რუსმა ოკუპანტებმა ზაპოროჟიე დაბომბეს
უკრაინაში, ზაპოროჟიეს ატომური ელექტროსადგურის ტერიტორიაზე, კიდევ ერთი დრონი ჩამოაგდეს. “კამიკაძე” დრონი მეექვსე რეაქტორის თავზე მოძრაობდა. ინფორმაციას ატომური სადგურის ოპერატორები ავრცელებენ.
“დღეს ქარხნის თავზე “კამიკაძე” დრონი ჩამოაგდეს. მე-6 ბლოკის სახურავზე დაეცა,” – განაცხადეს ქარხანაში და აღნიშნეს, რომ მეექვსე რეაქტორი, ამ დროისთვის, გათიშულია.
მანამდე ატომური ენერგიის საერთაშორისო სააგენტოს (IAEA) დირექტორმა რაფაელ გროსიმ განაცხადა, რომ ზაპოროჟიეს ატომური ელექტროსადგურის რეაქტორის დამცავ სტრუქტურაზე სულ მცირე 3 პირდაპირი დარტყმა იყო.
ამასთან რუსების მიერ ზაპოროჟიეს დაბომბვის შედეგად, 3 ადამიანი დაიღუპა, – ამის შესახებ ინფორმაციას ზაპოროჟიეს საოლქო-სამხედრო ადმინისტრაციის ხელმძღვანელი, ივან ფედოროვი ავრცელებს.
ივან ფედოროვის ცნობით, ქალაქ ზაპოროჟიეში, რუსების მიერ სამრეწველო ობიექტზე განხორციელებული სარაკეტო დარტყმის შედეგად, დაშავდა 8 ადამიანი მათ სხვადასხვა სიმძიმის დაზიანებები აქვთ.
ზაპოროჟიეს საოლქო-სამხედრო ადმინისტრაციის ხელმძღვანელის ინფორმაციით, რუსების თავდასხმის შედეგად 14 შენობა, მათ შორის 7 საცხოვრებელი კორპუსი, სამედიცინო და კულტურული დაწესებულება დაზიანდა.
გაეროს ატომური კონტროლის ხელმძღვანელი, რაფაელ მარიანო გროსი დიდი ბირთვული ავარიის საშიშროებაზე საუბრობს და აფეთქებაზე პასუხისმგებელ პირებს, კატასტროფის თავიდან აცილების მიზნით, თავშეკავებისკენ მოუწოდებს. განცხადება მან ზაპოროჟიეს ატომურ ელექტროსადგურზე უპილოტო სამხედრო თვითმფრინავის თავდასხმის შემდეგ გააკეთა.
ატომური ენერგიის საერთაშორისო სააგენტოს დირექტორი რაფაელ გროსი აცხადებს, რომ ზაპოროჟიეს ატომურ ელექტროსადგურზე იერიშის შედეგად რეაქტორის დამცავი კონსტრუქცია დაზიანდა.
გროსის ინფორმაციით, ატომური სადგურის ტერიტორიაზე 7 აპრილს დრონი აფეთქდა. მას არ დაუკონკრეტებია, ვის ეკუთვნის უპილოტო საფრენი აპარატი.
რეაქტორის შენობასთან აფეთქების შედეგად მთავარი ბირთვული რეაქტორის დამცავი გარსის დაზიანებას ატომური ენერგიის საერთაშორისო სააგენტოც (IAEA) გამოეხმაურა და მას “უგუნური” უწოდა.
“ასეთი დაუფიქრებელი თავდასხმები მნიშვნელოვნად ზრდის ბირთვული ავარიის რისკს და დაუყოვნებლივ უნდა შეწყდეს,”-განაცხადა IAEA-ის ხელმძღვანელმა რაფაელ მარიანო გროსიმ.
შეგახსენებთ, რომ კვირას, 7 აპრილს რუსეთის მიერ კონტროლირებად ტერიტორიაზე მოქცეული ზაპოროჟიეს ატომური ელექტროსადგურის ხელმძღვანელობამ განაცხადა, რომ ელექტროსადგურს თავს უკრაინული სამხედრო დრონები დაესხნენ. მათივე განცხადებით, აფეთქებას მსხვერპლი არ მოჰყოლია და კრიტიკულად არავინ დაშავებულა, ხოლო ქარხანაში რადიაციის დონე ნორმალურია.
ცნობისთვის, უკრაინა-რუსეთის ომის მიმდინარეობისას ზაპოროჟიეს ელექტროსადგურზე თავდასხმა 2022 წლის ნოემბერშიც განხორციელდა.
ამასთან უკრაინა და რუსეთი ინციდენტზე პასუხისმგებლობას ერთმანეთს აკისრებენ.
რუსული მხარე ამტკიცებს, რომ უკრაინული დრონები თავს დაესხნენ ზაპოროჟიეს ატომურ ელექტროსადგურს. უკრაინის მთავარმა სადაზვერვო სამმართველომ განაცხადა, რომ უკრაინა არ არის ჩართული “არანაირ შეიარაღებულ პროვოკაციებში რუსეთის მიერ უკანონოდ ოკუპირებულ ზაპორიჟიეს ატომური ელექტროსადგურის ტერიტორიაზე”.
