საქართველოს მეხუთე პრეზიდენტი სოციალურ ქსელში ახალი არჩევნების გეგმას აქვეყნებს
საქართველოს მეხუთე პრეზიდენტმა, სალომე ზურაბიშვილმა, საკუთარ სოციალურ ქსელში ახალი არჩევნების ჩატარების გეგმა სურათის თანხლებით გამოაქვეყნა.
სალომე ზურაბიშვილმა საკუთარ გვერდზე “პოსტი” განათავსა წარწერით: გეგმა – ახალი არჩევნები, რომლის შინაარსიც შემდეგნაირად გამოიყურება:
გეგმა ასეთია:
1. არჩევნების პირობების დაწესება;
2. საარჩევნო კომისიებისა და დამკვირვებლების „ჯარის“ მომზადება;
3. საერთაშორისო პარტნიორების მონაწილეობით ახალი არჩევნების გაყალბებისგან დაცვა;
4. პოლიტიკურ ძალებს შორის კოორდინაცია ახალი არჩევნებისთვის;
5. ერთიანი საარჩევნო პროგრამა – „ქართული ქარტია“ და მისი პრიოტიტეტები: პოლიტპატიმრების გათავისუფლება, რუსული კანონის გაუქმება, სამართლიანი სასამართლოს აღდგენა.
ჩვენ, სალომე ზურაბიშვილთან ერთად, არჩევნების შესახებ დოკუმენტი გვაქვს შემუშავებული, – ამის შესახებ “სტრატეგია აღმაშენებლის” ლიდერმა გიორგი ვაშაძემ განაცხადა, რითაც საქართველოს მეხუთე პრეზიდენტის, სალომე ზურაბიშვილის მიერ ახალი არჩევნების გეგმის საკითხს გამოეხმაურა.
ვაშაძის თქმით, ოპოზიციური პარტიების საერთო მიდგომებსა და მყარ, ერთიან პოზიციას ძალიან დიდი მნიშვნელობა აქვს.
“მოდი, პირდაპირ ვთქვათ, რომ სალომე ზურაბიშვილთან ბოლო შეხვედრაზე ჩვენ გვქონდა სწორედ ამაზე საუბარი – ჩვენ საერთო მიდგომებს აქვს ძალიან დიდი მნიშვნელობა. როცა ვამბობთ, რომ ახალი არჩევნები უნდა ჩატარდეს, როგორ უნდა ჩატარდეს? როგორ ვახდენთ რესურსების მობილიზებას? როგორ არ ვაძლევთ მეორე მხარეს საშუალებას, რომ გადაწეროს ისევ არჩევნების შედეგები? – ეს ძალიან მნიშვნელოვანია, ჩვენ ამაზე დოკუმენტიც გვაქვს შექმნილი სალომე ზურაბიშვილთან ერთად, რომელშიც მკაფიოდ არის ეს ყველაფერი ჩამოყალიბებული და, ალბათ, გარკვეული პერიოდის შემდგომ ამას მოეფინება კიდეც დღის სინათლე, მაგრამ ახლა მთავარი საკითხი არის მყარი, ერთიანი პოზიცია.
ერთი რამ უნდა გვესმოდეს – მეორე მხარე, ანუ თვითმარქვია რეჟიმი ახლა ჩვენში ნიჰილიზმის დათესვას ცდილობს, მაგრამ, მერწმუნეთ, ისინი გაცილებით უფრო ნერვიულობენ. უბრალოდ წარმოიდგინეთ – შენ ხარ ხელისუფლებაში, მაგრამ არავინ არ გაღიარებს, ესე იგი არ ხარ ხელისუფლებაში – აი, ამ რეალობაშია ირაკლი კობახიძეც და აბსოლუტურად ყველა და რაც უფრო დრო გადის, მათ საწინააღმდეგოდ მუშაობს დრო და არა მათ სასარგებლოდ”, – განაცხადა გიორგი ვაშაძემ.
