქტივისტებსა და სამართალდამცველებს შორის.
ადგილზე მყოფი ვაჟა სირაძე მედიასთან კომენტარს არ აკეთებს.
ამ წუთებში, პარალელურად, საქართველოს პარლამენტთან მიმდინარე აქციის მონაწილეების ნაწილმა საკანონმდებლო ორგანოს შესასვლელებთან გადაინაცვლა და აქცია სამ სხვადასხვა ადგილას გრძელდება.
ისინი აპირებენ, შენობიდან გამოსულ დეპუტატებს, რომლებიც საკომიტეტო სხდომაზე რუსულ კანონპროექტს განიხილავენ, “სირცხვილის დერეფნებით” დახვდნენ.
პარალელურად, აქცია “არა რუსულ კანონს” გრძელდება პარლამენტის წინაც. რუსთაველის გამზირზე მოქალაქეები, პოლიტიკური პარტიების წარმომადგენლები და სამოქალაქო აქტივისტები იმყოფებიან.
პარლამენტში საგარეო ურთიერთობათა და თავდაცვის კომიტეტების ერთობლივ სხდომაზე რუსული კანონის განხილვა მიმდინარეობს.
პარლამენტთან რუსულ კანონპროექტებზე მიმდინარე საპროტესტო აქციას სტუდენტებიც უერთდებიან. იქ უკვე შეკრებილები არიან მედიის, არასამთავრობო და სამოქალაქო სექტორის წარმომადგენლები.
საგარეო ურთიერთობათა და თავდაცვის კომიტეტების ერთობლივ სხდომაზე რუსული კანონის განხილვა უნდა დაწყებულიყო, თუმცა პარალელურად საპროტესტო აქცია გაიმართა. რუსულ კანონს აპროტესტებენ როგორც პარლამენტის შესასვლელთან, ისე შენობაში, კომიტეტის დარბაზის შესასვლელთან.
როგორც უკვე ცნობილია, საპარლამენტო სესიაზე პირველი მოსმენით კანონპროექტს მიიღებენ, რის შემდეგაც მას ვენეციის კომისიაში გააგზავნიან. საპროტესტო აქციის მონაწილეები აცხადებენ, რომ ეს კანონი საქართველოს დააშორებს ევროპას და ხელს შეუშლის სტატუსის მიღებას. მმართველი პარტიის დეპუტატებს დარბაზში შესასვლელად შეძახილებისა და სტვენის ფონზე მოუწიათ.
განხილვების დაწყებამდე შეიცვალა სხდომათა დარბაზიც – ოპოზიციონერი დეპუტატები დარბაზიდან პირდაპირ ეთერში ერთვებოდნენ და ავრცელებდნენ კადრებს, სადაც ჩანდა, რომ მათ დაცვის წარმომადგენლები ძალის გამოყენებით აძევებენ.
მმართველი პარტიის წევრები რუსულ კანონში პრობლემას ვერ ხედავენ, თუმცა მას აქტიურად აკრიტიკებენ საერთაშორისო პარტნიორები, სამოქალაქო საზოგადოების წარმომადგენლები და სხვადასხვა ქვეყნის ელჩები. რუსულ კანონზე საქართველოში ამერიკის ელჩმა, კელი დეგნანმა განაცხადა, რომ კანონპროექტის მიზანი სამოქალაქო საზოგადოების სტიგმატიზაციაა. ის გააკრიტიკა საქართველოში ევროკავშირის ელჩმაც და აღნიშნა, რომ კანონი ევროკავშირის 12 პრიორიტეტთან შეუთავსებელია. რუსულ კანონს გამოეხმაურა ევროკავშირის საგარეო უწყებაც და განაცხადა, რომ ეს შემაშფოთებელია.
ამას Twitter-ზე გამოეხმაურა ნორვეგიის საგარეო საქმეთა სამინისტროც და განაცხადა, რომ კანონი ქვეყნების თანამშრომლობაზე უარყოფითად აისახება. უწყების თქმით, კანონპროექტი ეწინააღმდეგება ქართველი ხალხის მტკიცე ევროპულ მისწრაფებებსა და ადამიანის უფლებების საერთაშორისო ვალდებულებებს. ნორვეგიამ კანონმდებლებს მოუწოდა, საქართველოს დემოკრატიის ინტერესებიდან გამომდინარე იმოქმედონ.
კანონპროექტი გააკრიტიკა ევროპის საბჭოს ადამიანის უფლებათა კომისარმა – მან საქართველოს პარლამენტის თავმჯდომარეს, შალვა პაპუაშვილს ოფიციალური წერილით მიმართა და მოუწოდა, კანონის მიღებაზე უარი თქვას. მისი განცხადებით, კანონს, შესაძლოა, სერიოზული მსუსხავი ეფექტი ჰქონდეს ადამიანის უფლებების, დემოკრატიისა და კანონის უზენაესობის სფეროში აქტიურად მომუშავე არასამთავრობო ორგანიზაციათა საქმიანობაზე.
ქართული ოცნებიდან ფორმალურად წასულმა დეპუტატებმა, რომლებიც საკუთარ თავს “ხალხის ძალას” უწოდებენ, დააინიციირეს კანონპროექტი, რომელიც საქართველოში “უცხოური გავლენის აგენტებს” გააჩენს. ეს კანონი შეეხება ყველას, ვინც ხელისუფლებას აკრიტიკებს. “უცხოური გავლენის აგენტებად” დარეგისტრირდებიან ორგანიზაციები და მედიასაშუალებები, რომელთა შემოსავლის 20%-ზე მეტი უცხოური წყაროა.
ქართული ოცნება მხარს უჭერს კანონპროექტს. მმართველ პარტიაში აცხადებენ, რომ მსგავსი კანონი აშშ-შიც მოქმედებს, ამავე არგუმენტს იყენებდა რუსეთიც. თუმცა ისინი მანიპულირებენ, როდესაც ამერიკული კანონის მოქმედების დეტალებზე არ საუბრობენ. ამერიკული კანონი სხვა სახელმწიფოების პოლიტიკური ლობიზმის გამოსავლენადაა მიმართული, განსხვავებით ქართული ოცნების რუსული კანონისგან.
კანონპროექტის შესახებ აშშ-ის სახელმწიფო დეპარტამენტის პრესსპიკერმა, ნედ პრაისმა განაცხადა, რომ რუსული კანონი უცხოური გავლენის აგენტებზე სტიგმატიზებას მოახდენს და “გააჩუმებს საქართველოს მოქალაქეების დამოუკიდებელ ხმებს”.
