რატომ არ მიიწვიეს დღევანდელ ღონისძიებაზე კრიტიკული მედია – რა განცხადებას ავრცელებს პრესსამსახური
პრემიერ ირაკლი ღარიბაშვილის აზრით, “მთავარმა არხმა”, “ფორმულამ” და “ტვ პირველმა” ყველანაირი წითელი ხაზი გადაკვეთეს.
თუ რატომ არ მიიწვიეს დღევანდელ ღონისძიებაზე კრიტიკული მედიის წარმომადგენლები , განმარტება პრესსამსახურმა გააკეთა:
„დღეს რამდენიმე კონკრეტული მედიასაშუალების მხრიდან დაისვა კითხვები, რატომ არ იყვნენ ისინი მოწვეული პრემიერ-მინისტრის დღევანდელ ღონისძიებაზე.
პრემიერ-მინისტრი ყოველთვის პასუხობს ჟურნალისტების კითხვებს, დღესაც მან ყველა ჟურნალისტის დასმულ კითხვას უპასუხა.
„მთავარ არხს”, „ტვ პირველს” და „ფორმულას” არ აინტერესებთ პასუხები კითხვებზე, ისინი მუდმივად იქცევიან დესტრუქციულად და მხოლოდ თავიანთ პოლიტიკურ დღის წესრიგს მიყვებიან.
პრემიერ-მინისტრი ირაკლი ღარიბაშვილი თვლის, რომ „მთავარმა არხმა”, „ტვ პირველმა” და „ფორმულამ” გადაკვეთეს ყველანაირი წითელი ხაზი, ისინი წარმოადგენენ კონკრეტულ პოლიტიკურ პარტიას, ფინანსდებიან და პირდაპირ მართულები არიან მიხეილ სააკაშვილის და მისი რადიკალური ძალების მიერ და ჩართული არიან პოლიტიკურ კამპანიაში პრემიერ-მინისტრის წინააღმდეგ.
შესაბამისად, ამ მიზეზით დღეს არ მოხდა აღნიშნული პოლიტიკური პარტიის ტელეკომპანიების მოწვევა ღონისძიებაზე“, – ნათქვამია განცხადებაში.
შეგახსენებთ, დღეს პრემიერ-მინისტრი ირაკლი ღარიბაშვილი სამხედრო ქალაქის მშენებლობის პროცესს გაეცნო, თუმცა ღონისძიებაზე რამდენიმე მედიასაშუალება არ მიიწვიეს.
