ორბელიანების სასახლეში, პრეზიდენტი ოპოზიციის წარმომადგენლებს და არასამთავრობო ორგანიზაციის წევრებს ხვდება

ორბელიანების სასახლეში, პრეზიდენტ სალომე ზურაბიშვილთან ოპოზიციის წარმომადგენლები და არასამთავრობო ორგანიზაციის წევრები მივიდნენ.

არსებული ინფორმაციით, საუბრის თემა ეუთო/ოდირის დასკვნა იქნება.

როგორც პრეზიდენტთან შესვლამდე პარლამენტის ყოფილმა ვიცე-სპიკერმა თამარ ჩუგოშვილმა განაცხადა, ეუთო/ოდირის დასკვნა საქართველოსთან მიმართებთ ყველაზე მძიმეა, რაც აქამდე დაწერილა.

„შეხვედრის მიზანზე შეხვედრის შემდეგ შემეძლება საუბარი, რაც შეეხება ეუთო-ს დასკვნას, საბოლო ვერსია ბევრად მძიმეა, ვიდრე წინასწარი დასკვნა. ყველაზე უფრო მძიმე დასკვნაა, რაც ოდესმე საქართველოსთან დაკავშირებით დაწერილა, ეს იმას ადასტურებს, რასაც ვამბობდით, რომ ეს იყო ყველაზე ცუდად ჩატარებული არჩევნები, რეალურად, ქართველი ხალხის ნება არ გამოხატა, ვფიქრობ, ეს დასკვნა ამის დასტურია. პროცესები როგორ გაგრძელდება, ეს დღევანდელი შეხვედრის შემდეგ გამოჩნდება“, – განაცხადა ჩუგოშვილმა.

ჩვენ მეტი პროტესტი გვინდა, მეტი ერთიანობა გვინდა, მეტი კონსოლიდაცია გვინდა და ახლა უკვე გვჭირდება კონკრეტული ფორმალური მექანიზმების შექმნაც, რომელიც საერთაშორისო საზოგადოებასთან სხვა ტიპის ურთიერთობას დაიწყებს, – ამის შესახებ კოალიცია „ერთიანობა-ნაციონალური მოძრაობის“ ერთ-ერთმა ლიდერმა, გიორგი ვაშაძემ ორბელიანების სასახლეში მისვლის დროს განაცხადა, სადაც საქართველოს პრეზიდენტის და ოპოზიციური პარტიების, ასევე არასამათავრობო ორგანიზიების წარმომადგენლების შეხვედრა მიმდინარეობს.

მისი თქმით, პოლიტიკურ-საზოგადოებრივმა ჯგუფებმა უნდა ჩამოაყალიბონ კონკრეტული ფორმალური მექანიზმები, რომელიც საზოგადოების მხრიდან ლეგიტიმაციის მატარებელი იქნება.

„ქართული ოცნების“ ხელწერა არის ტყუილი. ტყუილი არა მარტო საქართველოში, არამედ მთელი მსოფლიოს მასშტაბით, ყველგან იტყუებიან, მსოფლიო მასშტაბით მატყუარას იმიჯი და სტატუსი აქვს, მაგალითად, თვითმარქვია ირაკლი კობახიძეს. ჩვენთვის ახლა ყველაზე მნიშვნელოვანია, თუ რას ვაკეთებთ ჩვენ. ჩვენ მეტი პროტესტი გვინდა, მეტი ერთიანობა გვინდა, მეტი კონსოლიდაცია გვინდა და ახლა უკვე გვჭირდება კონკრეტული ფორმალური მექანიზმების შექმნაც, რომელიც საერთაშორისო საზოგადოებასთან სხვა ტიპის ურთიერთობას დაიწყებს. პოლიტიკურ-საზოგადოებრივმა ჯგუფებმა უნდა ჩამოაყალიბონ კონკრეტული ფორმალური მექანიზმები, რომელიც იქნება ლეგიტიმაციის მატარებელი საზოგადოების მხრიდან, ეს არის წნეხის კიდევ ერთი მექანიზმი, რომ იცოდნენ, მათ ხელისუფლებას არათუ არავინ აღიარებს, არამედ იქნება ის ძალაუფლების წყარო, ხალხის ლეგიტიმაციის აღჭურვილი ადამიანები, მათ შორის სალომე ზურაბიშვილის თაოსნობით, რომელიც გააგრძელებს საერთაშორისო საზოგადოებასთან და ქვეყნის შიგნით ხალხთან ერთად ურთიერთობას“, – განაცხადა გიორგი ვაშაძემ.
ოპოზიციისა და მესამე სექტორის გარდა, პრეზიდენტი შეხვდება კულტურის სფეროს წარმომადგენლებსაც.
ასევე, პრეზიდენტის ადმინისტრაციის ინფორმაციით, სალომე ზურაბიშვილი 18:00 საათზე ბრიფინგს მართავს.