ორბელიანების სასახლეში პრეზიდენტი ჯანდაცვის მინისტრს შეხვდა
ორბელიანების სასახლეში პრეზიდენტი სალომე ზურაბიშვილი შეხვდა ჯანდაცვის მინისტრს ზურაბ აზარაშვილს. პრეზიდენტის ადმინისტრაციის ცნობით, პრეზიდენტმა მინისტრისაგან მოისმინა ინფორმაცია აქონდროპლაზიის დიაგნოზის მქონე ბავშვების მკურნალობისა და სამინისტროს სამოქმედო გეგმების შესახებ.
26 აპრილს იშვიათი დაავადებების, მათ შორის აქონდროპლაზიის საკითხებზე მომუშავე საკოორდინაციო საბჭოს შეხვედრა გაიმართა. სამინისტროს ცნობით, საბჭოს წევრებმა, იშვიათი დაავადებების მართვის საკითხებზე, გაიდლაინებისა და პროტოკოლების შემუშავების მექანიზმებზე და ამ პროცესში საერთაშორისო ექსპერტების ჩართულობაზე ისაუბრეს.
„შეხვედრაზე, სამინისტრომ, კიდევ ერთხელ ცალსახად და მკაფიოდ დააფიქსირა პირობა, დააფინანსოს/დააორგანიზოს ამ დიაგნოზით ბავშვების სხვა თანმდევი დაავადებების დიაგნოსტიკა, მკურნალობა, რეაბილიტაცია და ყველა საჭირო პროცედურები როგორც საქართველოში, ისე – საზღვარგარეთ”, – ნათქვამია ჯანდაცვის სამინისტროს ცნობაში.
25 აპრილს სალომე ზურაბიშვილი შეხვდა აქონდროპლაზიის მქონე ბავშვებს და მათ მშობლებს.
აქონდროპლაზიის მქონე ბავშვების მშობლები რამდენიმე დღეა თბილისში, მთავრობის ადმინისტრაციასთან აქციებს მართავენ. ისინი მოითხოვენ პრეპარატ „ვოსორიტიდის” შემოტანასა და დაფინანსებას.
აქციის ორგანიზატორები აცხადებენ, რომ ეს წამალი სასიცოცხლოდ მნიშვნელოვანია აქონდროპლაზიის სინდრომის მქონე ბავშვებისთვის და მის მიღებას მხოლოდ 14-16 წლის ასაკამდე აქვს შედეგი.
აქონდროპლაზიის მქონე ბავშვების მშობლები ისევ პრემიერ-მინისტრთან შეხვედრას მოითხოვენ.
პრემიერ-მინისტრმა მთავრობის სხდომაზე განაცხადა, რომ აქონდროპლაზიის მქონე ბავშვების სიცოცხლეს საფრთხე არ ემუქრება. ირაკლი ღარიბაშვილმა ასევე თქვა, რომ “ქვეყანა, სადაც ეს წამალი გამოიგონეს, თავად არ აფინანსებს”.საქართველოს შრომის, ჯანმრთელობისა და სოციალური დაცვის მინისტრის მოადგილის, თამარ გაბუნიას თქმით, “ვოსორიტიდის” საქართველოში შემოტანის პროცედურებს მხოლოდ იმ შემთხვევაში დაიწყებენ, თუ მიმდინარე წლის სექტემბრის ბოლომდე, ევროკავშირის თუნდაც რამდენიმე ქვეყანაში დადასტურდება ამ მედიკამენტით პაციენტების უზრუნველყოფა.
დაავადებათა კონტროლისა და საზოგადოებრივი ჯანმრთელობის ეროვნულ ცენტრში იშვიათი დაავადებების საკითხებზე მომუშავე საკოორდინაციო საბჭოს შეხვედრა გაიმართა.
დღევანდელი შეხვედრა აქონდროპლაზიის სამკურნალო მედიკამენტ „ვოსორიტიდთან“ დაკავშირებით მიმდინარეობდა, რომელსაც სამედიცინო სფეროს სხვადასხვა წარმომადგენელი ესწრებოდა.
როგორც შეხვედრის დასრულების შემდეგ ჯანდაცვის მსოფლიო ორგანიზაციის საქართველოს წარმომადგენლობის ხელმძღვანელმა, სილვიო დომენტემ ჟურნალისტებს განუცხადა, აღნიშნულ მედიკამენტთან დაკავშირებით მწირი ინფორმაცია არსებობს და მრავალ ქვეყანაში მისი დანერგვა საკმაოდ ხანგრძლივი პროცესია.
არცერთი ქვეყნის პროტოკოლში პრეპარატი „ვოსორიტიდი“, როგორც აუცილებელი მკურნალობის მეთოდი, მითითებული არ არის, – აღნიშნულის შესახებ ბავშვთა ენდოკრინოლოგმა, ნინო ხელაძემ იშვიათი დაავადებების საკითხებზე მომუშავე საკოორდინაციო საბჭოს დასრულების შემდეგ განაცხადა.
ენდოკრინოლოგმა სამუშაო შეხვედრასა და პროტოკოლზე ისაუბრა.
„გაიდლაინზე დაჩქარებულ რეჟიმში ვმუშაობთ და ვთვლით, რომ პირველ ივნისამდე იქნება დრაფტი, რომელიც შემდგომ განიხილება და დამტკიცდება. ამ გაიდლაინზე მუშაობს სხვადასხვა სპეციალისტი, ბევრი ექიმი.
წამალი უმეტესზე არ მოქმედებს, ამიტომ აუცილებელია, რომ ყველა ბავშვი შეფასდეს და თუ მათ აქვს სხვადასხვა გართულებები, რომელთაც სჭირდებათ ან რეაბილიტაცია, ან ყელ-ყურის მხრივ ჩარევა, ან რაიმე ოპერაციული ჩარევა, ეს რაც შეიძლება დროულად უნდა იყოს შეთავაზებული და რაც შეიძლება კვალიფიციურად. არცერთი ქვეყნის პროტოკოლში, ამ ეტაპამდე გამოშვებულში, ეს პრეპარატი, როგორც აუცილებელი მკურნალობის მეთოდი, მითითებული არ არის.
რა თქმა უნდა, რისკები არის, თუმცა ამ რისკებს ჩვენ ყველას გავეცანით. ეს რისკები მართვადია და ჩვენ, ექიმები, მზად ვართ, პრეპარატს თუ შეიძენენ, ვმართოთ პაციენტები ისე, როგორც აუცილებელია და როგორც მართავენ იმ ქვეყნებში, რომლებშიც ამ პრეპარატს იყენებენ. მზად ვარ, გავუწიო რეკომენდაცია და პაციენტებს დავეხმარო მკურნალობის დაწყებაში“, – განაცხადა ნინო ხელაძემ.
აქონდროპლაზიის სინდრომის მქონე ბავშვების მშობლებმა მთავრობის ადმინისტრაციასთან მერვე ღამე გაათენეს. ისინი საჭირო მედიკამენტის შეძენასა და დაფინანსებას კვლავ უშედეგოდ ითხოვენ.
დედები ამბობენ, რომ პროტესტი არ შეწყდება, მანამ, სანამ მათი მოთხოვნა არ დაკმაყოფილდება.
