პარლამენტის საგარეო ურთიერთობათა კომიტეტმა „დიპლომატიური სამსახურის შესახებ” კანონში ცვლილებებს მხარი დაუჭირა

პარლამენტის საგარეო ურთიერთობათა კომიტეტმა „დიპლომატიური სამსახურის შესახებ” კანონში შესატანი ცვლილებები პირველი მოსმენით, დაჩქარებული წესით განიხილა და 79 ხმით მხარი დაუჭირა. საკითხი სხდომაზე საგარეო საქმეთა მინისტრის მოადგილემ ხათუნა თოთლაძემ წარადგინა. ამის შესახებ ინფორმაციას პარლამენტის პრესსამსახური ავრცელებს.
თავდაცვისა და უშიშროების კომიტეტმა დაჩქარებული წესით განიხილა და პირველი მოსმენით მხარი დაუჭირა „დიპლომატიური სამსახურის შესახებ“ კანონში ცვლილებებს, რომლებიც დიპლომატიური სამსახურის საქმიანობას არეგულირებს. ცვლილებების ინიციატორები აცხადებენ, რომ მოქმედი ნორმები რეალურ გარემოებებს ვეღარ ასახავდა და საჭირო გახდა მათი „დახვეწა და ადაპტაცია“.

კანონპროექტი კომიტეტზე პარლამენტის საგარეო ურთიერთობათა კომიტეტის თავმჯდომარის მოადგილემ, ხათუნა თოთლაძემ წარადგინა. მისი განმარტებით, ცვლილებების მიზანია დიპლომატიური საქმიანობის მკაფიოდ რეგულირება და სამსახურებრივი პასუხისმგებლობის გამკაცრება.

კანონპროექტის მიხედვით, დიპლომატიური თანამდებობის პირის ვადამდე გაწვევა შესაძლებელი გახდება იმ შემთხვევაში, თუ მისი ქმედება ქვეყნის ინტერესებს ან საერთაშორისო იმიჯს ზიანს მიაყენებს, ან წინააღმდეგობაში მოვა საგარეო პოლიტიკის ძირითად პრინციპებთან. ახალი რეგულაციები ასევე ითვალისწინებს ქცევის წესების დარღვევის დამატებას დისციპლინური პასუხისმგებლობის საფუძვლად — წესები, რომლებიც თავად საგარეო საქმეთა მინისტრის მიერ განისაზღვრება.

განსხვავებით მოქმედი კანონმდებლობისგან, რომელიც წელიწადში ერთხელ ითვალისწინებდა თანამშრომლების შეფასებას, ცვლილებების ძალაში შესვლის შემთხვევაში დიპლომატიური პერსონალი წელიწადში ორჯერ შეფასდება. ორჯერ არადამაკმაყოფილებელი შეფასების შემთხვევაში გათავისუფლებაც იქნება შესაძლებელი.

ცვლილებები როტაციის წესსაც ეხება: დიპლომატიური წარმომადგენლობის ხელმძღვანელებისა და ადმინისტრაციული პერსონალისთვის ვადის გაგრძელება შესაძლებელი იქნება არა 6, არამედ 12 თვით.

ცნობილია, რომ ცვლილებების განხილვა დაიწყო მას შემდეგ, რაც საგარეო საქმეთა სამინისტროში რეორგანიზაცია ოფიციალურად გამოცხადდა — თანამშრომლებს 1-ელი მაისიდან გადაეცათ განახლებული სტრუქტურული სქემა და შესაბამისი ბრძანებები.

კანონის დაჩქარებულად განხილვას კრიტიკოსები პროცესის გამჭვირვალობის და ფართო პროფესიული ჩართულობის ნაკლებობას უკავშირებენ. ცვლილებები რეალურად ამკაცრებს შიდა სამსახურებრივ კონტროლს და იძლევა მეტ ბერკეტს ადმინისტრაციული ზედამხედველობის გასაძლიერებლად — განსაკუთრებით ისეთ გარემოებებში, როდესაც შეფასების კრიტერიუმები შეიძლება ზოგად ფორმულირებებში ჩაიკარგოს.

სესიაზე კანონპროექტის განხილვა უახლოეს დღეებშია დაგეგმილი.

საკანონმდებლო ორგანოში ქალთა და ბავშვთა საკითხებზე მომუშავე პარლამენტის დროებითი კომისია შეიქმნება. ამის შესახებ პარლამენტის თავმჯდომარემ, შალვა პაპუაშვილმა ბიუროს დღევანდელ სხდომაზე განაცხადა.

შალვა პაპუაშვილის თქმით, პარლამენტში დროებითი კომისიები აქტიურად იმუშავებენ.

„გენდერულ საკითხებთან დაკავშირებული ცვლილებების საკანონმდებლო პაკეტით, გენდერულ საკითხთა საპარლამენტო საბჭო გაუქმდა. ახალი რეგლამენტით, საპარლამენტო საბჭოები, ზოგადად, როგორც ინსტიტუტი, უქმდება. კონსტიტუციით გათვალისწინებული დროებითი კომისიების საკითხი უფრო ადვილი და მოქნილი არის იმ მხრივ, რომ პარლამენტის მხრიდან იყოს გამოყენებული. აქამდე, ფაქტობრივად, დროებითი კომისიის ინსტრუმენტი არ ყოფილა გამოყენებული, გარდა ტერიტორიული მთლიანობის აღდგენის და დეოკუპაციის საკითხებთან დაკავშირებული დროებითი კომისიისა, რომელიც რეგლამენტში ცალკე არის გათვალისწინებული. ჩვენ თავიდანვე განვაცხადეთ, რომ დროებითი კომისიის სახით შეიქმნებოდა ქალთა და ბავშვთა საკითხებზე მომუშავე საპარლამენტო კომისია“, – განაცხადა შალვა პაპუაშვილმა.

პარლამენტმა „უმაღლესი განათლების შესახებ” საქართველოს კანონში ცვლილების შეტანის თაობაზე” კანონპროექტი პირველი მოსმენით განიხილა და 79 ხმით, ერთხმად მხარი დაუჭირა.

საკითხი პლენარულ სხდომაზე განსახილველად განათლების, მეცნიერებისა და ახალგაზრდულ საქმეთა კომიტეტის თავმჯდომარემ გივი მიქანაძემ წარადგინა.

„უმაღლესი განათლების შესახებ” კანონში ცვლილება უმაღლეს სასწავლებლებში ქართული ენის სავალდებულო სწავლებას გულისხმობს.

კანონპროექტის თანახმად, უმაღლესი საგანმანათლებლო დაწესებულების სახელმწიფოენოვან ბაკალავრიატის, მასწავლებლის მომზადების ინტეგრირებული საბაკალავრო-სამაგისტრო, ვეტერინარიის ინტეგრირებული სამაგისტრო, დიპლომირებული მედიკოსის/სტომატოლოგის საგანმანათლებლო პროგრამებზე ჩარიცხული სტუდენტებისთვის სავალდებულო იქნება ქართული ენის (ორსემესტრიანი) სპეციალური კურსის გავლა.

„ეს არის მორიგი მნიშვნელოვანი წინგადადგმული ნაბიჯი ქართული ენის ცნობიერების ამაღლების და მაღალ დონეზე სწავლების მიზანმიმართულობის თვალსაზრისით”, – განაცხადა გივი მიქანაძემ.

ქართული ენის სავალდებულო სწავლება მომავალი აკადემიური სასწავლო წლიდან, 2025 წლის სექტემბრიდან დაიწყება.