უკრაინის თავდაცვის სამინისტროს დაზვერვის მთავარი სამმართველოს წარმომადგენელმა ანდრი იუსოვმა გამოცემა „უკრაინსკა პრავდას” განუცხადა, რომ ზაპოროჟიეს ატომური ელექტროსადგურის ტერიტორიაზე პროვოკაციებთან კავშირი არ აქვთ, სადგურზე „დარტყმების იმიტაცია“ კი, რუსეთის საოკუპაციო ძალების პრაქტიკაა.
უკრაინის ზაპოროჟიეს ოლქის ის ნაწილი, სადაც ევროპაში უდიდესი ატომური ელექტროსადგური მდებარეობს, რუსეთის მიერ ოკუპირებულია 2022 წლის გაზაფხულიდან.
~უკრაინაზე დრონებით მორიგი შეტევის შედეგად კრიტიკული ინფრასტრუქტურის ობიექტები დაზიანდა ჟიტომირის, ოდესის და ნიკოლაევის ოლქებში. ამის შესახებ ადგილობრივი ხელისუფლება იუწყება. მსხვერპლის შესახებ ინფორმაცია არ გავრცელებულა.
უკრაინის საჰაერო ძალების მიერ დილით გამოქვეყნებული მონაცემებით, რუსეთის საოკუპაციო ძალებმა დროებით ოკუპირებული ყირიმიდან უკრაინის რამდენიმე ოლქზე იერიში მიიტანეს 24 უპილოტო საფრენი აპარატით. საჰაერო ძალების თანახმად, უკრაინის თავდაცვის ძალებმა ოდესის, ნიკოლაევის, კიროვოგრადის, ხმელნიცკის და ჟიტომირის ოლქებში ჩამოაგდეს 17 დრონი.
ჟიტომირის საოლქო-სამხედრო ადმინისტრაციის ცნობით, უპილოტო საფრენი აპარატებით შეტევისას ზვიაგელის რაიონში დაზიანდა კრიტიკული ინფრასტრუქტურის ობიექტი და არსებობს ჰაერის დაბინძურების საფრთხე, რის გამოც მოსახლეობას სახლში დარჩენას ურჩევენ. ადგილობრივი ხელისუფლება კონკრეტულ ობიექტს არ ასახელებს.
ოდესის საოლქო-სამხედრო ადმინისტრაციის ინფორმაციით, უპილოტო საფრენი აპარატით დარტყმის შედეგად ოდესის რაიონში დაზიანებულია სატრანსპორტო-ლოგისტიკური ობიექტი. ნიკოლაევის საოლქო-სამხედრო ადმინისტრაციის ცნობით, დრონებით შეტევის შედეგად დაზიანდა ელექტროგადამცემი ხაზები. ენერგომომარაგების გარეშეა 14 დასახლებული პუნქტი.
უპილოტო საფრენი აპარატით თავდასხმის შესახებ იუწყებიან რუსეთის კურსკის ოლქიდანაც. გუბერნატორ რომან სტაროვოიტის თანახმად, უკრაინული დრონით დარტყმამ აფეთქება გამოიწვია სპირტის ყოფილი ქარხნის ტერიტორიაზე. გუბერნატორის ცნობით, მსხვერპლი არ არის.
მხარეთა მიერ გავრცელებული ცნობები დამოუკიდებელი წყაროებით გადაუმოწმებელია.
რუსებმა დონეცკის ოლქი დაბომბეს, არის მსხვერპლი , – ამის შესახებ ინფორმაციას დონეცკის საოლქო-სახელმწიფო ადმინისტრაციის თავმჯდომარე, ვადიმ ფილაშკინი ავრცელებს.
„დღეს, დონეცკის ოლქის დაბომბვის შედეგად, სულ მცირე 1 ადამიანი დაიღუპა და 3 დაშავდა. ჩასოვ-იარი საარტილერიო ცეცხლის ქვეშ მოექცა – დაიღუპა 77 წლის ქალბატონი, დაზიანდა 6 კერძო სახლი“, -აცხადებს ვადიმ ფილაშკინი.
ვრცელდება ინფორმაცია, რომ რუსები თავს ქალაქ სელიდოვესაც დაესხნენ, რის შედეგადაც, 3 ადამიანი დაშავდა.
გამოცემა Financial Times წერს, რომ რუსეთმა უკრაინის ენერგეტიკაზე თავდასხმის ტაქტიკა შეცვალა.
“რუსეთმა უკრაინის ენერგეტიკულ ინფრასტრუქტურაზე თავდასხმის ტაქტიკა შეცვალა. ისინი მართვად რაკეტებს იყენებენ, რათა ყველაზე ნაკლებად დაცულ რეგიონებში ელექტროსადგურები გაანადგურონ.
22 მარტიდან 29 მარტამდე რუსეთმა შვიდ თბოელექტროსადგურს დაარტყა. რუსული რაკეტები ასევე ჰიდროელექტროსადგურებსაც მოხვდა. ზოგიერთი მათგანი თითქმის მთლიანად განადგურდა”, – წერს გამოცემა.
ბრიტანეთის დაზვერვის თქმით, რუსეთის ერთ-ერთი მიზანი უკრაინის საჰაერო თავდაცვის შესუსტებაა. ამასთან, სამხედრო ანალიტიკოსები აღნიშნავენ, რომ რუსებს რაკეტების მნიშვნელოვანი მარაგი აქვთ დაგროვებული.
