ოკუპირებული დონეცკის ე.წ. სასამართლომ საქართველოს ორი მოქალაქე დაუსწრებლად დააკავა
რუსეთის გენერალური პროკურატურა უკრაინის მხარეს მებრძოლი საქართველოს ორი მოქალაქის წინააღმდეგ საქმეებს განიხილავს. – ინფორმაციას რუსული პროპაგანდისტული გამოცემა TACC რუსეთის გენერალურ პროკურატურაზე დაყრდნობით ავრცელებს და წერს, რომ ე.წ. პროკურატურა მათ დაქირავებულ მებრძოლად მსახურობაში სდებს ბრალს.
კერძოდ, მათი ცნობით, საქართველოს მოქალაქეების – ლადო გამსახურდიასა და ქართლოს რუსიტაშვილის – წინააღმდეგ აღძრულ საქმეებს დონეცკის ოლქის ოკუპირებულ ტერიტორიებზე არსებული ე.წ. “დონეცკის სახალხო რესპუბლიკის” ე.წ. “პროკურატურა” განიხილავს.
რუსეთის გენპროკურატურა ქართველ მებრძოლებს “დაქირავებულ მებრძოლებად” მოიხსენიებს.
მათი ცნობით, გამსახურდია და რუსიტაშვილი 2022 წლიდან 2024 წლამდე ნებაყოფლობით გაწევრიანდნენ “ქართულ ეროვნულ ლეგიონში” როგორც “დაქირავებული მებრძოლები” და საბრძოლო ქმედებებში უკრაინის მხარეს იღებდნენ მონაწილეობას. გარდა ამისა, რუსეთის გენპროკურატურა გამსახურდიას “დაქირავებული მებრძოლების” რეკრუტირებასა და მომზადებაშიც სდებს ბრალს.
ისინი აღნიშნავენ, რომ საქართველოს მოქალაქეების წინააღმდეგ აღძრული სისხლის სამართლის საქმეები ე.წ. “დონეცკის სახალხო რესპუბლიკის” ე.წ. “უმაღლეს სასამართლოს” გადაეცა.
“ორივე ბრალდებული საერთაშორისო ძებნილთა სიაშია, ამიტომ სასამართლომ გადაწყვიტა, აღკვეთის ღონისძიების სახით, ორივე მათგანი დაუსწრებლად დაეკავებინა”, – წერს TACC.
