„ქაშუეთიდან ლოცვიდან გამოსულს შემოგვხვდა მონა-მონას ძახილით და მიიღო კბილებში,,-შაქარიშვილი ჟურნალისტზე თავდასხმას ადასტურებს

ქაშუეთიდან გამოვედით ლოცვიდან, რომ მოვარდა ტელეფონმომარჯვებული და დაგვიწყო მოღალატეს, რუსის მონას ძახილი, – ამის შესახებ მოძრაობა „ერთიანი ნეიტრალური საქართველოს“ წარმომადგენელმა, ვატო შაქარიშვილმა პირველ არხს „მთავარი არხის“ ჟურნალისტის, გიორგი მამნიაშვილთან დაკავშირებით განუცხადა.
“რაც ცხოვრებაში ხდება, ადამიანს, როცა შეურაცხყოფას აყენებენ, ეგ ხდება ხოლმე. არაფერი განსაკუთრებული – ცხვირ-პირში ხვდება იმას, ვინც მონას დამიძახებს. რომ არ მოხვედრია, იმიტომაც ბედავენ ამდენს. სხვაც გააკეთებს? – სხვასაც მოხვდება… სილა [მოვარტყი], „პადლეცი“… თუ არ დაანებებენ ქუჩაში ადამიანების დევნას და შეურაცხყოფას თავს, მიიღებენ უარესს”, – განუცხადა “რადიო თავისუფლებას” შაქარიშვილმა.

მისი თქმით, ეს არ არის პირველი შემთხვევა, როცა ტელეფონმომარჯვებული ახალგაზრდები დადიან და ადამიანებს შეურაცხყოფას აყენებენ.

„პირველი შემთხვევა არ არის, როცა ტელეფონ მომარჯვებული „ოლე ოლა“ ახალგაზრდები დადიან და ადამიანებს შეურაცხყოფას აყენებენ. მონას დაძახებაზე ქართველ კაცს ექნება შესაბამისი რეაქცია. ქაშუეთიდან გამოვედით ლოცვიდან, ზეთი არ მქონდა ზეთნაცხები ხელიდან შეშრობილი, რომ მოვარდა ტელეფონმომარჯვებული და დაგვიწყო მოღალატეს, რუსის მონას ძახილი და მოხვდა კბილებში. ეს იყოს მაგათთვის პროფილაქტიკური ხასიათის, რადგან უნდა დაასრულონ ეს. საზოგადოება ითმენს, კბილებით უჭირავს, რომ მსგავსი ფაქტები არ მოხდეს. ჩვენ არავის არ ვერჩით, არავის არ ვესხმით, ლოცვიდან ქაშუეთიდან გამოსულთან ასეთი პროვოკატორი, მანქურთი დემონი მოვიდა ტელეფონმომარჯვებული და ვურჩევ, რომ გამოაქვეყნოს ეს ვიდეო და დადოს საჯაროდ“, – განაცხადა შაქარიშვილმა.

ამასთან, შემთხვევის შესახებ ვატო შაქარიშვილმა სოციალურ ქსელშიც დაწერა.

„ქაშუეთიდან ლოცვიდან გამოსულს ტელეფონმომარჯვებული მანქურთი შემოგვხვდა მონა-მონას ძახილით და მიიღო კბილებში. იყოს ჭკუის სასწავლებელი, რომ აღარავის გაუბედოთ მსგავსი. ჩვენ არავის თავს არ ვესხმით, მეტიც ზედმეტად ბევრს ვითმენთ!!!
იცოდეთ, რომ შეურაცხყოფაზე რეაქცია აუცილებლად გვექნება“, – დაწერა შაქარიშვილმა.
შაქარიშვილი პოლიციას არ დაუკავებია.

„მთავარი არხის“ ჟურნალისტი გიორგი მამნიაშვილი ვატო შაქარიშვილსა და გოგა ხაინდრავას ფიზიკურ შეურაცხყოფაში ადანაშაულებს.

შინაგან საქმეთა სამინისტროში მომხდარზე კომენტარი ჯერ არ გაკეთებულა.

“მთავარი არხის” ჟურნალისტი: ხაინდრავა და შაქარიშვილი ფიზიკურად გამისწორდნენ