პაპუაშვილის თქმით ლგბტ მარშებისა და შესაბამისი ფერადი ნივთების აკრძალვის შესახებ წინადადება არსებობს

საქართველოს პარლამენტის თავმჯდომარე შალვა პაპუაშვილმა ბიუროს დღევანდელ სხდომაზე საკანონმდებლო წინადადებებზე ისაუბრა.

პაპუაშვილმა რამდენიმე მათგანი დაასახელა.

„არის საკანონმდებლო წინადადებები, კერძოდ, შემოსავლების სამსახურის შესახებ კანონში ცვლილებასთან დაკავშირებით, რომელიც საფინანსო საბიუჯეტო კომიტეტს გადაეცემა, ასევე არის საკანონმდებლო წინადადება ლგბტ მარშებისა და შესაბამისი ფერადი ნივთების აკრძალვის შესახებ, რომელიც ადამიანის უფლებათა დაცვის კომიტეტს გადაეცემა; ასევე, წინადადებაა უცხოეთში მცხოვრები თანამემამულეების დიასპორულ ორგანიზაციებთან დაკავშირებით კანონის პროექტზე; ლობისტის სამართლებრივი მდგომარეობის შეწყვეტის მომართვა – ზაალ სარაჯიშვილი, ლობისტი მოგვმართავს და ეს განცხადება გადაეცემა საპროცედურო საკითხთა კომიტეტს. დაბოლოს, კვლავ ზაალ სარაჯიშვილის ინფორმაცია გაწეულ ხარჯებთან დაკავშირებით, ლობისტის ინფორმაცია“, – განაცხადა შალვა პაპუაშვილმა.

ოლიგარქის პარლამენტში 2 აპრილის თარიღით საკანონმდებლო წინადადება დარეგისტრირდა, როლის თანახმადაც საერთაშორისო ასოციაცია „დაიცავი შენი წილი სამშობლო“ (დარეჯან გუგეშაშვილი) საქართველოში ლგბტ მარშებისა და შესაბამისი ფერადი ნივთების აკრძალვას ითხოვს.
“ომისა და თავდაცვის ძალების ვეტერანების არასამთავრობო ორგანიზაციების გაერთიანება “მშვიდობის ფორუმის” მიმართვა საქართველოს პარლამენტის თავმჯდომარეს, ბატონ შალვა პაპუაშვილს, საქართველოს პარლამენტს:

„გთხოვთ, სასწრაფოდ მიიღოთ კანონი, საქართველოში ლგბტ ე.წ. მარშების აკრძალვის შესახებ. ასევე, საზოგადოების თავშეყრის ადგილებში აკრძალული უნდა იყოს კანონით, ფერადოვანი ლგბტ ჭინჭები“ – ნათქვამია ორგანიზაცია დაიცავი შენი წილი სამშობლოს განცხადებაში, რომელსაც ხელს ასოციაციის თავმჯდომარე დარეჯენ (დოდო)გუგეშაშვილი აწერს. საკანონმდებლო წინადადებას სხვა რაიმე დასაბუთება ან განმარტება არ ახლავს.

შეგახსენებთ 4 აპრილის ბიუროს სხდომაზე ოცნების პარლამენტის თავმჯდომარემ შალვა პაპუაშვილმა, საკანონმდებლო წინადადების განხილვა და შესაბამისი გადაწყვეტილების მიღება ადამიანის უფლებათა დაცვისა და სამოქალაქო ინტეგრაციის კომიტეტს დაავალა . შესაბამისი დოკუმენტი შალვა პაპუაშვილის ხელმოწერით გამოქვეყნდა.

რაც შეეხება საერთაშორისო ასოციაცია „დაიცავი შენი წილი სამშობლო“ – აღნიშნული ორგანიზაციის დირექტორი დარეჯან (დოდო გუგეშაშვილია), წევრები კი მასთან ერთად ემზარ ლეჟავა და ჯიმი ინატაშვილი. 2021 წელს ორგანიზაციის წევრ ემზარ ლეჟავას ევროპელი სოციალისტებისთვის 3000 ლარი აქვს შეწირული.

თავად ორგანიზაციის ფეისბუკგვერდზე ერთ-ერთი ბოლო აქტივობა აშშ-ის რესპუბლიკური პარტიის წევრ კიმბერლი ლოუსთან შეხვედრაა.

პარლამენტისთვის საკანონმდებლო ინიციატივის წერილობით გაგზავნამდე, 20 მარტს, ამ ორგანიზაციის ფეისბუკის გვერდზე გამოქვეყნდა მიმართვა შალვა პაპუაშვილისადმი.

ცნობისთვის დოდო გუგეშაშვილი არის აფხაზეთის ომის მონაწილე, გასამხედროებული დაჯგუფება “მხედრიონის” ერთ-ერთი მეთაური.

საქართველოში ლგბტ მარში არასოდეს გამართულა – სექსუალური უმცირესობების წარმომადგენლები მუდმივად საუბრობენ მათთვის შეკრებისა და გამოხატვის უფლების რეალიზაციის შეუძლებლობაზე. “ქართული ოცნების” ხელისუფლებაში ყოფნის განმავლობაში, ყველა მცდელობა, რომ ლგბტქ+ ადამიანებსა და მათ მხარდამჭერებს საჯარო სივრცეში მოეწყოთ ხილვადობის გასაზრდელი ღონისძიებები, მათზე ძალადობით დასრულდა. არცერთი ძალადობრივი თავდასხმის ორგანიზატორი ამ დრომდე დასჯილი არ არის. ყოველ წელს არაერთი ღიად გეი, ლესბოსელი და ტრანსგენდერი ადამიანი ტოვებს საქართველოს და თავშესაფრის საძებნელად ევროკავშირის ქვეყნებში მიდის.