სუს-ის ყოფილ მაღალჩინოსანს 5 წლით პატიმრობა მიესაჯა
თბილისის საქალაქო სასამართლომ სახელმწიფო უსაფრთხოების სამსახურის ყოფილ მაღალჩინოსანს, სოსო გოგაშვილს, 5-წლიანი პატიმრობა მიუსაჯა. მოსამართლე ვალერიან ბუგიანიშვილმა ის დამნაშავედ ცნო მისთვის წაყენებულ ხუთივე ბრალში.
გადაწყვეტილება მოსამართლემ თბილისის საქალაქო სასამართლოში დღეს, 4 აპრილს, გამოაცხადა. სოსო გოგაშვილის მიმართ წაყენებული ბრალი 4-დან 7 წლამდე პატიმრობას ითვალისწინებდა.
სოსო გოგაშვილს ბრალი “სისხლის სამართლის კოდექსის” შემდეგი მუხლებით ჰქონდა წაყენებული:
157 პრიმა მუხლის პირველი ნაწილით – პირადი ცხოვრების საიდუმლოს უკანონოდ მოპოვება და შენახვა;
157-ე მუხლის მე-4 ნაწილით – სამსახურებრივი მდგომარეობის გამოყენებით პერსონალური მონაცემების უკანონოდ მოპოვება, შენახვა, გავრცელება მასობრივი მაუწყებლობის მეშვეობით, რამაც მნიშვნელოვანი ზიანი გამოიწვია;
333-ე მუხლის პირველი ნაწილით – მოხელის მიერ სამსახურებრივი უფლებამოსილების გადამეტება, რამაც სახელმწიფოს კანონიერი ინტერესის არსებითი დარღვევა გამოიწვია;
320-ე მუხლის პირველი ნაწილით – სახელმწიფო საიდუმლოების განზრახ გახმაურება;
236-ე მუხლის მე-3 ნაწილით – ცეცხლსასროლი იარაღისა და საბრძოლო მასალის მართლსაწინააღმდეგო შეძენა და შენახვა.
სახელმწიფო უსაფრთხოების სამსახურის ყოფილი მაღალჩინოსანი სოსო გოგაშვილი 2022 წლის 16 ივლისს საკუთარ სახლში დააკავეს. დაკავებამდე მან ფეისბუკზე დაწერა, რომ ფლობდა მოქმედი ხელისუფლების მამხილებელ ინფორმაციას.
დაკავების შემდეგ მან დაიწყო ამ ინფორმაციის გავრცელება და ხელისუფლების დადანაშაულება სხვადასხვა გახმაურებულ საქმეში. ხელისუფლების წარმომადგენლები, მათ შორის მისი ყოფილი უფროსი, მოქმედი შინაგან საქმეთა მინისტრი ვახტანგ გომელაური, აცხადებენ, რომ გოგაშვილი იტყუება.
