რუსული ტექნიკა საქართველოსთვის-Дальэнергомаш-მა 30-წლიანი პაუზის შემდეგ საქართველოში მოწყობილობების მიწოდება აღადგინა
რუსეთთან თანამშრომლობას უკვე ქართული სამრეწველო გიგანტები იწყებენ. ქართული ოცნების მდუმარე ნებართვით ბიზნესი სულ უფრო აქტიურად ეძებს პარტნიორებს ოკუპანტ სახელმწიფოში. რუსთავის აზოტი საბჭოთა ტრადიციებს და ეკონომიკურ კავშირებს იხსენებს და ქალაქ ხაბაროვსკის ქარხანა დალენერგომაშისგან დანადგარებს ყიდულობს. ამის შესახებ რუსული სახელისუფლებო გამოცემა TASS წერს.
უფრო მეტიც, ქართული სამრეწველო გიგანტი იმასაც კი თანხმდება, რომ კონტრაქტის ღირებულება რუბლებში აანაზღაუროს. საქართველოს ხელისუფლებას ამ გარიგებაზე რეაქცია არ აქვს – “ქართულ ოცნებაში” ან ამართლებენ ასეთ ეკონომიკურ კავშირებს, ან თავს იტყუებენ, რომ არაფერი იციან.
“ბოლო 30 წლის განმავლობაში პირველად ქარხანამ საქართველოდან შეკვეთა მიიღო. აზოტის აირის გენერატორი გაეგზავნება ქიმიურ ქარხანას, რომელიც მინერალურ სასუქებს აწარმოებს. ასევე, 2023 წელს კომპანიამ უკვე გაუგზავნა ტექნიკა ინდოეთში და ყაზახეთში არსებულ მეტალურგიულ ქარხნებს”, – განაცხადეს რეგიონულ მთავრობაში.
დალენერგომაშ სპეციალიზებულია სხვადასხვა ტიპის მოწყობილობების წარმოებაში მეტალურგიული კომპლექსებისა და ქიმიური მრეწველობის ქარხნებისთვის. საწარმო აღჭურვილობას აწვდის ათეულ ქვეყანას, მათ შორის ბელარუსს, ბულგარეთს, ინდოეთს და ირანს.
