“ოცნების” მაჟორიტარობის კანდიდატების ბიზნესინტერესები და შემოწირულებები
![](https://heretifm.com/wp-content/uploads/2020/09/ocnebis-majoritarobis-kandidatebi.png)
“საერთაშორისო გამჭვირვალობა-საქართველო”-ს კვლევის მიხედვით,
“ქართული ოცნების” მაჟორიტარობის კანდიდატების ნახევარზე მეტი – 30-დან 19 – ჩართულია სამეწარმეო საქმიანობაში (17 – თავად და მისი რომელიმე ოჯახის წევრი, ხოლო 2-ის მხოლოდ ოჯახის წევრი). ეს 19 კანდიდატი, მთლიანობაში, სხვადასხვა ფორმით, დაკავშირებულია 186 კომპანიასთან.
![](https://heretifm.com/wp-content/uploads/2020/09/beqa-odisharia-357x210.jpeg)
მაჟორიტარობის 30 კანდიდატიდან 14, 2012-20 წლებში პირადად იყო „ქართული ოცნების” შემომწირველი. მთლიანობაში, მათ „ქართულ ოცნებას” 740 826 ლარი შესწირეს. ესენი არიან: ბექა ოდიშარია, გიორგი ვოლსკი, ლევან კობიაშვილი, გოგი მეშველიანი, ზაალ დუგლაძე, სამველ მანუკიანი, გოჩა ენუქიძე, პაატა კვიჟინაძე, ბეჟან წაქაძე, გივი ჭიჭინაძე, ზაზა ლომინაძე, ირაკლი ხახუბია, ირაკლი ჩიქოვანი და ანზორ ბოლქვაძე.
![](https://heretifm.com/wp-content/uploads/2020/09/giorgi-volski-357x210.jpg)
მსხვილი პოლიტიკური შემომწირველები არიან სამეწარმეო საქმიანობით დაკავებულ მაჟორიტარობის კანდიდატთა ბიზნესპარტნიორებიც. მთლიანობაში, მაჟორიტარობის კანდიდატებმა, მათმა ოჯახის წევრებმა და ბიზნესპარტნიორებმა 2012-2020 წლებში ქართულ ოცნებას 3 702 826 ლარი შესწირეს.
მაჟორიტარობის კანდიდატთა შორის, ყველაზე მსხვილი შემომწირველები (ოჯახისა და ბიზნესპარტნიორების ჩათვლით) არიან: გოჩა ენუქიძე – 1 254 000 ლ; ზაალ დუგლაძე – 990 000 ლ; ირაკლი ხახუბია 458 000 ლ; დავით სონღულაშვილი – 340 000 ლ; ბეჟან წაქაძე – 320 000 ლ.
![](https://heretifm.com/wp-content/uploads/2020/09/levan-kobiashvili-357x210.png)
სამეწარმეო საქმიანობით დაკავებულ მაჟორიტარობის 8 კანდიდატთან ამჟამად დაკავშირებულ კომპანიებს, სახელმწიფო შესყიდვებში მონაწილეობის ისტორია აქვთ. მთლიანობაში, 2012-2020 წლებში, ტენდერებითა და გამარტივებული შესყიდვების გზით, ამ კომპანიებს მიღებული აქვთ 4 364 109 ლარი (ტენდერი – 623 450 ლ; გამარტივებული შესყიდვა – 3 740 659 ლ).
![](https://heretifm.com/wp-content/uploads/2020/09/gocha-enuqidze-357x210.jpg)
მაჟორიტარობის 6 კანდიდატს (დავით სონღულაშვილი, ბექა ოდიშარია, ზაალ დუგლაძე, გოჩა ენუქიძე, ზაზა ლომინაძე და ირაკლი ხახუბია) სახელმწიფო ქონების პრივატიზაციაში აქვს მონაწილოება მიღებული: 2013-2020 წლებში მათ ან მათმა კომპანიებმა 758 300 ლარად შეისყიდეს სახელმწიფო უძრავი ქონება და 2 210 000 ლარად, – სახელმწიფო საწარმოების წილები.
![](https://heretifm.com/wp-content/uploads/2020/09/samvel-manukiani-357x210.jpg)
ორი კანდიდატის შემთხვევაში (დავით სონღულაშვილი და ირაკლი ხახუბია), მათთან დაკავშირებულ კომპანიას სახელმწიფო დაფინანსება აქვს მიღებული პროგრამის „აწარმოე საქართველოში” ფარგლებში. მთლიანი ინვესტიცია შეადგენს 12 646 900 ლარს.
მაჟორიტარობის 30 კანდიდატიდან, 6 არ ეწევა სამეწარმეო საქმიანობას და არ განუხორციელებია პოლიტიკური შემოწირულობა. ესენი არიან: სოზარ სუბარი, ნოდარ ტურძელაძე, დავით სერგეენკო, შალვა კერესელიძე, ზაურ დარგალი და ნინო ლაცაბიძე.
![](https://heretifm.com/wp-content/uploads/2020/09/zaal-dugladze.jpg)
„ქართული ოცნების” მაჟორიტარობის 6-მა კანდიდატმა 2012 წელს მაშინდელ მმართველ პარტიას, ერთიან ნაციონალურ მოძრაობას შესწირა თანხა. ესენი არიან: ბექა ოდიშარია, დავით სონღულაშვილი, გოჩა ენუქიძე, ზაალ დუგლაძე, ირაკლი ხახუბია და ანზორ ბოლქვაძე.
![](https://heretifm.com/wp-content/uploads/2020/09/davit-songulashvili-357x210.jpg)
30 მაჟორიტარი დეპუტატობის კანდიდატიდან, 17 მოქმედი ან ყოფილი თანამდებობის პირია, რომლებსაც 2019-20 წლებში ქონებრივი დეკლარაცია აქვთ შევსებული. მათ მიერ შევსებულ ბოლო დეკლარაციებში შემდეგი დარღვევები გამოვლინდა:
![](https://heretifm.com/wp-content/uploads/2020/09/anzor-bolqvadze-2-357x210.jpg)
მაჟორიტარი დეპუტატობის 5 კანდიდატს არასრულად ან საერთოდ არ აქვს დეკლარირებული, მისი ან/და ოჯახის წევრის საკუთრებაში არსებული კომპანიები: დავით სონღულაშვილი, ალექსანდრე მოწერელია, ანზორ ბოლქვაძე, ირაკლი ხახუბია და რესან კონცელიძე.
6 შემთხვევაში, თანამდებობის პირს კერძო კომპანიაში არსებული წილი მართვის უფლებით სხვა პირისთვის არ გადაუცია.
![](https://heretifm.com/wp-content/uploads/2020/09/irakli-qadagishvili-357x210.jpg)
გარდა იმისა, რომ ეს კანონდარღვევაა, ეს მიანიშნებს იმაზე, რომ ამ თანამდებობის პირებმა ფორმალურადაც არ თქვეს უარი საკუთარი წილების მართვაზე. ესენი არიან: ლევან კობიაშვილი, დავით სონღულაშვილი, სამველ მანუკიანი, ირაკლი ხახუბია, გოჩა ენუქიძე და ირაკლი ქადაგიშვილი.
გასათვალისწინებელია, რომ „საერთაშორისო გამჭვირვალობა – საქართველო” მოკლებულია შესაძლებლობას, შეამოწმოს, არის თუ არა კვლევაში ნახსენები კომპანიები აქტიური, რადგან ამ მიზნისთვის საჭირო ინფორმაცია წარმოადგენს საგადასახადო საიდუმლოებას.