მნიშვნელოვანიმსოფლიოსიახლეები

რუსეთს მეზობლების მიმართ აგრესიული გეგმები არ აქვს არც ჰქონია და არც შეიძლება ჰქონდეს-ლავროვი

რუსეთს მეზობელი ქვეყნების არავითარი დაპყრობის გეგმა არ აქვს, არც ჰქონია და არც შეიძლება ჰქონდეს, – ამის შესახებ რუსეთის საგარეო საქმეთა მინისტრმა, სერგეი ლავროვმა პრიმაკოვის საერთაშორისო ფორუმზე სიტყვით გამოსვლისას განაცხადა.

ლავროვის თქმით, რუსეთს მეზობლების მიმართ აგრესიული გეგმები არ აქვს და ამის შესახებ დასავლეთში განცხადებები სიმართლეს არ შეესაბამება.

რუსეთის საგარეო უწყების ხელმძღვანელმა გაიხსენა, რომ პენტაგონის ხელმძღვანელმა, ლოიდ ოსტინმა პირადად არაერთხელ განაცხადა, რომ თუ შეერთებული შტატები უკრაინას არ დაუჭერს მხარს, რუსეთი გაიმარჯვებს და თავს დაესხმება მეზობელ ქვეყნებს.

სერგეი ლავროვმა ყურადღება გაამახვილა ეუთო-ს როლზეც და თქვა, რომ შესაძლებელია მცდელობა ეუთო-ს, როგორც დიალოგის პლატფორმის გადასარჩენად, მაგრამ შანსი მცირეა.

ლავროვის განცხადებით, საერთაშორისო ასპარეზზე არსებულ ვითარებას მეორე ცივი ომი არ უნდა ეწოდოს, რადგან ფუნდამენტური განსხვავება იყო კოლექტიური დასავლეთის ქვეყნების სურვილი, გაენადგურებინათ საერთაშორისო კოლექტიური უსაფრთხოების სისტემა და გამოეყენებინათ უკრაინა რუსეთთან ღია კონფრონტაციისთვის.
გარდა ამისა რუსეთის საგარეო საქმეთა მინისტრმა განაცხადა, რომ მიიღებს მონაწილეობას ეუთოს შეხვედრაში, თუ ბულგარეთი რუსეთის დელეგაციისთვის საჰაერო სივრცეს გახსნის. სხდომა ჩრდილოეთ მაკედონიის დედაქალაქ სკოპიეში ტარდება. ლავროვის თქმითვე, დასავლეთის ზოგიერთმა ქვეყანამ მასთან შეხვედრა ითხოვა.

Reuters-ის ცნობით, ლავროვმა განაცხადა, რომ ის ჩრდილოეთმა მაკედონიამ მიიწვია ეუთოს საგარეო საქმეთა მინისტრების შეხვედრაში, რომელიც სკოპიეში 30 ნოემბრიდან 1 დეკემბრამდე გაიმართება.

2022 წელს რუსეთის უკრაინაში შეჭრის შემდეგ, დასავლეთი რუსეთის იზოლირებას ცდილობს, პირადი შეხვედრები მაღალი რანგის მინისტრებთან კი იშვიათად ხდება.

მსგავსი პოსტები

Back to top button