ოცნებამ უკრაინელებს საქართველოში უვიზოდ ყოფნა 1 წლამდე შეუმცირა
უკრაინის მოქალაქეებს საქართველოში უვიზოდ ყოფნა 3 წლის ნაცვლად 1 წლით შეეძლებათ. შესაბამისი დადგენილება პრემიერ-მინისტრმა, ირაკლი კობახიძემ გამოსცა, დადგენილება 2 აპრილით თარიღდება.
„უკრაინის მოქალაქეებს აქვთ საქართველოში უვიზოდ შემოსვლისა და სრული 1 წლის ვადით ყოფნის უფლება. უკრაინის იმ მოქალაქეებს, რომლებიც 2025 წლის 24 თებერვლამდე შემოვიდნენ და იმყოფებოდნენ საქართველოში, ყოფნის უფლება გაუგრძელდეთ 2026 წლის 24 თებერვლამდე,“ – აღნიშნულია დადგენილებაში.
შესაბამისი ცვლილება შევიდა მთავრობის 2015 წლის 5 ივნისის N255 დადგენილებაში “იმ ქვეყნების ჩამონათვალის დამტკიცების შესახებ, რომელთა მოქალაქეებსაც შეუძლიათ საქართველოში უვიზოდ შემოსვლა”.
2024 წლის 23 აპრილს მიღებული ცვლილებით, უკრაინის მოქალაქეებს საქართველოში უვიზოდ შემოსვლისა და სრული სამი წლის ვადით ყოფნის უფლება ჰქონდათ. ახალი დადგენილებით, აღნიშნული ჩანაწერი ერთი წლის ვადით ჩანაცვლდა.
ცნობისთვის, 2024 წლის 23 აპრილის პრემიერ-მინისტრის დადგენილების მიხედვით, უკრაინის მოქალაქეებისთვის საქართველოში უვიზოდ შემოსვლის და ყოფნის ვადები 3 წლამდე გაიზარდა. რუსეთის მიერ უკრაინაში ომის დაწყებამდე, უკრაინელებს საქართველოში უვიზოდ ყოფნა ერთი წლის ვადით შეეძლოთ.
შეგახსენებთ, რომ თავდაპირველად ეს პერიოდი [ქვეყანაში ყოფნის ვადა] ერთი წლით შემოიფარგლებოდა, მოგვიანებით, უკრაინაში ომის დაწყების შემდეგ, ვადა 2 წლამდე გაიზარდა, მერე კი 3 წლამდე.
