პატიმრობაში მყოფი გიორგი ჩიკვაიძის მდგომარეობა საყურადღებოა – სახალხო დამცველის აპარატი
სახალხო დამცველის რწმუნებულებმა, მათ შორის, სახალხო დამცველის აპარატში დასაქმებულმა ექიმმა, #8 პენიტენციურ დაწესებულებაში ბრალდებული გიორგი ჩიკვაიძე მოინახულეს. ამის შესახებ ინფორმაციას სახალხო დამცველის აპარატი ავრცელებს.
ომბუდსმენის ინფორმაციით, ისინი ასევე, გაესაუბრნენ პენიტენციური სამსახურის სამედიცინო პერსონალს.
სახალხო დამცველის აპარატი აცხადებს, რომ პატიმრობაში მყოფი ბიზნესმენის, გიორგი ჩიკვაიძის ჯანმრთელობის მდგომარეობა საყურადღებოა. ამის თქმის საშუალებას უწყებას აძლევს ომბუდსმენის რწმუნებულის მიერ პატიმრის მონახულების შემდეგ გაკეთებული დასკვნა.
„საზოგადოებისთვის ცნობილია, რომ გიორგი ჩიკვაიძეს გამოცხადებული აქვს შიმშილობა. ამ დროისათვის მისი ჯანმრთელობის მდგომარეობა საყურადღებოა და ექიმების მეთვალყურეობის ქვეშ იმყოფება.
ბრალდებულის ჯანმრთელობის მდგომარეობის შესახებ დეტალურ ინფორმაციას, განსაკუთრებული კატეგორიის პერსონალური ინფორმაციის დაცვის მიზნით, არ ვასაჯაროებთ.
სახალხო დამცველის აპარატი გააგრძელებს გიორგი ჩიკვაიძის უფლებების დაცვაზე ზედამხედველობას”, – აღნიშნულია ინფორმაციაში.
დაპატიმრებული ბიზნესმენის, იახტების ბიზნესის მეპატრონე გიორგი ჩიკვაიძის ბიზნესპარტნიორი ირაკლი პაპიაშვილი აცხადებს, რომ პატიმრობაში მყოფი ჩიკვაიძე, რომელიც 12 მარტის შემდეგ შიმშილობს, მძიმედ არის. მისი თქმით, ოჯახი ჩიკვაიძის ჰოსპიტალიზაციას ითხოვს.
„გიორგის მდგომარეობა არის უკიდურესად მძიმე, კანკალებს, ვეღარ გადაადგილდება, დღეს ადვოკატთან გამოიყვანეს ეტლით“, – წერს ირაკლი პაპიაშვილი.
პაპიაშვილის ცნობითვე, ჩიკვაიძეს „5 დღის წინ ჰქონდა ხანგრძლივი კრუნჩხვა, რა დროსაც ვარაუდობენ პენიტენციურის ექიმები, რომ ტვინში მოხდა დაზიანება და ამის შემდგომ ვეღარ გადაადგილდება“.
„პენიტენციური დაწესებულების ექიმებს აქვთ ეჭვი აქვთ, რომ შესაძლოა იყოს მენინგიტი ან ენცეფალიტი“, – წერს ის.
„სახალხო დამცველის აპარატის თანამშრომელსაც მიზანშეწონილად მიაჩნია მისი საავადმყოფოში გადაყვანა“, – დაწერა პაპიაშვილმა.
რადიო თავისუფლება ცდილობს პენიტენციურ სამსახურთან დაკავშირებას ამბის გადასამოწმებლად და დამატებითი ინფორმაციის მისაღებად, თუმცა უშედეგოდ.
სახალხო დამცველის პრესცენტრში ამბობენ, რომ ჩიკვაიძის ოჯახისგან აქვთ ინფორმაცია, რომ იგი თავს ცუდად გრძნობს და სახალხო დამცველის წარმომადგენელი ამჟამად მიდის საპატიმროში, რათა ის ექიმთან ერთად მოინახულოს.
ამასთან, ომბუდსმენის აპარატში გვითხრეს, რომ თავად ჯერ არ შეუფასებიათ ჩიკვაიძის საავადმყოფოში გადაყვანის აუცილებლობა.
ბიზნესმენმა გიორგი ჩიკვაიძემ, რომელიც 11 მარტს თბილისის საქალაქო სასამართლოს სხდომათა დარბაზში დააპატიმრეს, მეორე დღეს შიმშილობა გამოაცხადა.
„მე არ შევეგუები ამ სისტემის მიერ ჩაგვრას“, – წერდა ის ციხიდან გამოგზავნილ წერილში.
11 მარტს თბილისის საქალაქო სასამართლოს მოსამართლე იზა კელენჯერიძემ დააკმაყოფილა პროკურატურის შუამდგომლობა და თანხების უკანონოდ მითვისება-გაფლანგვის საქმეზე ბრალდებულ ბიზნესმენს, გიორგი ჩიკვაიძეს, აღკვეთის ღონისძიება – გირაო – პატიმრობით შეუცვალა.
38 წლის ბიზნესმენი გიორგი ჩიკვაიძე, რომელიც წლების განმავლობაში „ქართული ოცნების“ მხარდამჭერი იყო და საარჩევნო კამპანიაში ეხმარებოდა, ბოლო რამდენიმე თვის განმავლობაში ხელისუფლებას რეკეტსა და „ბიზნესის ახევის“ მცდელობაში ადანაშაულებდა.
პროკურატურამ გიორგი ჩიკვაიძეს და მის პარტნიორს, ირაკლი პაპიაშვილს, ბრალდება საქართველოს სისხლის სამართლის კოდექსის 182, II – „ა“, „დ“, III -„ბ“ მუხლით წარუდგინა, რაც გულისხმობს წინასწარი შეთანხმებით ჯგუფის მიერ სამსახურებრივი მდგომარეობის გამოყენებით დიდი ოდენობით თანხის მართლსაწინააღმდეგო მითვისებას.
მის ბიზნესპარტნიორ ირაკლი პაპიაშვილს მოსამართლემ გირაო ძალაში დაუტოვა.
