ქედაში აფეთქების შედეგად ბავშვის დაღუპვის გამო სამი პირი დააკავეს
აჭარის პოლიციის დეპარტამენტის თანამშრომლებმა ფეთქებადი ნივთიერების წესების დარღვევით გამოყენების ფაქტზე დააკავეს თურქეთის რესპუბლიკის მოქალაქეები.
სულ სამი პირი.
შინაგან საქმეთა სამინისტროში თქვეს: “გამოძიებამ დაადგინა, რომ მიმდინარე წლის 31 ოქტომბერს, ქედის რაიონის სოფელ ჭინკაძეებში, შპს “სტრუიკ გრუპ ჯორჯიას” ქვეკონტრაქტორი კომპანიების თანამშრომლები, გამოძიების პირველადი ინფორმაციით, უკანონოდ და უსაფრთხოების წესების დარღვევით აწარმოებდნენ ბურღვა-აფეთქებით სამუშაოებს. ძლიერი აფეთქების შედეგად გასროლილი ქვა თავის არეში მოხვდა 2012 წელს დაბადებულ ბავშვს, რომელიც მიყენებული დაზიანების გამო ადგილზე გარდაიცვალა.”
გამოძიება მიმდინარეობს საქართველოს სისხლის სამართლის კოდექსის 244-ე მუხლით, რაც ფეთქებადი ნივთიერების წესების დარღვევით გამოყენებას გულისხმობს.
შსს-ს ინფორმაციით, გამოძიების პროცესში, მტკიცებულებების მოპოვების შედეგად შესაძლოა, გამოიკვეთოს სხვა პირთა პასუხისმგებლობის საკითხიც.
