მნიშვნელოვანისიახლეები

საქართველოს პრეზიდენტი 6 თებერვალს პარლამენტს წლიურ ანგარიშს წარუდგენს

სალომე ზურაბიშვილის მიერ პრეზიდენტის რანგში ეს ბოლი წლიური ანგარიში იქნება

6 თებერვალს სალომე ზურაბიშვილმა პარლამენტის წინაშე ანგარიში უნდა წარადგინოს. აღნიშნული თარიღი რეგლამენტით არის განსაზღვრული. რეგლამენტში ნათქვამია, რომ პარლამენტი საგაზაფხულო სესიის პირველი პლენარული სხდომის დღეს, საქართველოს კონსტიტუციის შესაბამისად, ისმენს პრეზიდენტის ყოველწლიურ მოხსენებას ქვეყნის მდგომარეობის უმნიშვნელოვანეს საკითხებზე. აღნიშნული თარიღის შეცვლა შესაძლებელია პარლამენტის თავმჯდომარესთან შეთანხმებით.

რეგლამენტის მიხედვით, პრეზიდენტის გამოსვლის დასრულების შემდეგ სიტყვით გამოდიან ფრაქციათა თავმჯდომარეები და საპარლამენტო უმრავლესობის ლიდერი.

გამოსვლების დასრულების შემდეგ საქართველოს პრეზიდენტი უფლებამოსილია, გამოვიდეს დასკვნითი სიტყვით.
ეს იქნება ზურაბიშვილის ბოლო გამოსვლა საპარლამენტო ტრიბუნასთან პრეზიდენტის რანგში, თუ “ქართული ოცნება” მას კიდევ ერთ პოლიტიკურ დემარშს არ მოუწყობს.
ამისთვის უმრავლესობას რამდენიმე პროცედურული ინსტრუმენტი აქვს. მაგალითად, თუ სხდომათა დარბაზში დეპუტატების საჭირო რაოდენობა რეგისტრაციას არ გაივლის და კვორუმი არ შედგება. ასეთ სცენარს ხელისუფლების ოპონენტები უშვებენ და აღნიშნავენ, რომ “ოცნება” პრეზიდენტის მიმართ “სადამსჯელო ღონისძიებას” ხშირად ატარებს.

თუმცა, დაბლოკავს თუ არა “ოცნება” ზურაბიშვილის ყოველწლიურ გამოსვლას, ჯერჯერობით უცნობია. “ქართული ოცნების” ლიდერებს ამასთან დაკავშირებით განცხადება არ გაუკეთებიათ. პარტიის რიგითი წევრი, მიხეილ სარჯველაძე კი ამბობს, რომ არ აქვს ინფორმაცია, როგორ მოიქცევა უმრავლესობა 6 თებერვალს. მისი თქმით, “წინასწარ მოვლენებს არ უნდა გავუსწროთ.”

“არ მგონია, ვინმეს ჰქონდეს ასეთი რამ ნათქვამი, რომ ვინმე ბოიკოტს აპირებს, არ ვიცი ამასთან დაკავშირებით, ვერ გეტყვით,” – ამბობს სარჯველაძე.

შეგახსენებთ, რომ დეკემბერში “ოცნებამ” პრეზიდენტი ელჩების ყოველწლიურ ამბასადორიალზე არ მიიწვია. იქამდე კი, სახალხო ევროპულ ზეიმზე, რომელიც კანდიდატის სტატუსის მიღების შემდეგ თავისუფლების მოედანზე გაიმართა, მას სცენაზე ასვლისა და სიტყვით გამოსვლის საშუალება არ მისცეს.

მსგავსი პოსტები

Back to top button